Ezeq 12

₁Lhawuk tahuy n'oyej wet yok:

₂–Hin'o, lhewej wichi tä tatay n'ohlä. Lhamel tatelhoy ihiche mat tet iwoyek niw'enachehen honhat, wet äpte lech'otey ihiche mat tet iwoyek nilätachehen honhat, tsi häpehen t'at wichi tä nitch'ahuyawethä.

₃“Wet am, hin'o, waklhat alhuk, wet chik lhek, tet häp chik matche chik õ'hän ame honhat tä kahaw'eta. Wet is chik lhek tä ifwala häpkhilek lhamel hiw'en amche. Tej tä häpehen t'at wichi tä nitch'ahuyawethä, elat nitäfwelej häp m'ak tä hiw'en tä lewoye. ₄Is chik häpe t'at tä ifwalayej tä letonphä aka m'ayhay tä lhek, häpkhilek wichi aitetshan tä tet iwoyek matche tä õ'hän ame honhat tä kahumina chik lhehi. Wet chik honaj wet äpte is chik lhamel hiw'en amche chik lhek, wet tet häp chik matche tä õ'hän ame honhat tä kahaw'eta. ₅Wet is chik aiw'en tä lefwoynho awukwe lhip, häpkhilek letälhche tä leskon alhoye aka m'ayhay. ₆Wet chik honatsichä, is chik lhamel hiw'enej tä lethat atape alhuk tä lhek. P'o'pe atey, häpkhilek kayahinache honhat tä lenukwe, tsi m'ak tä lewoye häp tä oyen tetnekayej Israel lhayis tä mälhhiyejattso m'ak tä ihiyeja lhamel.”

₇Wet tä oläte Lhawuk lhämet tä ifwel n'oho, owoye t'at. Ifwalayej otonphä okhäy tä otilhäjla, oten t'at hin'o tä yik tä õ'chench'oya laka honhat. Wet tä honaj otijo owukwe lhip, ohänet otkwey tä ofwoynho, wet tä honatsichä lhamel hiw'enn'o tä othat letape oka m'ayhay tä otilhäj, onuphä wet oyik.

₈Wet tä äp ifwala elh Lhawuk tahuy n'oyej wet yok:

₉–Hin'o, Israel lhayis tä häpet wichi tä nitch'ahuyawethä, lhamel tay'ätshanejne ame häp m'ak tä lewoye ifwala elh naji. ₁₀Fwenho lhamel olhämet tä oyok, “Olham ohäpe Awuk Dios. Häp täja m'ak tä owo silätayeje niyat tä ihi Jerusalén lhäy'e nilhokej wichi tä iyej.”

₁₁“Fwenho lhamel tä m'ak tä lewoye häp tä lhen atetnekayej lhamel tä mälhhiyejattso m'ak tä ihiyeja lhamel. Tsi häp tä oyokwesiyela t'at honhat tä lhamel kalew'eta. ₁₂Wet häp niyat tä iyej lhamel tilhäjla laka m'ayhay, ithatla letape, wet chik honatsichä yikhila, tälhichela t'at n'olafwek tä tuntey letowej tä wichi itoyen. Wet hip'ohla'pe tatey häpkhilek niyahinache honhat tä inukwe. ₁₃Wet och'enla'pe oka hotanaj häpkhilek otsokejlhi, wet ohänhiyela häp Babilonia. Mat tek iyahnhila'pe Babilonia chik nichäte, wet äp y'inhila t'at chik ihi. ₁₄Wet nilhokej häp lakawos tä lhäy'ewethä tä y'uhyen lhame, lhäy'e häp laka nifwotas, ofwtsatkatla'pe honhat tä tafwojyhiye, tapinhiye, ifwala tälhche, lhäy'e tä ifwala y'uyhi, wet ochäjla ofwajnhat, ohänla lhamel. ₁₅Wet chik lhamel ifwtsatpehen honhatil wet lhahiyeja wichi tä w'enha lhamejen, wet nech'e lhamel ihanhiyeja tä olham tä ohäpe Lewuk Dios.

₁₆“Mat omälhthila iyhäjfwas häp lhamel, häpkhilek tafwayej n'oka'tshayaj lhäy'e nehläs lhäy'e äytes. Wet chik ochench'oye lhamel lew'et, ifwenhihomchela wichi tä lhamel ihoyehen tä ihiche honhatil, tä lhamel lakeyis tä hich'atej tä ni'isahen häp tä tamenej. Wet nech'e nitäfwenhila n'oyej tä ohäpe Lewuk Dios.”

₁₇Lhawuk yachajo tä tahuy n'oyej wet yok:

₁₈–Hin'o, is chik mälhyej chik letachettiyejche anowayhyaj tä letufw äk, wet is chik tet iwoyek lelhak'alhi tä leyäyej ät. ₁₉Olham tä ohäpe Lewuk Dios, wo silätaye wichi tä ihi Judá, lhäy'e tä ihi Jerusalén, lhäy'e tä ihi Israel, tä wujla lenowayhyaj chik lhamel t'ekhen, wet letamsekhiyejt'ala lhät chik iyäyej. Tsi õ'wasthihila lhamel laka honhat wet nemhit wichi ihihila, häp tä fwitses lhamel. ₂₀Wet nilhokej honhates tä nitäkwpej hupuy tä ihiche õ'wasthihichela, wet imälhewek honhat nech'e ts'anisla t'at. Wet häp tä nech'e lhamel ihanhiyeja tä ohäpe Lewuk Dios.

₂₁Wet äp Lhawuk yachajo tä tahuy n'oyej wet yok:

₂₂–Hin'o, ¿atsi m'ak tä tamenej tä Israel lhayis lhämtes yopejkwe, “Yik t'at häp ifwalas wet mathichet'a m'ak tä profeta hin'älitlä tä ihichela”? ₂₃Fwenho lhamel olhämet tä oyok, “Olham ohäpe Awuk Dios. Häp täja m'ak tä owo siläta amejen, oyok, Nemhit otch'anlha amehen ämtestso chik yachajohlak lewoye.”

“Wet äpte fwenho lhamel tä atott'a alhoho häp ifwalas tä lhaimatthichela häp m'ak tä profeta hin'älitlä tä ihiyeja lhamel. ₂₄Tsi äp ihichet'ala n'on'ältshayaj chik kamatache. Wet äpte ihichet'ala häp profeta chik iyej häp Israel lhayis len'ältshayaj chik yen lhämeta chik kamathiyachela. ₂₅Tsi häp tä olham tä ohäpe Lewuk Dios olhamlak oyämhoplhi, wet olhämet chik ofwenhohla oyämla matche wet pajiyejt'ala. Wet amel tä ahäpehen wichi tä nitch'ahuyawethä lew'enayhla t'at, tsi oyämla matche olhämet. Olham tä ohäpe Awuk Dios tä owoyetso.”

₂₆Wet Lhawuk yachajo tä tahuy n'oyej wet yok:

₂₇–Hin'o, häp Israel lhayis yäme tä han'ältshayaj tä profeta len'ältshayaj ihitkanak lhaimatitche pajla'tha wujpey nekchämis, wet kamaj atofwey häp m'ak tä lhäme tä ihichela. ₂₈Mat fwenhola lhamel olhämet tä oyok, “Olham ohäpe Awuk Dios. Pajiyejt'ala chik lhaimatitche olhämet chik häpe chik owoye. Akalelhäj tä mathichela. Olham tä ohäpe Awuk Dios tä owoyetso.”