2 Reyes 20

₁Qaq se'esoua na'axa'te so Ezequías ỹataqta dalola co'ollaxa, qataq mashe yaqta'a da ileu, nache so na'aqtaxanaxanec Isaías, maye llalec so Amós, nqo'ona somaye. Nache 'enapega, 'eeta':

Da la'aqtac Ñim Nataxala', 'eeta': Ñaq 'aỹa'anem qome ca pa'atec 'arqataxac na 'aỹa'alaqpi, cha'aye 'am, saishet da 'am no'oita qome, nacherata da 'aỹa'a da 'aleu.

₂Huaña, nache so Ezequías, dataỹot so lque so nỹec, nache nqouagaxaunot Ñim Nataxala', 'eeta': ₃«'Am Nataxala', 'am ñachoxonnot, da 'antoueeta'ac qome da ỹataqta 'am salaxaguet co'ollaxa, qataq ỹataqta imauec da iquiyaqteỹaxac da so'ot nam 'auaỹamaxareeta.»

Nache so Ezequías ỹataqta lta'araic da nnoinaxac souaxat da laquicoxo. ₄Nache so Isaías, co'ollaq ñaq saxanaxa da iviraxatec so nqasoxoc so nma' lta'araic, nache Ñim Nataxala' 'enapego' so Isaías, 'eeta': ₅«Ñaq 'avi'eguelaxauo, nache qonapega ñi Ezequías maye lataxala' ne'ena ỹalamaxat nhuo' le'ecpi, nache qoneta': Ñim Nataxala' maye Natamnaxala' som hua'au 'arta'a David, 'eeta': ‹Aỹem sa'aqchigui so 'anatamnaxac qataq sauaachiguilo naua 'arache'. Qaq nagui 'am ñataren, ỹoqo'oye qom inoxoorec caua tres na'axa'te, nache ishet qome da 'anqo'oneua'a añi atamnaxaqui maye lalamaqte Ñim Nataxala'. ₆Qataq 'am sanema caua lỹa't quince vi'iye da 'anachaalataxac. Nache 'am qataq na Jerusalén, qami' ñeca'alaxateeguesopa da la'añaxac da lhuaqỹaxac ñi nta'a ye Asiria. Qaq Aỹem nache ñepaxattalec qome ne'ena huaqta'a't nỹecpi, souaxat da ỹauoche so ỹamaxashec David, qataq da sheeta.›» ₇Nache so Isaías, damaxasoxoolec da qailaxachigui aso higopi. Ime, nache qaỹa'ameelec som vichiguiiña so lhuetac so nta'a, nache no'oita. ₈Nache so Ezequías, inat co'ollaxa so Isaías, 'eeta':

¿Ca 'eeteco' qome da sauatton ca la'anec Ñim Nataxala' da aỹem no'oita naqa'en, qataq da ivita caua tres na'axa'te, nache ishet da ñeqo'oneua'a añi atamnaxaqui maye lalamaqte Ñim Nataxala'? ₉Nache so Isaías 'enapeco':

Qomye 'era qome da la'anaxat da 'auaỹaten da ỹoqta 'eesa Ñim Nataxala', da ipacchigui qome da la'aqtac, 'eeta': ¿Peta'a 'auauotaique da diez grado da hua'au na lpaqal añi nala', huo'otaq da diez grado da ñe'eguelaq na lpaqal añimaye? ₁₀Nache so Ezequías 'enapeco':

Qalaxaye qaica ca lqalaic da hua'au qanqa'en na lpaqal añi nala', qalaxaye da qaỹe'eguelaxata da nca'ataxaatauo qanqa'en, nache huo'o da lqalaic. ₁₁Huaña nache so na'aqtaxanaxanec Isaías, iỹaxanot Ñim Nataxala', nache Ñim Nataxala' iqoshaxan so diez grado so lpaqal añi nala', maye huichiguiña so lpaqal co'ollaq qailota'aguet so laloqnaxat añi nala' maye lalamaxat so Ajaz.

₁₂Qaq se'esoua na'axa'te, nache so nta'a Merodac Baladán som llalec so Baladán, maye nta'a ye Babilonia, la'axaỹaxac co'ollaxa da dalola so Ezequías. Nache ỹamaq so lamaxashecpi da ỹamaxa aso lere qataq so lachetaqtaxanaxatpi. ₁₃Nache so Ezequías, qoche'eguet co'ollaxa somayepi nache ỹachaxana 'enauac so lma', qataq aso laỹamaqtaxanaxaqui, qataq na plata, oro, ncoraxatpi, qataq so ỹataqta no'on aceite, qataq so laỹe' so lo'ogoxonaxatpi. Nache ỹataqta qaica ca sa ỹachaxan 'enauac se'eso nma' lta'araic, qataq som ilotague'pi somaye. ₁₄Huaña nache so na'aqtaxanaxanec Isaías, nqo'oneua'a so nta'a Ezequías. Nache inat co'ollaxa, 'eeta':

¿Hua'ague ca chegaqa'ague se'eso ỹalleppi, qataq ca 'eetec ca la'aqtac?

Nache so Ezequías 'enapeco':

Qomye chegoqta'a ye qaỹoqta 'alhua, le'enaxat Babilonia. ₁₅Nache so Isaías, qaltaq inat somaye, 'eeta':

Qaq ¿imeteetac co'ollaxa ne'ena 'arma' lta'araic? Nache so Ezequías 'enapeco':

Imeteetac 'enauac nam huetaiguipi namaye, qaq ỹataqta qaica cam sasachaxana 'enauac nam huetaiguipi nam ỹaỹamaqtaxanaxaquipi. ₁₆Nache so Isaías, 'enapego' so Ezequías, 'eeta':

Ñaq 'ana'axaỹaxana da la'aqtac Ñim Nataxala', 'eeta': ₁₇Natrauo caua na'axa'te maye huaiguilo qome da 'enauac nam huetaigui na 'arma' lta'araic, qataq 'enauac nam ỹataqta ỹaỹamaxattac co'ollaxa so 'arta'alpi, choche ivitta'a nagui, namayepi qairo'ogue qome da Babilonia. Qaq nache ỹataqta qaica qome ca no'onañi. ₁₈Qataq ne'ena 'am chegoxoguetpi, huo'o qome cam qaỹaueegue da Babilonia, nache qanqa't qome naua lola, nache choche namaxashecpi da hueta'a ca lma' lta'araic ca nta'a ye Babilonia. ₁₉Nache so Ezequías, 'enapega co'ollaxa so Isaías, 'eeta': De'era la'aqtac Ñim Nataxala' maye aỹem 'anda'a, damaye ỹaỹamaqchiguiñi. Cha'aye somaye deuennataxaatac co'ollaxa, 'eeta':

«Nalotañi, cha'aye qom ñaq ñeca'altauec qalaq huo'o da nlagaxayec qataq qaica ca machaqca.»

₂₀Qaq nam laỹepi na'aqtaguecpi so Ezequías, qataq da la'añaxac co'ollaq deloctac, qataq da 'eetec co'ollaq ỹo'ot aso 'etaxat laỹe', qataq so llec na 'etaxat da yaqto' taỹaua'a naqa'en so huaqta'a't nỹecpi ye Jerusalén, nache nanettalec aso nere maye huetalec da na'aqtaguec so nta'alpi ye Judá. ₂₁Qaq co'ollaq ileu so Ezequías, nache qaỹalecnoigui so hua'au lta'alpi, qaq da lo'onataxanaxac da nta'a, nache talec so llalec Manasés.