Mateo 11

₁Qaq So Jesús co'ollaq imat da ỹanema soua doce lapaxaguenataqa da lqataxac, nache ca'ai ye hueta'a, da yaqto' dapaxaguenataxan qataq da'aqtaxanem da no'on na'axaỹaxac na shiỹaxauapi maye hueta'alo naua lỹa't 'aleu' yi'iye qanayeuta'a 'alhua.

₂Qaq so Juan maye nachelaxanataxanaq netaigui aso ncoñetaxanaxaqui, somaye iviraua'a da ỹaỹaten 'enauac nam ỹo'otpi So Jesús, nache huo'oi soua ỹama'q som maiche lapaxaguenataqa da yaqto' ina't So Jesús, 'eeta':

₃¿Peta'a nache 'am maye 'am Lca'aguishec Ñim Lo'onatac 'Enauacna maye ỹachaxanapec co'ollaxa da qomi' namaxalo, huo'otaq seuataqaique ca lỹa?

₄Nache So Jesús 'enapeco':

–Qavi'iguelaqai, qaua'aqtaxañim ca Juan 'enauac nam qaua'aqaichigui qataq nam qauauañiichigui:

₆Ñim Lo'onatac 'Enauacna ỹaalec da nqouagaxa qome cam saishet da ỹaxanec Aỹem souaxat da ỹauaachigui de'era so'ottac.

₇Qaq co'ollaq mashe je'c soua lapaxaguenataqa so Juan, nache So Jesús cot da da'aqtaxanem so shiỹaxauapi da lataxac so Juan, 'eeta':

–¿Negue't som qaumeenaxañiitapeuga yem toolec 'alhua co'ollaxa? ¿Peta'a 'eeta'am aca coqta ỹacholaxaatac na la'at somaxa? ₈Qaq ¿negue't som qami' qaumeenaxañiitapeuga? ¿Peta'a ỹataqta no'o'n naua alogo somaxa? Qami' qauaỹaañi da na shiỹaxauapi maye ỹataqta no'o'n naua alogo, namayepi netaiguilo naua lma'ate na nta'alpi. ₉Qaq ¿chaq negue'to' som qami' qaumeenaxañiitapeuga? ¿Peta'a la'aqtaxanaxanec Ñim Lo'onatac 'Enauacna somaxa? Aja', ỹoqta 'eesa na'aqtaxanaxanec. Qaq ỹoqta 'eesa da so Juan somaye ỹataqta napacalec cam la'aqtaxanaxanec Ñim Lo'onatac 'Enauacna; ₁₀qaq so Juan nacheso som ỹa'axa't co'ollaxa naua ñiyigui'she la'aqtaqa Ñim Lo'onatac 'Enauacna, maye 'eeta':

₁₁Qaq ỹataqta 'eesa de'era shenapec da 'enauac nam shiỹaxauapi co'ollaxa da chegoqta'ague, choche ivitta'a nagui da qaica ca ishet da napacalec da la'amaqchec so Juan maye nachelaxanataxanaq. Qalaxaye nam ỹapactec da qaica ca la'amaqchec da huetaigui dam lo'onataxanaxac Ñim Lo'onatac 'Enauacna, nagui qataq dam taỹa'ague namayepi napacalec somaye.

₁₂Chegoqchiguiña co'ollaq so Juan maye nachelaxanataxanaq da da'aqtaxaatac, choche ivitta'a nagui, da de'era lo'onataxanaxac Ñim Lo'onatac 'Enauacna queta, na'aictaxa da huo'o na npa'aguenaxauapi. Nachaqnata nam shiỹaxauapi maye 'añaxaicpi qataq lhuotta nam ishet da taua'a da ỹalegueua'a da lo'onataxanaxac Ñimaye. ₁₃Ñim Lo'onatac 'Enauacna mashe ime da ỹa'axattac de'era nanettalec ana nere maye huetalec na la'aqtacpi Ñimaye dam taỹa'a da 'eetec da lviraxac so Juan maye nachelaxanataxanaq. ₁₄Da qaua'amaqchiñi qalqo' saishet, co'ollaq Ñim Lo'onatac 'Enauacna 'enapec da namaq ca la'aqtaxanaxanec Elías, nache 'eetega so Juan maye nachelaxanataxanaq. ₁₅Da ỹoqta 'eesa da huo'oi naua qartelai lauacolli' ¡qaq no'on da ỹataqta qana'axaỹaxañiichiguiñi!

₁₆Qami' maye qoviitaigui ne'ena na'a'q, qoñiita'am ca ñaqpiolec maye netaña ca nlagaqa', nache ỹa'alaqtega ca laỹepi ñaqpiolec 'eeta':

₁₈Cha'aye so Juan maye nachelaxanataxanaq, somaye nqouaqchettac, qaq qami' qalaq qoñiitega da huo'o ca netaigui saqcha'a na'añaxac leguemaxaic. ₁₉Ime, qataq ñevi' Aỹem Shiỹaxaua Llalec, qaq seque'etac, qataq ñeỹomtac, nache qami' qoñiitega da Aỹem quia'aqchaqaic, Aỹem taxaic, qataq ñauochaxaua nam ỹacootapeeguet ana nsheetenaqte ca nta'a. Qalaxaye qantooñita'ac da na'aqtac naxa maye, 'eeta': Ca naỹaanec da ỹoqta 'eesa da chegoqo'ot Ñim Lo'onatac 'Enauacna, camaye yo'oq cam chegaqaigui qataq ỹataqta no'on.

₂₀Nache So Jesús ỹataqta iviraxattega som netaña so nỹecpi maye huaña da ỹactec na ỹo'ot maye sa qaỹauanapega, cha'aye nam shiỹaxauapi maye netañalo naamaye, saishet da ỹaxaare'c naua no'onataxaco. Qaq ỹoqo'oye 'eeta':

₂₁«Qami' maye qarmaye ye Corazín ¡ỹataqta qauem da qa'aita'ague! ¡Nataqa'en qauem da qa'aita'ague qami' maye qarmaye ye Betsaida! Cha'aye nam netaña ye Tiro qataq ye Sidón, da huo'otaq huaña taxa nam qaỹo'otpi maye qami' qaỹachaxanalo, qaq sogotectaxa quesom yemayepi da ca'aisalo naua qauema lataxaco, qataq da nachaxaata da ỹaayiñi naua alogo maye qaica ca lya'c, qataq da imeelec na lqaic na alo da ỹachaxan da naralaxat da lhuennataxac. ₂₂Qaq ỹoqo'oye qami' shenapegalo da que'eca pa'atec na'a'q qom qaỹauo'o ca nhuaxanaguecna, nache qami' ỹataqta ỹactec ca qanhuaxanaguiiqui, saq 'ena'am nam netaña ye Tiro qataq ye Sidón.

₂₃Qataq qami' maye qarmaye ye Cafarnaúm, ¿qaupi'itaxañiitega peta'a da 'onaxaic da qarviraxaqui da qami' qaỹaconegueta da piguem? Qalaxaye Aỹem qami' shenapegalo da qami' qaỹamaxañalo qome ca ỹataqta qaỹoqchiguiña nhuaxanaqa' na leuaxaicpi. Cha'aye nam sa qaỹauanapega maye qaỹo'otpi maye qami' huanguilo da huaña taxa so Sodoma, nache somayepi naralaxat taxa da lataxac, nache se'eso nỹecpi taxa nagui ñaqauo'o. ₂₄Qaq Aỹem qami' shenapegalo da que'eca pa'atec na'a'q qom qaỹauo'o ca nhuaxanaguecna, nache qami' ỹataqta ỹactec ca qanhuaxanaguiiqui, qaq saq 'ena'am se'eso shiỹaxauapi maye netaña se'eso nỹecpi ye Sodoma.»

₂₅Nache se'eso na'a'q So Jesús ỹauo'o so la'aqtac ỹanot Ñim Lo'onatac 'Enauacna, 'eeta':

«¡'Am Ita'a, maye 'aulotague' na piguem qataq ana 'alhua! 'Am sanot da ña'achec, cha'aye saishet da 'auachaxana de'era na huattonaxanaxaicpi qataq na ỹaanaxanaxaicpi. Nachaqrata da 'auachaxana na shiỹaxauapi maye qaica ca la'amaqchec qataq huesota. ₂₆Aja', 'am Ita'a, cha'aye nachera dam maiche 'arhuennataxac.»

₂₇Ime, nache 'enapega som hueta'a yi'iye, 'eeta':

«Ñim Ita'a Aỹem imato'ot 'enauac da lo'onataxanaxac qataq nachaqaỹemta da Aỹem ỹauatton, cha'aye Aỹem Llalec. Qaq qaica ca ishet da ỹauattoota Ñim Ita'a da 'eeta'am Aỹem. Ỹoqo'oye sauotaique da sa'aqtaxanem ca lỹa shiỹaxaua da sa'axat ñi Ita'a, yaqto' nataqa'en camaye ishet da ỹauatton Ñimaye.

₂₈Qami' maye nache 'eetai' da qoviitaigui da qarhuogoqoi, qataq da qarachetataiqui. Qauanaiua'a Aỹem yaqto' qami' ñimataxaare'c. ₂₉Qaualaqaiguet na ỹamaxasoxonaxacpi qataq qavi'inaxache Aỹem, cha'aye Aỹem hualaxauaic qataq ỹataqta 'eesa da saishet da llateela't. Da nache qoñiitec de'era nache ishet da qauanachiỹa ca qanmataxaqui. ₃₀Qaq de'era maye qami' sacheleguete, damaye saishet da alaq da qaipaqueelec qataq na qaya'aqui maye qami' sacheleguete da qauache, namaye saishet da desalli.»