Daniel iwo p'ante let'alhyaja'pe laka wichi tä ihiche honhates tä kalew'eta
1-2Häp nekchäm tä ichun tä Darío tä Asuero lhäs tä Media lhele elh niyatej Babilonia, wet olham Daniel olhaichufwenej Lhawuk lhämet tä profeta Jeremías lelesaynek p'ante. Wet otetshan lhämet tä yok, “Ihihila setenta nekchämis chik wasihila hupuy tä Jerusalén, pajla'tha tafwayej lewit'äyhyaj.”
3Wet owo ot'alhyaja tä olhaip'altsene Lhawuk Dios, wet olhaichuyhat, otw'uyhiche ow'uyis tä yelaj wet nech'e ottayhiphä mok'otaj. 4Wet owo ot'alhyaja tä oyok:
–Iwuk Dios tä N'owujtaj wet äp atkhajay, lhäy'e tä ahumnhayaj ihi, tek letäyhat ämet tä pajche lewoyeje wichi tä aihumin wet äp iwoye ämtes. 5Olhamel och'isukwis, owoyepej m'ak tä ni'isa. Olhamel ottay ahilä wet oleyejpej ämtes lhäy'e achufwenyajay. 6Olhamel owohit'a lahaya akawos profetas tä ämetej tä lhamel tahuyej p'ante oka reyes, lhäy'e oka niyatey, lhäy'e ojchalis, lhäy'e oka wichi Israel lhayis.
7“Iwuk, ahäpe elh tä le'isyaj ihi, mat olhamel owetayej han'äyij wet on'äfwlhi ihi ifwalana. Y'aje olhamel oiyhäj tä ihi Judá lhäy'e Jerusalén, lhäy'e nilhokej iyhäj Israel lhayis, lhamel tä ihiche honhates tä atosehen lhäy'e tä ni'atosayehen tä am lhokwese, häp tä lhamel ile amej. 8Wet olhamel, Iwuk, ohätet iwoye oka reyes, lhäy'e oka niyatey, lhäy'e ojchalis p'ante wetayej len'äyij tä is alhoho wet iwo lech'isukyaja, wet matche tä olhamel on'äfwlhi ihi. 9-10Iwuk Dios, ahäpe elh tä lep'altsenyaj ihi wet letäyhtejen letes wichi, tej tä olhamel ottay ahilä wet otch'ahuhit'a ame, wet owohiyet'a ämtes tä akawos profetas ifwel n'ohohen. 11Wet nilhokej Israel lhayis ileche achufwenyaj wet lhamel tach'ahuhiyet'a ämtes. Matche, olhamel owopej och'isukyaja wet ottay ahilä, wet häp tä tamenej tä lechätyen n'o'pehen n'owit'äyhyajay tä Ley p'ante tälhe akawo Moisés yen lhämeta.
12“Tä lewoynejetso m'ak tä lewoye, lematitche ämtes p'ante äyteschehen tä letiyej olhamel lhäy'e oka niyatey. Tsi letiyej Jerusalén häp lewit'äyhyaj tä n'am hanej chik iche. 13Nilhokej m'ak tä ni'isatso nichät'atpe olhamel, mälhyej tä Ley p'ante tälhe Moisés yäme tä ihichela. Tha olhamel ot'uhit'a amche, Iwuk Dios. Olhamel olehiyejt'a och'isukyajay wet n'am hänlhi m'ak tä matche. 14Wet häp tä tamenej tä am, Iwuk, lewaklhat olhamel owit'äyhyaj wet lechätyen n'o'pehen. Iwuk Dios tä olhamel oalewuk, am tä ais wet lhenlhi m'ak tä is alhoho. Mat olhamel n'am tach'ahu ame.
15“Iwuk Dios, tä lepäyne akhajyhayaj tä letonphä p'ante aka wichi tä tälho honhat tä Egipto, häp tä atoyaj ihi pajtha nichäte ifwalasna. Mat kamaj olhamel owopej och'isukyaja wet owoyepej m'ak tä ni'isa. 16Iwuk, olhamel ohanej t'at tä ahäpe Elh tä ispej alhoho m'ak tä iwoye. Olhaip'altsen ame, leyej tä letiyej awäk häp Jerusalén, tsi häpe t'at haw'et tä i'pe chenaj tä amajchet. Häp nilhokej wichi tä ihiche honhates tä ni'atosayehen, lhamel iläkwlhi Jerusalén lhäy'e aka wichi, tsi häp tä olhamel owo och'isukyaja, wet lhäy'e ochätilis p'ante.
17“Dios tä oalewuk, ch'ahuye ot'alhyaj tä akawon'o. Ch'ahu n'oye, Iwuk, tä olhaip'altsen ame. Yahne Awukwe tä wasi tä ihi Jerusalén. Hutunpe wet nech'aynhi, yämthilek hin'älit t'at tä ahäpe Dios. 18Dios tä oalewuk, lhek tetshan wet ch'ahu n'oyehen. Fwoyenchehen atey, yahin olhamel olhaklis lhäy'e aka hupuy tä wasi. Tä olhamel olhaip'altsen ame, khit'a tä ofwetaj oisen t'at, tajlhama tä ot'uhläk oisej hap'altsenyaj tä wuj. 19¡Iwuk, ch'ahu n'oyehen! ¡Täyhat olhamel otes! ¡Tetshan n'ohen wet ch'ot n'oyehen! ¡Dios tä oalewuk, yej apajejlä, häpkhilek len'älit t'at tä ahäpe Dios! Tsi Alewuk hupuy tä Jerusalén lhäy'e wichi.”
Õ'päyne p'ante setenta semanas häp Daniel
20Olham otujlhache tä owo ot'alhyaja tä olhaifwelejo och'isukyaj häp Owuk Dios, lhäy'e oka wichi Israel lech'isukyajay, wet olhaip'altsene Owuk Dios yämthilek inech'aynhi Lewukwe tä T'amajchet tä pajche õ'wasthi. 21Wet tä kamaj owo ot'alhyaja, wet ángel Gabriel tä pajche ow'en tä lhain'älit n'oyej, lham wey'ä n'oye. Häpe t'at lewhäy tä honajlä tä õ'wo t'awayhata häp Dios. 22Wet Gabriel tahuy n'oyej wet yok:
–Daniel, olham onäm häpkhilek ohanhat amej m'ayhayna. 23Tä lewo tesa tä lewone alhyaja, wet Dios nichulh amho. Häp tä oho ame yämthilek ofwel amho, tsi Dios wuj tä aihumin. Athana äm matche tä letach'ahuye, letäfwnhiyeja m'ak tä Dios hin'älit amej:
24“Chik tajyämhiyela setenta semanas tä häpe nekchämis,
wok oyok, cuatrocientos noventa (490) nekchämis tä nilhokho,
häpe t'at lewhäy tä Dios y'ithat,
yämthilek noj aka wichi lech'isukyajay,
wet nemhit tatayhlä Dios,
wet m'ak tä ni'isa nemla yen lew'eta hupuy tä t'amajchet,
wet tatäy wichi letes,
wet m'ak tä is ihiyeja lhamel yämthilek tiyäj'attsiy,
wet õ'matitche Dios lhämette
ifwenho häp profeta Jeremías,
wet õyachaje Dios häp Lewukwech'o
tä Lhamya tä T'amajchet.
25Is chik lehanej täja wet en atichunhayaja:
Tälhe tä näm Dios lhämet
tä ne'tek õ'nech'aynhi Jerusalén,
pajla'tha siete semanas tä häpe nekchämis,
wok oyok, cuarenta y nueve nekchämis tä nilhokho,
wet häpkhilek näm häp hin'o tä niyat tä Dios tatshupiye.
Wet õ'nech'aynhihila häp hup kawayhil,
lhäy'e häp n'olafwek tä tuntey tä ilunejlhi häp hupuy,
wet ihichela pajla'tha sesenta y dos semanas tä häpe nekchämis,
wok oyok, cuatrocientos treinta y cuatro (434) nekchämis tä nilhokho,
mat häpkhila lewhäy tä wuj n'ofwitajayaj.
26Chik tafwaytshi häp cuatrocientos treinta y cuatro nekchämistso,
õ'sohiyeja lew'atshancheyaj
häp hin'o tä niyat tä Dios tatshupiye,
wet nemla iche.
Wet nämla niyat elh, wet laka sip'äl
iwasthihila Jerusalén lhäy'e Dios Lewukwe.
Wet lepesla, hätehlat iwoye
tewok lhayis tä t'ulhpe honhat,
wet ihichela n'oka'tshayaj lhäy'e n'owit'äyhyaj,
mälhyej tä Dios pajche yäme.
27Wet niyat tä oyämetso tä häpe Dios letayhfwa,
ne'tehlak wujpe wichi lhaip'ajtej häp lham.
Yämla äytajche lhämet tä iwoyeje
pajla'tha siete nekchämis.
Wet chik nichäte lechowej häp nekchämistso,
ilehthiyeja wichi chik iwo t'awayhata häp Dios,
nemla tach'anlhayek yen n'okhayajayej
itshätäy tä õ'länhen.
Wet niyattso yenhilhila m'ak tä tanhowatnhan
tä hich'atej tä ni'isa,
itihlawhäye altar tä n'on'okhayajw'et,
pajla'tha Dios ichätyenpe lewit'äyhyaj niyattso,
nofwila, tafwaytshi,
mälhyej tä Dios pajche yäme.”
