Sant 1

Amtena yaiyhäj tä ahäpehen Dios leles tä ifwtsatpehen nilhok honhat, tä ahätet iwoye wichi p'ante Israel lhayis tä tälhehen letetsel tä ihi doce. Olham Santiago tä Dios lhäy'e Lhawuk Jesucristo lakawon'o, ochen amehen olhämetna.

Ipuhfwas, chik nichät amehen m'ayhay tä w'enhahiche tä ithahyenpej han'äyij, is chik matche tä a'akäsejwethä tähestso. Tsi lehanayej, tä õyelhtshayen achayaj, wet alechufwenayej t'at häpkhilek lhäy'e lhip tä atkhajayhen tä lewo ateläythayaja. Tä mälhyejtso, teläytej m'ak tä nichät amehen, yämthilek ihämet lechumet wet lechätho ha'isyaj, wet lhäy'e lhip tä awak'alhen, wet niwohit m'ak chik tatäy amejen.

Chik elh amel tatäy lhip lehanyaj, alheje Dios wet lhamlak hiw'enho. Tsi tek n'äyhtsaj, lhiphiyet'a tä hiw'enho m'ayek nilhokej wichi. Mat elh tä t'alhe, iwatläk lechayaj ihi wet nikachuya. Tsi elh chik ilhahtej lakachuhanyaj hätet iwoye inät tä iwo lhetheya tä ihwok nichätho, kalelhäjit'a len'äyij. Wet elh tä mälhyejtso, isit'ak fwetaj ikathiyeja m'ak tä tälhe Lhawuk, tsi häpe t'at elh tä iwopej elha letichunhayajay wet kalelhäjit'a m'ak tä iwoye.

Häpet opuhfwa tä w'et m'ayekfwaj t'at, is chik lakäjyaj ihi chik Dios iwujyen. Wet elh tä hiw'en m'ayek, is chik lakäjyaj ihi chik Dios y'ayhatchä. Tsi elh tä hiw'en m'ayek hätet iwoye hup lhawo, t'unhit'a. Tä ifwala inuphä, lhäy'e lhip tä chayo, wet hip'o hup wet tamchäy, lhawo natchä wet tatäy lesilatyaj. Wet häp hin'o tä hiw'en m'ayek mälhyej at iwoye täjtso, tatäyhihila lakäywet.

Dios lakäpfwayaj tä is iyej elh chik häpe chik lhaikhajyen wet iteläytej m'ayhay tä ithahyenpej len'äyij. Tsi tä m'ayhaytso nikalhahi, ikathiyeja t'awayhat tä häpe lew'atshancheyaj tä Dios ifwenho wichi tä ihumin häp lham.

Chik iche elh tä n'olhelhtshayaj nichäte tä tälhe m'ayhay tä ithahyenpej len'äyij, isit'ak yok, “Dios tä yelhat n'oye.” Tsi m'ak tä ni'isa ihanhiyejt'ak yelhte Dios yämthilek iwoye m'ak tä ni'isa, wet häte lham Dios ihanhiyejt'ak yelhteje m'ak tä ni'isa elh chik häpe yämthilek iwoye. Mat häp m'ak tä tamenej tä n'olhelhtshayaj iyej hin'o, häpe t'at lham lenech'ethayajay tä ni'isachehen tä ikanej wet itsoklhi. Wet häp lenech'ethayajayna chik wak'alh, nech'e häpe lesukyaj, wet chik wak'alh lesukyaj, nech'e häpe t'ilek.

Ipuhfwas tä oalehumnhay, oyok, Yej wetahen. Tsi nilhokej m'ak tä isen tä y'akatej, wok oyok, lhatw'ayhtes tä n'aisej, tälhe Dios tä ipuleye, lham tä lhenek ifwala lhäy'e iwel'a lhäy'e katetsel. Mat tek häte iwoye lhenhaytso tä yikpejch'oye lew'etes tä ihi, lham m'ak tä häpe, häpe t'at. Wet lham lenech'ethayaj tä inech'aynhi lhaw'atshancheyaj, häp tä n'aisej lhämet tä matche tä iwo siläta n'amejen, yämthilek n'ahäpehen leles tä ichun tä tälhe m'ak tä yenlhi.

Ipuhfwas tä oalehumnhay, yej p'ethatlä täja, oyok, Elh weihalhapej amel a'en ch'ahunaja, yej kelej chik letahuy wet yej alhen awäkyhatsaja. Tsi hin'o lewäk tatayhlä m'ak tä is alhoho tä Dios t'uhläk iwoye. Tä mälhyejtso, leyayej nilhokej m'ak tä lakokhayaj ihi lhäy'e m'ak tä wuj tä ni'isachehen. Wet a'ayhatchä tä lechumlä Dios lhämet tä tutcheyejiche ahusey, tsi lhämetna ihanej iwoyneje yämthilek aifwayhthen.

Enaylhi m'ak tä Dios lhämet ne'tek lewoyaye. Yej w'et lelätaye, tsi chik mälhyejtso lewetahen. Elh tä iläte Dios lhämet wet niwoyaye, hätet iwoye hin'o tä lhaiyahin tä ihi n'oyanthi. Hiw'en m'ak tä iyej lete'pe, mat tä nitilhak kanhi, hip'ethatlä. Mat häp elh tä wuj tä itetshan häp Dios lhämet wet nileyayej, wet nip'ethatahlä mat iwoyepej, oyok, Häp tä Dios lakäpfwayaj ihiyejila m'ak tä iwoye. Tsi Dios lhämet häpe t'at m'ak tä le'isyaj ihi, wet ihanej chik ilanche wichi lehusey tä t'akay ihi.

Chik elh yäm lhame tä yok, “Ohäpe Dios leles elh”, mat nit'amajayej lhämtes tä tälhche lak'aj, ikan lhamej, wet t'ekhahyaj tä iti lhamej laha ihihit'a. Mat häp m'ak tä matche tä t'uhawetej tä Dios leles iwoye, häpe t'at täja: Is chik hich'otehen penhas lhäy'e tesalis tä atha len'äyij wet lelhakli ihi, wet is chik t'amaj lhamejenlä m'ayhay tä ni'isachehen tä ihonhatena. Elh tä iwoye tähestso häpe t'at elh tä ts'ilak wet newache lech'ohle tä ihi tä Dios Lhajcha itayche.