Salmos 63

₁'Am maye 'Aro'onatac 'Enauacna, maye 'am Ñatamnaxala',

ỹataqta huo'o da iyaxa da 'am ñimitaique,

cha'aye ỹataqta huo'o da iuennataxa da qoneta,

qataq 'enauac da ñachaalataxac 'am iuen,

'eeta'am ca 'alhua daqaqta maye iuen ca 'etaxat.

₂Da yaqto' sauaachigui da 'ara'añaxac qataq da 'ayo'oxoyec,

'eeta'am co'ollaq 'am ñauane' huaña añi atamnaxaqui maye 'aralamaqte.

₃Cha'aye da 'arauotaxanaqtaic napacalec

da lyacỹaxac da achaalataxac.

Qaq ỹoqo'oye da setaqa qalaq ỹataqta 'am sho'oxoren.

₄Qataq 'am semato'ot da ñachaalataxac da 'am sho'oxoreetac

qataq 'am saato'oto naua ihua'q da ñeqouagaxaueetac.

₅Qataq ỹataqta machiguiñi da ñachaalataxac,

sheeta'am ca chectac ca ỹataqta no'on nallec,

qataq da setaqa qalaq samachiguiñi,

da 'am sho'oxoreetac.

₆Qaq naxa da mashe ñenaatalec ye imala',

nache tachigui iuel 'am,

nache imauec ye pe da 'am seuennatega,

₇cha'aye 'am ỹataqta aỹem 'autauaatac,

ỹoqo'oye samachiguiñi da sooto'oto naua 'araua't.

₈'Enauac da ñachaalataxac 'am hueto'ot,

na 'oiguishec 'arhuaq qalaq nache 'eetai' da aỹem nasoqtañi.

₉Qaq nam ỹauotaique da aỹem ỹalauat

qalaq huañi qome, nache taigui na pa'aguiñi na 'alhua.

₁₀Namayepi qaỹalauat qome qairolec ca ỹeelonec,

nache na qa'alaqpi chec na lapat namayepi.

₁₁Qalaxaye ñi nta'a machiguiñi

da hueta'aguet Ñim Lo'onatac 'Enauacna,

qataq 'enauac na ỹanot da la'aqtac Ñim Lo'onatac 'Enauacna

nataqa'en ỹo'oxoren qome ñimaye.

Qaq na tenataxanaxaicpi qalaq qaỹapoguilo naua ala'api.