Salmos 65

₁'Am Atamnaxala' maye qonetaña ye Sión,

nache 'amta da 'aiguet da 'año'oxonnataguec,

ỹataqta iuen da qaipacchigui na na'aqtacpi maye 'am qoỹanot,

₂cha'aye 'aua'axaỹa da qouagaxaunaxac.

'Enauac na huetalec ana 'alhua 'am natapegueua'a.

₃Na qaye'etaxaloxosat qomi' loxonqa,

qalaxaye 'am 'auapalaxat na qarasouaxashetpi.

₄Ỹataqta machiguiñi ca shiỹaxaua maye 'arca'aguishec,

nache 'anauegueuo da yaqto' 'am saqaỹapeque naqa'en,

hueta'a ca nanataqa' aca atamnaxaqui.

Nache qaica ca seuenaqtac da souaqta'a ye 'arma',

yem qui'itta atamnaqa'.

₅'Am Atamnaxala' qataq 'am qarca'alaxaqui 'am qomi' 'auasategueta

ỹataqta qaica ca 'ena'am da la'amaqchec

da ỹaỹamaqchiguiñi maye 'auo'ot.

Qaq 'enauac na netalec ana 'alhua ỹataqta 'am pi'iỹa'a

qataq na netaleguete naua qaỹoqtalo auaxai.

₆'Am ỹataqta qaramchiguiñi 'anqa'en ana qasoxonaxapi,

'auauota'a da 'ara'añaxac qataq da 'arquesaxanaxa.

₇'Am 'avia'axaneguet da l-lamaxa ana lapaxa,

qataq da 'eetec da lliỹa't na ỹotta'a't nhuo' le'ecpi.

₈Ivira'a na netaleguete naua qaỹoqtalo 'aleu',

ỹataqta huo'o da la'aalaxa souaxat

naua saqaỹauanapegalo maye 'auo'o't.

Souaxat da qoneta nache huo'o da na'alaxac souaxat da tonaxac,

ivira'a na netaña da nala' lliguisheguem qataq da avit.

₉'Am ỹataqta 'antela'a ana 'alhua,

'anamaxa na auot qataq ñaxatsheguem 'anqa'en na huetalec,

qataq 'auauota'a na la'auaxac da ñaxat 'anqa'en na trigo,

qaq 'era da qonetec da 'auqataxanai' na no'onaxa.

₁₀'Am 'aupettalec na llec na nañiguishec ana 'alhua,

qataq dolagui 'anqa'en ana 'alhua lapa,

qataq sara'angui 'anqa'en na 'alhua 'aurolec na auot lta'araic,

qataq 'aỹa'anem da no'on 'anqa'en na ala na nañiguishec.

₁₁Ye 'oonolec vi'i qalaq imaigui da 'aỹa'an da 'archoxonnataxanaxa,

qataq na lo'oc na piguem ỹo'ot da qaica ca qaiueetac.

₁₂Na 'auaqpi na toolec 'alhua qalaq darala 'anqa'en,

qataq na aviaq qalaq no'on 'anqa'en.

₁₃Na nalochiguiñi 'alhua qalaq nlaqtelec 'anqa'en na 'atetpi shiguiỹac,

qaq na ca'amapega't 'alhua qalaq ñaxaalec 'anqa'en na trigo,

'enauac namayepi do'onaxaatac qataq ỹa'alaqtai' souaxat da ntonaxac.