Da lo'ueenataxanaxague' saua lelaatqa so Jesús
1Ca' nagui qomi' machiỹa'que chaqai qomi' notaanaxana' queso Cristo, qomi' qaipataxalgoto quiyim sapaxaguinataxanaxague da se re'xogui leloxoỹaxac chicqo'ot ñi qota'a. 2Ca quiyim cá'maq 'ue ca qaipataxalec, no'uen quiyim ỹaatqajam nepeet quecá'maq icoñiguit. 3Qam caỹim qailligueme' 'ue ca huapigui iuel quiyim 'ue ca ñimitaxac caqamiri, loqo'm queca re'qoochigui nashi quiyim yimit. Ma' 'nejem aỹim se seshit quiyim chi ñimitalta'. 4'Nesa quiyim dá'maq quiyim ña'deenteguelta' se ishit yayilqochit, qam se seshit quiyim sa'aualec quiyim shinac qaica ca ỹasauaxaset. Ma' so qara'gaxala' Jesús chaqaiso só'maq imit aỹim ma'le. 5Ca vichiguiño' caqamiri mesqai 'aviỹalec quiyim michii ca riỹahi. Nauaañiỹa'piguit só'maq qara'gaxala' ma' novi', ca re'oq nqai'en ca hueetaugui na napalaxa. So'maxare re'oq nqai'en ma'le na 'neetari' na ne'taxanatallipi. Ca ñi qota'a ỹaanem queca 'óna cá'maq 'neeta ca na'maqataxac.
6Qamiri ỹaqaỹa', dá'maq shinapegalo qamiri, da'maxare chi ra'maxahi. Ca saloqojnaxangui so Apolos chaqai aỹim, qaiyi qamiri ishit quiyim chigoxochiỹaugui da qana'maqataxac, qaiyi 'yiiñii qaica ca napaguiteguelec quenaua nerecse' na'qaatqa, chaqai qaiyi qaica ca imaqachintac ca liỹa chaqai ca ỹañijintac ca liỹa. 7Ma' ¿negue' ca ỹapacqajnauec qami' quena liỹaripi? ¿Nega'ỹo' ca sqa chicqo'ot ñi qota'a quená'maq hueeto'ot qami'? Ca no'm ñi'maxare ỹaanem qami', ca ¿chi'negue ma' nemaqajñi'? Mashic 'eco' quená'maq vi'saxauot chigoqchiraugui ca chi ra'ñaxaqui'.
8Ca mashic 'eco' qamiri mashic nesallaxanqa, chaqai ná'ogue ná'maq viñitaque mashic viitaxauot. 'Ñiitari' qamiri nashillipi, ca' nauá'maq qomi' ca qarenaxaitec. Ca ¡no'uen quiyim ỹaatqajam qamiri nashil, qaiyi qamiri ñouanqau'a quiyim qomi' nashil qai'neeta! 9Ma' 'eco' coqomi' ma' qomi' lelaatqa so Jesús, ca' ñi qota'a pa'xanterec qomi'. Shinqatari' ca qom mashic tai'a nqohin da lelauaxa, paguelec ca lasauaxaset. Sovirqata'guit quiyim qomi' na'ajanqa, quiyim ỹa'ajne' qomi' ná'ogue na chicqashiguim qota'a lelaatqaipi chaqai ná'ogue na qom. 10Chaqai qomi' qaỹamata'que quiyim qaica ca sa'deenaq, sauaxat qolqata'pegue' so Cristo, qam na' qamiri, ca nomachiỹalta' quiyim 'deenaxanqachaqaiqa queso Cristo. Chaqai qomi' qaica ca qarquesaxanaxa, ca' qamiri nomachiỹalta' quiyim qamiri quesaxanaxaiqa. Na qomyipi coqomi' qarenaqaterec, qam qamiri ỹaatqajam 'ue nqohin ca 'ñiigue. 11Vire'ta nagui sovirqau'a da qare'xoric quena qarqopaaxa, chaqai na qaraquip, chaqai qaica ca sanaxañi nooỹac, chaqai na qomyipi iualaxainta'pe qomi', chaqai qaica ca qara'a'. 12Qaresot sauaxat na re'qoochigui qaro'ueenataxanaxac. Na qomyipi ishiuentalgoto qomi', qam qomi' sa'xatqata'pe naua no'viiñi na'qaatqa. Qarocanta'pe, qam qomi' ña'ñaxataxaguit da qanocanaxac. 13Se no'viiñi naua na'qaatqa qainaxalgoto qomi', qam qomi' 'ue da qareualaxavic quiyim saqatqatapegalo. Chaqai ỹovireta'a nagui quenaua seuqatauguilo na'xata' quiyim qomi' qohinta'que ca lete ná'maq mashic qainaxauec quena qomyipi.
14Qam dajo shiriñi se sahotaque quiyim qamiri sayilqochichii, qaidaata sahotaque quiyim saqatalo qamiri, ma' shiñitaxaric caua ỹauochaqate' ỹaalqa. 15Ma' no'm ỹovi' ca diez mil ca ỹapaxaguinque qamiri so Cristo, qam se ishit quiyim 'xoic ca qataa'illipi. Ma' ỹim ná'maq leta'a da rpi'ỹaxaguii queso Cristo Jesús. Ma' ỹim ná'maq sa'xatema qamiri na'le dá'maq na'qaatec chicqaugui da nca'laxa. 16Ca vichiguiño' ñi'xoresentouguilo qamiri quiyim quiitalec da ỹicyaxac.
17Vichiguiño' selatalo qamiri ca Timoteo shinta'gue ca ỹaalec, ma' ỹim chicqochigui quiyim queetalec so qara'gaxala'. So'maxare no'uenaxanaxanque qamiri da ỹicyaxac ma' seuelec so Cristo, dá'maq sapaxaguinataxanta'pegue quená'ogue na no'ueenaxanaxaquiripi ná'maq neesalec naua 'lauari. 18'Uo' ca caqamiri ỹaatqajam nemaqajan, 'neetapigui lauel quiyim tot sovitalo qamiri. 19Qam qaỹaloq ñauanto qamiri no'm ỹaanem aỹim ca ỹicyaxac ñi qara'gaxala'. Hua', ca ishit sa'den negue' ca 'neeta ca lquesaxanaxa cajo nemaqajnaxairipi, qaiyi sqaidaata da na'qaatec quiyim qaỹa'xatetac. 20Ma' da lo'ueenataxanaxac ñi qota'a ma' ỹoiquentac ná'ogue najo, da'maxare se nodaachiriñi na'qaatqa, ma' da'maxare ỹaatqajam nquesaxanaxa. 21Qam ¿negue' ca repaguitaque sodolgoto ma' sovitalo qamiri? ¿Peeta'a 'maxariñita quiyim qamiri soda'alo ca ỹouaxanaxanaxat, loqo'm ca i'xorenataxanaxa chaqai sichirete' qamiri?
