'Am 'oonolec da 'Am Atamnaxala'
1'Am Nataxala', ñaq aỹem 'aua'axaỹa qataq aỹem 'auasateguet,
cha'aye huo'o da ỹachoxoyec qataq da iuenaxanaxa.
2Ñaq 'antela'a qome da ñachaalataxac,
cha'aye aỹem ỹataqta 'am salaxaguet.
Cha'aye nache 'Am Ñatamnaxala', qataq nache 'am da 'am sa'amaqteetac,
ñaq 'anca'alaxatec qome ne'ena 'aramaxashec.
3Ñaq aỹem 'auchoxoren qome, 'Am Nataxala',
cha'aye 'enauaque naua na'axa'te da 'am seỹaxaatacot.
4'Am Nataxala', ñaq machiguiñi 'anqa'en
da nachaalataxac ne'ena 'aramaxashec,
cha'aye 'am ỹalamaqtot ñaqa'en da ñeqouagaxaunaxac.
5Cha'aye 'Am Nataxala', 'am soxoraic
qataq choxonnataxanaxaic,
qataq lta'araic da 'arauotaxanaqtaic
'enauac na 'am iỹaxaatacot.
6Ñaq 'aua'axaỹa qome da ñatamnaxac 'Am Nataxala',
qataq 'aulo'oguet da ñeqouagaxaunaxac.
7Da huo'o naxa da ñeque'eenaxac,
qalaq 'am seỹaxanot,
cha'aye 'am aỹem 'auasateguet naxa.
8Cha'aye qaica ca lỹa atamnaxala' da 'am 'eeta'am, 'Am Nataxala',
qataq qaica ca no'onatac da 'eeta'am na 'aro'onatacpi.
9'Am Nataxala', 'enauac na ỹotta'a't shiỹaxauapi maye 'aro'onatacpi,
anac qome da 'am natamnot qataq ỹo'oxoreetac da 'are'enaxat.
10Cha'aye nache 'amta da 'am 'amaqtaqaic
qataq 'auo'ot nam ỹo'ot da na'aalaxa,
qaq nache 'amta da 'Am Atamnaxala'.
11Ñaq aỹem 'auapaxaguenec da 'anqa'aicỹaxac, 'Am Nataxala',
yaqto' ỹataqta salemaqtelec da shectague' damaye,
qataq nalochiguiñi 'anqa'en da iquiyaqteỹaxac,
yaqto' huo'o naq 'enec ñaqa'en da 'are'enaxat.
12'Am Ỹataxala' qataq Ñatamnaxala',
ỹataqta 'am semato'ot da iquiyaqteỹaxac da 'am sho'oxoreetac,
qaq nache 'eetai' qome da sho'oxoreetac da 'are'enaxat.
13Cha'aye ỹataqta lta'araic da 'arauotaxanaqtaic da sheeta,
ỹoqo'oye aỹem 'anca'alaxateeguesop añi huachiqui.
14'Am Atamnaxala', na shiỹaxauapi
na'amqaanaxaicpi qalaq aỹem iloquiaxan,
na laataxanaxaicpi huaxaỹa't da nshetaique aỹem ỹalauat,
qaq namaye ỹataqta saq taỹapigui lauel da qoneta.
15Qalaxaye 'Am Nataxala', 'Am Atamnaxala',
'am nhualaxaunaxaic qataq 'am choxonnataxanaxaic.
16Ñaq aỹem 'anamata'a qataq aỹem 'auchoxoren,
ñaq 'aỹa'anem ca 'ara'añaxac ne'ena 'aralamaxat 'aramaxashec,
ñaq 'anca'alaxatec ne'ena 'aỹa'alec.
17Aỹem 'auachaxana qome ca la'anaxat da 'arauotaxanaqtaic,
yaqto' da ỹauaachigui na ñepa'aguenaxauapi nache na'aloxon.
Cha'aye 'Am Nataxala',
aỹem 'aỹa'anem da 'artaunaxanaxac
qataq aỹem 'aua'añaqchet.
