Prov 7

₁Yäs, ch'ahuye olhämtes

wet en atichunhayaja.

₂Woye m'ak tä one'tek lewoye,

häpkhilek haw'atshancheyaj ihi.

Amajeji ahusek ochufwenyajay,

hätet iwoyek let'uye ales.

₃Äytej afwus wet lesaynhi ahusek.

₄N'otäfwnhayaj en häpeya hach'inhä,

wet n'ohanyaj en häpeya aelh.

₅T'uhla ame yämthilek akniwit'äyena

häp atsinha tä lech'efwa ihi

tä ikänitlhi amej lhämtes.

₆Iche ifwala tä ohoye oka ventana

wet oyahinche t'at.

₇Ow'en wichi tä laj lehuseya,

ow'en mamses, wet iche elh tä nitäfwelayej

chik is wok ni'isa häp m'ak tä iwoye.

₈Yik t'at, tä nichäte esquina

wet hap'alakpe n'äyij,

wet ihoye atsinha tä kain'oyaj länek wukwe.

₉Wet tä ifwala y'uy wet nech'e honatsi,

₁₀inuphä atsinha tä tälhchufwi lewukwe

wet ihoye mamse.

Taw'uyhi lew'uyis tä isis,

n'äl tä häpe t'at atsinha tä lakain'oyaj ihi.

₁₁Ifwunhiyejt'a m'ak at chik häpe.

Häpe atsinha tä tek w'et yiklhaye

wet len'äfwlhi ihihit'a,

iwohit'a lew'etahchä,

₁₂ilunchehen hup kawayhil,

takasthiche n'äyhäy

tä iniwhichehlä hin'ol,

elh chik nichutej itsoklhi.

₁₃Wet atsinhatso tä nichäte mamse,

tatsufwelej wet hits'uhi lak'aj,

n'äfwelhit'a, wet tahuyej wet yok:

₁₄“Pajchemat olän itshäwet

tä ofwelnaj tä oyok,

Olänla yämthilek olha'isyene Dios.

₁₅Häp tä tamenej tä ot'u amche,

matche tä owatläk oaiw'en,

wet tä oaiw'en, is t'at.

₁₆Owaklhatmat omäwet,

och'enpe ow'uy tä isilataj.

₁₇Otsäype m'ak tä lenij akäjche,

mirra, áloes, canela lenij.

₁₈Lhu wet n'attsufwelchewek,

n'awoyej n'amehen tä y'akän lhamehen

pajla'tha ifwala n'amejen.

₁₉Och'efwa ihit'a katsi, yik naji,

ihoye honhat tä atofwe.

₂₀Wuj chinaj t'äj tä ichäj,

atofwe ifwalanaj lewhäy chik tapinla.”

₂₁Matche tä atsinha inityen hin'o

wet ikäsyenchehen lhämtes.

Lepese, ikalhi t'at hin'o,

₂₂wet yikche atsinha, hätet iwoye weyis

tä õ'tone lew'et tä õ'länhen itshätäy,

hätet iwoye tson'ataj

tä yikche hin'o tä yäyit,

hätet iwoye ch'iwase tä õ'sakanej,

₂₃pajtha n'och'äha tajo t'at t'otle,

hätet iwoye afwenche

tä lhaiteläfwite hotanaj,

ihanhiyejt'a tä t'ilek t'at.

₂₄Tä mälhyejtso, tä ahäpehen oles

ch'ahu n'oye athana wet tetshan m'ak tä oyäme.

₂₅Yej tichunejlhi atsinha

tä mälhyej tä oyämetso,

yämthilek alemenyenej wet lhekche.

₂₆Tsi tamenej wujpey hin'ol

tä lewit'äyhyaj ihi wok y'inhen,

lhiphiyet'a, wujpey lelänhay,

₂₇wet chik lenukwe n'äyij tä tiyäje lewukwe,

lenukwe t'at n'äyij tä tiyäje ilek.