Mat 10

₁Jesús t'äne lechufwenkay tä ihi doce wet hiw'enhomche lakhajyhayaj tä inu'pe ahät lhayis yämlek inuhatchephä wet ichestejen wichi nilhokej t'inhayajay lhäy'e m'ak at chik häpek lewit'äyhyaj.

₂Häp täja lheyes häp apóstoles tä ihi doce. Elh tä ichun häpe Simón tä äp õyen lheya Pedro, lhäy'e lechila Andrés. Häte iche Santiago lhäy'e lech'inij Juan, häp Zebedeo leles. ₃Wet iyhäj häpehen Felipe, Bartolomé, Tomás, lhäy'e Mateo, häp lham tä ihutwek impuestos laha tä niyatey Romano lhayis t'alhpe. Wet äp iche Santiago tä Alfeo lhäs, lhäy'e Tadeo, ₄lhäy'e Simón elh. Häp Simónna häpe p'ante elh hin'ol tä tatayhlä Romano lhayis tä lhayen niyateyayej Judío lhayis. Wet häte iche Judas Iscariote, häp lham tä yachajila Jesús.

₅Wet häp doce lhamelna Jesús ichen, wet ifwenhomche m'ak tä ne'tek iwoye, wet yok:

–Yej hoye lew'etes wichi tä kahäpeya Judío lhayis, wet yej tiyäjo hupuy chik häpe tä ihi Samaria, ₆mat tshupiye tson'atas tä tatäylhi tä ihi Israel lhayis. ₇Hoyaye wet wo siläta lhamel tä Dios Niyatyaj tott'a alhoho. ₈Chesthen t'inhayaj länhay, nuhatchephä n'op'itseyhay, chesthen amostas länhay, wet chenchephä ahät lhayis tä ihi wichi. Wet tä awayhat t'at Dios lakhajyhayajna, yej t'alheje laha wichi häp m'ayhay tä isen tä lewoyeje.

₉“Tä lenukwe n'äyij, yej chäj aka kolhki, ₁₀wok akhäyhi, wok haw'uy elh, wok anisähis, wok atsut. Tsi hin'o tä chumaj t'uhawetej chik õhw'enho lhäk.

₁₁“Chik lechätho hupuy wok wichi lew'et, ukwe elh tä lehusek ihi wet ewej lew'et yäk nichäte ifwala chik lhekch'oye. ₁₂Chik letiyäjchufwi huptso, n'okwiyej lhamel tä ihi, ₁₃wet chik t'uhawetej letamsek tä let'uhläk iyej, ihiyeja t'at. Mat chik häpe wichi tä nit'uhawetayej, letamsektso ihiyejt'ala mat tapinla amehen. ₁₄Wet chik lhamel nitchuma ahilähen wet nitch'ahuyaye ämtes, mäyaych'oye lew'ettso wok hupuy, wet sichätchä honhat tä ihiche apach'ol. ₁₅Matche tä ofwel amhohen, Chik nichäthiyela Ifwala tä N'okalelhthayaj, häp n'otasnhayaj chik ihiyeja wichi tä ihi hupuytso, inuhla'pe n'otasnhayaj chik ihiyeja lhamel p'ante ihi Sodoma lhäy'e Gomorra.

₁₆“Lhek yahinya, tä oaichenhen amälhyayej iwoye tson'atas tä ihi lechowej t'owalhas. Tä mälhyejtso, a'äm hin'olwethä mälhyej amlhätas, wet atech'aynej hokwinhas tä najit lakeya. _17-18U'ameyejlä Judío lhayis, tsi tä ahäpehen iyhäj tä ihänlhin'o, ayachajiyela laka concilios wet aipäjlawethä tä ihiche laka n'ohusew'etes. Häte õ'hänla amehen häp niyatey lhäy'e n'owustas tä kahäpeya Judío lhayis. Mat chik mälhyejtso, nech'e lehanayej lewoyneje chik lhenay ämetan'o yämthilek lhamel lhäy'e laka wichi iläte. ₁₉Wet chik ayachaje lhamel, yej lhak'ale ämet chik lewohiyela, wok lhämlhi atape, tsi Dios hiw'enla amhohen ämet chik lewoye. ₂₀Tsi khit'ala amel chik lhämwethä, mat häpkhila Ajcha laka Espíritu tä i'amhiche tä yämlhi.

₂₁“Ofwel amhohen tä iyhäj tä lhalepuhfwas yachajiyela t'ilek häp lepuhfwas, wet hin'ol yachajiyela t'ilek häp leles, wet leles tatayhlahlä lajchalis wet ne'tehlak õ'länhen. ₂₂Wet tä ahäpehen iyhäj tä ihänlhin'o, nilhokej wichi n'äyihila amhomche. Mat elh tä nileyayej mat tujlhache t'at yäk lepes, häpkhilek tafway. ₂₃Chik wichi tä ihi hupuy iti amejen laka'tshayaj, hoyaye elh hupuy. Tsi matche tä ofwel amhohen, Chik kamaj kahoyaye nilhokej hupuy tä Israel lhayis lew'etes, nämla Hin'o Lhäs.

₂₄“Häp elh tä n'ochufwenek tek inu'pe elh tä ichufwen, wet elh tä n'okawo tek inu'pe lewuk. ₂₅Nayayej t'at elh tä n'ochufwenek chik õ'tech'aynej hin'o tä ichufwen, wet elh tä n'okawo chik õ'tech'aynej lewuk. Tsi tä wichi yäme häp hup lewuk wet yok, Beelzebú, ahät lhayis kaniyat, wet lew'et lheley nemla koyhyaj tä tan'isej t'at.

₂₆“Tä mälhyejtso, yej nowaye wichi. Tsi m'ak at chik häpe chik õhp'o'pe, õ'fwoyenhila'pe, wet m'ak at chik häpe chik õ'iskat, õhn'älthila. ₂₇Häp olhämtes tä owoyej amehen tä honatsi, wo silätayej wichi tä ifwala. Wet m'ak tä otsamsanej tä leläte, fwitsenej tä lhen ämeta. ₂₈Yej nowaye lhamel tä ihanej iwoyneje chik ilän asan, tsi lhamel ihanhiyejt'a iwoyneje chik ilän ahusek. Mat tiyej anowayhyaj Elh tä ihanej iwoyneje chik itäyhthen n'ot'isan lhäy'e n'ohusek wet ithatho n'oteläythayaj tä t'un lew'et.

₂₉“Lhek yahinya afwencheyhas, tej tä lhimphaj laha tä õ'chäj täkwfwas lhamel, mat ihichet'a elh chik häpe chik nichät honhate wet y'il, chik kahäpeya Ajchayay lenech'ethayaj. _30-31Wet amel ahayay inu'pe wujpe afwencheyhastso, tsi y'aje haw'oley tä i'pe etek tä Dios ihanej chihätefwas. Wet häp tä oyok, yej nowayay.

₃₂“Elh chik häpe chik ifwenho wichi tä yok, Ohänlhi Jesús - wet häte ofwenhihola Ojcha tä ihi pule, oyohlakwe, Matche, n'aelh t'at lhamtsi. ₃₃Mat elh chik häpe chik nowaye wichi wet ifwenho tä yok, Ontäfwenhiyejt'a Jesús - häte ofwenhihola Ojcha tä ihi pule, oyohlakwe, Ontäfwenhiyejt'a lhamtsi.

₃₄“Yej lhenayek onek yämthilek letamsek ihi honhat. Onekhit'achufwi n'otamsek, onekchufwi n'oka'tshayaj, ₃₅häpkhilek hin'o tatayhlä lajcha, wet atsinha tatayhlä lako, wet lecheyäs ko tatayhlä lakatela, ₃₆wet hin'o letayhfwas häpkhila t'at lew'et lheley.

₃₇“Elh chik lehumnhayaj tä itiyej lajcha wok lako inu'pe tä iti n'oyej, t'uhawethiyejt'a chik Lewukn'o. Wet elh chik lehumnhayaj tä itiyej lhäs wok lhäse inu'pe tä iti n'oyej, t'uhawethiyejt'a chik Lewukn'o. ₃₈Wet elh chik nitilhäja laka cruz wet nhänalhin'o, t'uhawethiyejt'a chik Lewukn'o. ₃₉Häp elh chik noway letape tatäyhla, mat elh chik matche tä ihänlhin'o wet ninowaya letape, häpkhilek lew'atshancheyaj ihi.

₄₀“Elh chik ichum ahilähen, olham t'at tä ichum n'ohlä, wet elh chik ichum n'ohlä ichumlä Elh tä lechenekn'o. ₄₁Elh chik ichumlä Dios laka profeta wet yok, Ochumlä hin'ona tsi Dios kasilätwo t'at - oyok, häp elhtso ikathiyeja lakaha, hätehlat iwoye chik Dios hiw'enho profeta. Wet elh chik ichumlä hin'o tä is alhoho wet yok, Ochumlä hin'ona tsi Dios lakawo tä is alhoho - oyok, häp elhtso ikathiyeja lakaha, hätehlat iwoye chik Dios hiw'enho hin'o tä is alhoho. ₄₂Wet elh chik häpe, tej chik ts'ilak at inät techäji chik hiw'enho elh lhamelna tä w'et m'ayhayhas t'at wet yok, Op'altsen lham tsi ihänlhi Jesús - oyok, matche, elh tä iwoye täjtso lakaha ihichela.”