Prov 3

₁Yäs, yej p'ethatlä ochufwenyajay,

wet amajeji ahusek olhämtes,

₂wet wujla'pe ifwalas lhäy'e nekchämis tä leläy,

wet wujla atamsek chik i'amej.

₃Yej lhekach'oye n'ohumnhayaj

lhäy'e m'ak tä matche.

Ti amej, hätet iwoyek lhen amisa,

wet lesaynhi ahusek,

₄häpkhilek Dios lhäy'e wichi akäswethä amej.

₅Mälhetwek ahusek tä let'ekhaye Lhawuk,

yej t'ekhaye am ahanyaj.

₆Tihi Lhawuk nilhokej m'ak at chik häpe tä lewoye,

wet lhamlak isyen alhoho.

₇Yej fwetaj wuj tä lehan m'akej,

mat humin Lhawuk wet woye lhämtes,

wet atiyej kanhihlä m'ak tä ni'isa.

₈Häp täjtso kacha tä wuj tä is

yämthilek aikhajyen.

₉Wujyenej Lhawuk nilhokej m'ak tä akäywet,

lhäy'e akäs lhay tä ichun tä lelanhi,

₁₀häpkhilek tapokwe akapuchehis

wet aka hat'es nitsäywethä tä lehis tapokwe.

₁₁Yäs, yej t'ulhan chik Lhawuk iti amej letasnhayaj

tä ifwonej ame m'ak chik lham nhuminache.

₁₂Tsi Lhawuk itasin elh tä lham ihumin,

hätet iwoye hin'o tä itasin lhäs tä lehumnek.

₁₃Elh chik nilhoke n'ohanyaj,

Dios lakäpfwayaj tä is iyej.

Häpe t'at elh tä lehusek ihi,

₁₄tsi m'ak tä ikalhi inu'pe

m'ak tä õ'kalhi tä tälho chinaj t'äj,

wet laha inu'pe oro.

₁₅Laha ihi n'ohanyaj,

inu'pe tuntey tä isis.

Nilhokej m'ak tä wichi ikänch'oye,

tek w'awulhi n'ohanyaj tä laha ihi.

₁₆N'ow'atshancheyaj tä pitaj häp tä tälhe,

lhäy'e n'okäywet, wet lhäy'e n'owujyaj.

₁₇N'ohanyaj len'äyhäy häpe n'äyhäy tä ischehen.

Chik lenukwehen, atamsek ihi t'at.

₁₈Häpe t'at hal'ä tä iwo lew'atshancheyaja

häp wichi tä itsok,

wet Dios lakäpfwayaj tä is

iyejen lhamel tä nileyayej.

₁₉Lhawuk yenejlhi honhat häp lehanyaj,

wet hit'unteji pule lhayis.

₂₀Wet tä lehanyaj ihi, hiw'enhathen lewomekitas,

wet itälhtho pule ayas.

₂₁Yäs, tipej amej n'ohanyaj wet en atichunhayaja,

isit'ak yik hach'oye wet nemhit lew'en.

₂₂Tsi häpkhilek haw'atshancheyaj tälho

wet aisilatyenla, tehlat iwoye n'olhamis.

₂₃Wet tek ihichela awit'äyhyaj chik lenukwe n'äyij.

Ihichet'ala m'ak chik letanhäphänej.

₂₄Chik lewo elakw'eta, ihichet'ala anowayhyaj,

wet chik lemä, atamsek ihi t'at.

₂₅Tek lenuhthila amho m'ak chik aiselkat chik ni'isa,

wok n'owit'äyhyaj chik nichätpe wichi tä ni'isahen.

₂₆Tsi Lhawuk hiw'enla amho ahusek

yämthilek lechaye t'at häp lham,

wet tek lechäthihola n'otkanyaj chik häpe.

₂₇Elh chik häpek iwatlä hach'otyaj,

yej alefwonlä chik lew'en tä lekalhi.

₂₈Yej tahuyej aelh wet lhok,

“Mäh tapilak ifwala,

ow'enla amho m'ak tä lewatlä.”

₂₉Yej woyeje atichunhayaj tä ni'isa

aelh tä icha ame.

₃₀Yej t'ukwe m'ak chik lhen tesayej aelh wet letatayhlä,

chik newache m'ak chik ni'isa chik iwoyej ame.

₃₁Yej lhok, “Häp tä is hin'o tä ka'atännhatsaja”,

wet yej ten m'ak tä iwoye.

₃₂Tsi Lhawuk y'ulhan häp wichi

tä iwoye m'ak tä ni'isa,

mat ihumin t'at tä iyej wichi tä isen.

₃₃Lhawuk takäpfwayeje m'ak tä ni'isa

lew'et hin'o tä ni'isa,

mat takäpfwayeje m'ak tä is

lew'etes wichi tä isen.

₃₄Lhawuk iläkwethä häp wichi tä aläkwyhantses,

mat hip'altsen häp iyhäj tä lhaknichäjawethä.

₃₅Ahantses t'awayhat häpe t'at lewujyaj,

mat häp akachuhantses lelhukla

tä w'et m'ayhay t'at.