Ñim Nataxala' qaltaq ichoxoren qome na Israel le'ecpi
1Qaq ỹoqta 'eesa da Ñim Nataxala' qaltaq ichoxoren qome so Jacob, qataq ỹe'eguelaxa qome da lca'aguishec so Israel, qaq huaña nache ỹo'ot da na Israel le'ecpi qaltaq ỹe'eguelaxa da nalec ye maiche na'alhua. Nache cam chegaqauec shiỹaxauapi anac qome da naỹa namayepi, nache huaxaiguet na llalaqpi so Jacob. 2Nache qalota qome cam ỹotta'a't shiỹaxauapi cam ỹaconeguet qome na Israel le'ecpi, nache nnaicapegue' camayepi nache iviraxatta'a ye maiche na'alhua, nache na Israel le'ecpi ỹauo'o l-latacpi camayepi qom huaña ye na'alhua Ñim Nataxala'. Qataq na Israel le'ecpi icoñi' qome nam hua'auñi da icoñettai' co'ollaxa namayepi, qataq maiche ỹoiqueetac nam saiyacnapec co'ollaxa namayepi.
3Qami' Israel le'ecpi, qom ivita ca na'a'q da Ñim Nataxala' qami' nmataxaneguesopa da qanque'eenaxaqui, dam qaraquicoqoi qataq da ỹataqta qauem qanlataguiiqui maye qami' qoỹanegueta co'ollaxa, 4nache qanlamaxareñi qome da qanasaqairec ne'enaua na'aqtaqa, da yaqto' qavi'iñiitac ñi nta'a ye Babilonia, nache qoñiita':
«¡Ña qaumiiñi dam ivireguet ñim qaica ca iren!
¡Ña qauloỹa dam ivireguet naqa'en da ño'oxonnaxac!
5Ñim Nataxala' ilaxachigui da la'añaxac ñim qauemaic,
qataq ỹacagaxachigui so npon ñim qaica ca iren,
6ñim irolec naxa da nnogoxonaxac
da iuaxaatac nam ỹotta'a't shiỹaxauapi,
qataq saishet naxa da vi'iiguet da iuaxaatac namayepi,
qataq souaxat da layeloxo nache petapigui na nhuo' le'ecpi,
qataq sa ichoxoreetac da icaatac namayepi.
7Qaq 'enauac ana 'alhua huo'o da nlagaxayec qataq da ñe'emaxa,
nache do'onaxaatai' souaxat da ntonaxac.
8Qaq ivira'a ana qo'oipaq piinopi
qataq ana cedropi maye huaña ye Líbano,
ỹataqta ntootapeguec da 'am qailaxachigui,
nache 'eeta': ‹Chegoqta'a co'ollaq qouañi,
nache qaica ca anac da qomi' iqueso'q›.
9Nam pa'aguiñi qalaq ỹe'elaxa't na leuaxaicpi,
nache nnoxoosheguem da 'am ca'atta'aguet.
Na lpaqal na leuaxaicpi qalaq nlouec,
nam nataxala'pi co'ollaxa ana 'alhua
qalaq ñesheguem da 'am ca'atta'aguet,
qataq 'enauac nam lta'alpi co'ollaxa na nhuo' le'ecpi
ñesheguem ca'ai ana nso'onaxaquipi.
10Nache 'enauac detaqa, 'eeta': ‹Qache nataqa'en 'am da deqat so 'ara'añaxac,
nache 'avira'a da qoneta'ama qomi'.
11Qaq nache huaña ne'ena da imeuo da 'año'oxonnaxac,
qataq da l-lamaxa aso 'arviquepi arpa,
qataq 'armala' na qoche'l, qataq 'am ỹapolec namayepi 'eeta'am ca 'arpo'.›
12¡Ca 'eeteco' da 'auanaañi da 'auachegoqtot na piguem,
'am chi'ishe maye 'am yo'oxoñi lalaqte!
'Am maye 'anauectalec naxa na ỹotta'a't shiỹaxauapi,
'am qaỹanataqcheelec ana 'alhua.
13'Am maye naxa da 'auennataxaatac nache qoneta':
‹Aỹem sasheguema qome na piguem,
nache sanalec aca ñeso'onaxaqui ana huaqaañipi
maye lalamaqte Ñim Lo'onatac 'Enauacna,
nache aỹem qaỹoqta qome da ñeso'ooñi
soota'ague da sheu' añim qasoxonaxa
maye hueta'a naxa da dataỹa't nam atamnaxala'pi.
14Qataq sasheguema na pa'asheguem
na ỹataqta qaỹoqotcheguemec lo'oc na piguem,
nache sheeta'am qome Ñim Lo'onatac 'Enauacna
maye ỹataqta qaỹoqotcheguemec.›
15¡Qalaxaye nagui 'am qaỹamaxauec
nache 'angui añi huachiqui, añim nshere
maye ỹataqta qaỹoqchiguingui!
16Nam 'am ỹauaachigui qalaq vi'iiguet da 'am imeteetac,
qataq 'am ilochigui nache, 'eeta': ‹¿Nacheñi peta'a ñi'iñi,
ñim ỹale maye ỹo'ot naxa caillaye da cholaxan ana 'alhua,
qataq ilaxachigui naxa na ỹotta'a't shiỹaxauapi,
17qataq ỹo'otec naxa da toolec ana 'alhua,
qataq ilaxachigui naxa na huaqta'a't nỹecpi,
qataq saishet da isouec na lcoñeteguishecpi?›
18Qaq 'enauac na lta'alpi nam ỹotta'a't shiỹaxauapi,
huo'o da llo'oxoyec naxa da nmatec,
ñi 'oonolec qalaq huo'o añi maiche laỹe'
19'am qalaq qaỹoqta qanqa'en aca huachiqui ca 'am qaỹasaxaña,
nache qoneta'am ca lasogoñi maye qaiqaiga,
qataq ca leuaxaic maye qaỹapetapigui
da ỹalectaigui ca nalaatacpi maye qaipelecot na lqosot,
qataq qaỹasaxangui aca qaỹoqchiguingui
nshere maye nlaqchigui na coma'.
20Nache saishet da qoneta'am na laỹepi nta'alpi qom 'am qailareñi,
cha'aye 'anlaxaañi co'ollaxa na 'ana'alhua
qataq 'aualauat som shiỹaxauapi maye 'arhuo' le'ecpi,
qaq huaña qome nache qaica ca ỹe'eguelaxa da iuennatega
nam chegoxoguetpi nam qauemaicpi.
21Qanaỹamaxache da qaualauache na ñalaqpi,
souaxat da lalaataxanaxac som lta'alpi namayepi,
yaqto' saishet da qaltaq iuennatega da ilo'ogue ana 'alhua,
qataq da nlaxattelec ana 'alhua nam huaqta'a't nỹecpi.»
22Ñim Nataxala' maye Qaica ca Ỹaqalanapec, 'eeta':
«Aỹem ñachaañi qome da sataỹa'aguet namayepi,
nache imeuo ñaqa'en da le'enaxat ye Babilonia,
qaq cam no'onalec qome yemaye,
qalaq cañe' ca llalaqpi qataq laualpi.
23Nache nañigui ñaqa'en ca nshaxa maye deshe,
qataq nlaxalec qome aca chiyetpi,
qataq sequeloc serolec aca nquelogaxanaqte qom selaxachigui.»
Qaq 'era da la'aqtac Ñim Nataxala' maye Qaica ca Ỹaqalanapec.
Ye Asiria taỹa'a da qanlaxaañi
24Ñim Nataxala' maye Qaica ca Ỹaqalanapec ỹan da la'aqtac, 'eeta':
«Nam seuennatega co'ollaxa qalaq huo'o qome,
qataq nam llapaxañi co'ollaxa qalaq ipacchigui da huo'o qome.
25Qaq sauo'o qome ca nque'eenaxac
na asiiriopi maye netalec na ña'alhua,
qataq hualec ana ñeqasoxonaxapi da dapaxañi ñaqa'en,
huaña nache ñeqat dam qapa'atta
maye ỹachelec nam ỹalamaxat nhuo' le'ecpi,
nache namayepi saishet qome da qaltaq ỹe'eguelaxa da npeetague' damaye.
26Qaq 'era da iuennataxac maye dataỹa'aguet
'enauac na huetalec ana 'alhua, qataq 'ena na ihuaq
maye dataỹa'aguet qome 'enauac na ỹotta'a't shiỹaxauapi.»
27Ñim Nataxala' maye Qaica ca Ỹaqalanapec
mashe lhuennataxac de'era, nache qaica ca ishet da dataỹa'aguet.
Na lhuaq mashe huo'o da larenaxanaxac,
nache qaica ca ishet da naralaxat da lhuennataxac Ñimaye.
Qaỹa'axata'a dam talec qome na Filistea le'ecpi
28Qaq so vi'i maye huaigui da ileu so nta'a Ajaz, nache so Isaías ỹa'axat de'era na'aqtac maye, 'eeta':
29Qami' Filistea le'ecpi saishet qome da qantoñiitapigui',
da qoñeetega mashe huacaigui so pon maye qami'
qairotegalo naxa da qami' qaiuaxaata'ape,
cha'aye yem chegoqchiguiña so na'araxanaq,
nache chegoqchiguiña qome ca lỹa na'araxanaq,
qaq camaye ỹactec qome, cha'aye camaye huaỹo qome.
30Aca lalo qaguetapi na choxoraqpi
qalaq huo'o qome ca aloq 'auaqpi da netalec na ño'onaxa,
qataq nam shiỹaxauapi maye qaica ca ntaunaguec,
qalaq mata qome da nmataxac.
Qaq Aỹem qalaq so'otec qome da ilem na lqouaxa nam 'aỹa'alaqpi,
qataq salauat cam saq 'amaqtaq maye no'onañi namayepi.
31¡Qanỹeñi qome qami' Filistea le'ecpi,
qaua'alqai qome souaxat da qanqui'iqui,
qataq qaviloxolli qome souaxat da qarcolanqai!
Cha'aye da sheu' chegoqtegue na alleppi
'eeta'am ca napalñi lmala'q, nache namayepi
qaica da 'oonolec ỹale ca huaỹoxouec.
32Qaq ¿negue'tom cam nasataxac cam qoỹanem qome
nam namaxashecpi maye chegaqa'a yi'iye 'alhua?
Ye Ñim Nataxala' nacheñi ñi ỹa'ayiñi ye Sión,
qaq nacheye ye lle'eguenaqa' qome,
nam lalamaxatpi Ñimaye nam huo'o da laquicoxo.
