1Ñim Nataxala' aỹem 'enapega, nache 'eeta': 2«'Am shiỹaxaua 'aua'axata'a dam talec qome na qagueta lo'opi ye Israel, qoneta': Da la'aqtac Ñim Nataxala', 'eeta': ¡Choxoraxaso' na qagueta lo'opi ye Israel maye maiche ntelteguela't! Qaq anam iuen da ilo'ogue taxa na qagueta lo'opi, nachana ana qaguetapi: 3Qami' qanỹomiitapigui na lche' ana qaguetapi, qataq qauachegoxochiỹaigui na laue anamayepi da qauo'oche na qo'ogoxoche, qataq qaualauache ana ỹataqta chaxarai ana qaguetapi, qalaxaye saishet da qanchelỹa'a anamayepi. 4Qami' saishet da qautauañi ana qaguetapi maye qaica ca la'añaxac, qataq sa qanatareñi anam sa no'onpi, qataq saishet da qauauoi ca laxataxat na lacagaxa ana huacac na lapia', qataq saishet da qaupacỹapegue' ana dasheuec, qataq saishet da qanmichiỹaique ana deqat, nacherata da saishet da qauchiyiitac qataq sa qanỹeñi anamayepi. 5Ana ỹalamaqtepi qaguetapi qalaq qaica ca ilotague', nache nlagaxattac, nache chec na huauec shiguiỹacpi. 6Anamayepi laguelec 'enauac ana qasoxonaxapi, qataq ana qaỹoqotcheguemec lcomaraxalatepi, laguelec 'enauac ana 'alhua, nache qaica ca qochetega da nmittaique. 7Qaq ỹoqo'oye qami' qagueta lo'opi, ñaq qana'axaỹaxañiichiguilo naua ỹa'aqtaqa. 8Aỹem Nataxala', maiche ñañan da san da ỹa'aqtac maye 'eeta': Na ỹotta'a't shiguiỹacpi maye dequi'iỹapec, decachiỹa qataq chec ana ỹalamaqte qaguetapi, cha'aye qaica ca ilo'ogue anamayepi. Na qagueta lo'opi maye sepataxaguet co'ollaxa, saishet da nmitaique ana qaguetapi. Namayepi maiche ntelteguela't, qaq saishet da ntela'a ana ilo qaguetapi. 9Qaq ỹoqo'oye qami' qagueta lo'opi ñaq qana'axaỹaxañiỹalo naua ỹa'aqtaqa 10maye qami' sanema: Qami' qagueta lo'opi, Aỹem ñechoxot da qami' ñepa'aguenaxau', nache qami' seỹaxanoto da Aỹem qañe'eguelaxachem ana ilopi qagueta, nache qami' ñeqateeguesopa da qauloitague' anamayepi, yaqto' saishet da queta da maiche qantelleetapeguela't, seuotaxanec qome ana ilopi qagueta, yaqto' saishet da queta da qollequiitac.
11Aỹem Nataxala', shenapec: Aỹem maiche souapegue' qome da selo'ogue ana ilopi qaguetapi. 12Qaq sheeta'am qome ca qagueta lo'o da huo'o da lhuogoxo da laga't aca lalo qaguetapi, qaq 'era da sheetec qome da huo'o da iuogoxo da selo'ogue ana ilopi qaguetapi, ñe'eguelaxat qome sachegoxotchiguiña cam huaña co'ollaq deqat, huaigui som napalñi na'a'q souaxat so la'at. 13Aỹem ñeqateeguesop qome nam ỹaqa'a 'alhuapi, qataq llaỹona't, nache sauega ye maiche lalamaxat na'alhua. Qataq sauega qome aye qasoxonaxapi ye Israel da yaqto' sequia'axan, qataq ye la'auaxacpi, qataq 'enauac yem nma'pi maye qanayeetaña yi'iye 'alhua. 14Nache sauega da chec na ỹataqta no'on 'auaqpi, nam 'auaqpi maye hualec aye qaỹoqotcheguemec qasoxonaxapi ye Israel. Qaq huaña yemaye nache ishet da nmatec qataq chec na ỹataqta no'on 'auaqpi. 15Qaq nache Aỹem da seuattague' qome ana ilopi qaguetapi, qataq maiche Aỹem qome da ñemataxanaxanec. Qaq 'era da ỹa'aqtac Aỹem Nataxala'. 16Ñimitaique qome ana qaguetapi maye deqat, qataq ñe'eguelaxateuo ana laga't co'ollaxa, qataq sauo'o ca laxataxat na huacac lapia', qataq setauan qome ana mashe qaica ca la'añaxac, qalaxaye selaxachigui qome ana chaxaraipi qataq no'oitapi. Aỹem ỹataqta saỹamaxatchiguiñi da lataxac qom selo'ogue anamayepi. 17Qaq Aỹem Nataxala', shenapec: Ñaq Aỹem qana'axaỹaxañiỹa qami' ilopi qaguetapi: Aỹem serolec qome da nalochiguiñi lataxac da ñimit na qagueta llalaqpi, qataq na quetaq llalaqpi. 18Qami' qalavilỹa da qolliquiitac na no'on 'auaqpi, qalaxaye nataqa'en qauapigui nam no'onañi 'auaqpi. Qataq qalavilỹa da qanỹomigui na chañi 'etaxat, qalaxaye nataqa'en qaumalaxache, qaroita'alo naua qarapia'achilli'. 19Qaq ana ilopi qaguetapi qalaq chectac na 'auaqpi maye qauapiitapigui, qataq nỹomtapigui na 'etaxat maye qaumalaxache. 20Qaq ỹoqo'oye Aỹem Nataxala', shenapec: Aỹem serolec qome da nalochiguiñi lataxac da ñimit ana chaxaraipi qaguetapi, qataq ana ỹapo'ota. 21Cha'aye qami' qaumaqỹauec ana qaica ca la'añaxac, qataq qauquetogoqoitapigui nache datauec qanqa'eñi. 22Qalaxaye Aỹem ñeca'alaxatec qome ana ilopi qaguetapi. Nache saishet da sa'aqta'a da queta da qaucacheetega. Aỹem serolec qome da nalochiguiñi lataxac da ñimit ana qaguetapi. 23Aỹem so'ot qome da ñe'eguelaq so ỹamaxashec David, nache sanem da nachesota da ilo'ogue ana ilopi qaguetapi, qaq somaye nacheso qome so ilo'ogue anamayepi. 24Qaq Aỹem Nataxala' nachaỹem qome da Aỹem Natamnaxala', qaq so ỹamaxashec David qalaq nacheso so lataxala'. Qaq 'era da ỹa'aqtac Aỹem Nataxala'. 25Qaq sauo'o qome ca ñaỹamaxataxac da ñaỹamaxate' anamayepi, yaqto' ỹe'emaqtac anamayepi. Qataq imeuo ñaqa'en na huauec shiguiỹacpi ne'ena 'alhua, yaqto' ana ilopi qaguetapi ỹe'emaqtac da coleeteguelec na no'onaxa, qataq da huetaigui na aviaq da do'ocheta. 26Ana ilopi qaguetapi sanaña qome na loigue añi qui'itta ñeqasoxonaxa, nache saalec da na'achecỹaxac, qataq ñamaxa ca auot da ivita ye laloxoqui. 27Nache ana qo'oipaqpi maye netalec na no'onaxa, huo'o qome aca alapi, qataq na 'alhua qanqat qome na ala na nañiguishecpi, nache anamayepi ỹe'emaqtac qom hueta'a ye maiche na'alhua. Qaq nam ỹalamaxat nhuo' le'ecpi qom ivita da sesoueeguesop nam icoñettai' namayepi, nache huaña da ỹaỹaten da Aỹem nachaỹem Nataxala'. 28Qaq nam chegaqauec nhuo' le'ecpi, saishet qome da qaltaq ỹe'eguelaxa da icoñettai' namayepi, qataq na shiguiỹacpi saishet qome da qaltaq ỹe'eguelaxa da chec namayepi. Qaq namayepi ỹataqta ỹe'emaqtac qome saishet da huo'o ca iquichoqchettac. 29Na lanaxanaqa'pi qome qalaq ỹataqta no'on na huetalec lañiguishec, nache namayepi saishet da qaltaq ỹe'eguelaxa da nque'etaxangui na lqouaxa, qataq na laỹepi ỹotta'a't shiỹaxauapi saishet qome da ỹe'eguelaxa da ỹe'eetac namayepi. 30Qaq huaña qome nache ỹaỹaten da Aỹem Nataxala' maye Natamnaxala', soota'aguet namayepi. Qataq na nhuo' Israel le'ecpi namayepi ỹalamaxat. Qaq 'era da ỹa'aqtac Aỹem Nataxala'. 31Qami' qaguetapi nache qami' ỹalamaqtepi, qataq qoñeetaigui na iquia'axanataxanaqa'. Aỹem nachaỹem Qanatamnaxala'ai. Qaq 'era da ỹa'aqtac Aỹem Nataxala'.»
