1Saishet da qara'aqtac de'era da sauoqtaique da maiche ño'oxonnaqtapeguela't. Nataqa'en saishet da seuenaq da sanaxauo aca nere da huetalec ca no'on qana'aqtaguec, qataq saishet da qami' seỹaxanaqoto da qauauo'oi aca qorerei da yaqto' da huo'o ca seviraxague, nache sanaxauo. Huo'o na iuen de'era, qalaxaye qomi' saishet da seuenaq. 2-3'Enauac ishet da qaila'a dam no'on maye ỹo'otec da qanachaalataxaqui So Cristo. Qaq na shiỹaxauapi da yaqto' no'on naqa'en ca qana'aqtaguec, nache namayepi nachaqrata da qami' iloleguete. Cha'aye qami' qoñiita'am aca nere maye qomi' ỹa'axat. So Cristo nacheso so ỹereleguete naua qarquiyaqtel da yaqto' sachaxanaq. Qaq saishet da ỹerelec ca coma' huo'otaq da qoỹeraxana ca yo'oqchigui neraxanaxat, chaqrata da chegoqchigui So Saqcha'a La'añaxac Ñim Lo'onatac 'Enauacna maye nca'altauec. Qaq asa'aso nere ỹataqta ỹaatec da yaqto' ishet da camachaqca ca itaxaỹaxan.
4Qaq chegoqchigui So Cristo da Ñim Lo'onatac 'Enauacna ỹataqta 'eesa naqa'en 'enauac de'era. 5Qalaxaye qomi' qaica ca maiche qaralamaxat qaraỹaanataxanaxac da maiche so'otaxac da shenaqta; Ñim Lo'onatac 'Enauacna maye nacheñi, Ñim qomi' ỹanema da qaraỹaanec da huo'o ca so'otaq. 6Qaq nagui Ñim Lo'onatac 'Enauacna qomi' ỹapaxague'n da yaqto' sa'axataq de'era dalaxaic qanaỹamaxataxac maye chegoqo'ot Ñimaye. De'era dalaxaic aỹamaxataxac saishet da na'attalec na namaxasoxonaxacpi, chaqrata da na'attalec So Saqcha'a La'añaxac Ñim Lo'onatac 'Enauacna. Cha'aye na namaxasoxonaxacpi, ỹaueeguet da nalaataguec ca huo'o ca lasouaxashet, qalaxaye So Saqcha'a La'añaxac Ñim Lo'onatac 'Enauacna, ỹaueeguet da lca'alaxa ca shiỹaxaua.
7-9Ñim Lo'onatac 'Enauacna ỹettaleguete co'ollaxa soua coma' ne'ena namaxasoxonaxacpi, nache ỹami' co'ollaxa so Moisés. Qaq se'eso na'a'q ỹataqta lta'araic da llo'oxoyec ivira'a na lashec so Moisés da ỹataqta qashelectapiguiñi. Qaq ỹoqo'oye na Israel le'ecpi saishet da ỹamataigui na lashec so Moisés. Qalaxaye se'eso ne'eraxa nquictañi co'ollaxa, ivitta'a da 'om. Qaq da huo'otaq huo'o da llo'oxoyec se'eso namaxasoxonaxacpi co'ollaq qoỹan, ¡qaq taloxocheyectoxo' da saq ỹactec da llo'oxoyec da qaỹa'axat da no'on na'axaỹaxac maye chegaqaigui da nca'alaxa! Cha'aye se'eso namaxasoxonaxacpi ỹa'axat da saỹaqa'a da seleuaq souaxat naua qarasouaxashe'ete. Qalaxaye huo'o da qana'achec souaxat da qomi' ỹo'oteque So Saqcha'a Na'añaxac Qui'itta da Ñim Lo'onatac 'Enauacna ỹa'axat da qaica ca qarasouaxashet. 10¡Qaq damaye ỹoqta ỹactec da llo'oxoyec, saq 'ena'am dam ỹo'ot na namaxasoxonaxacpi! 11Qaq ỹoqo'oye da huo'o da llo'oxoyec co'ollaxa nam namaxasoxonaxacpi maye taỹa'a da nlaguiñi, qaq ỹactec qone' da llo'oxoyec da no'on na'axaỹaxac maye ỹa'axat da nca'alaxa maye chochaq tatec.
12Qaq de'era ỹataqta saỹaanaqta, ỹoqo'oye huo'o da qanaquitaxac, qataq saishet da huo'o ca sho'oqtaique da sa'aqtaxanaqtac. 13Qaq saishet da shenaqta'am so Moisés da ỹauo'o so lapoxot na lashec da yaqto' na Israel le'ecpi saishet da ila'a na le'eraxa na lashec da nquictañi. 14Somayepi saishet da ivira da ỹaỹateeteguet. Ỹoqo'oye choche ivitta'a nagui da itaxaỹaxan na lereguishecpi so Moisés, nache saishet da ỹaỹaten. 'Eeta'am da qaỹapotalec da ntoonaxac. Nachaqsota So Cristo da ishet da itaunec da yaqto' ishet da ỹaỹaten. 15Qaq ñaq 'eetalec nagui da ivita da qaitaxaỹaxan anam lereguishepi so Moisés, nache huo'o so 'eco' napoxonaxat maye ỹapotalec da nauattonaxanaxac. 16Qalaxaye da huo'o ñi ntouen qataq iỹaxanot Ñim Nataxala' da ichoxoren, nache huaña da ishet da ỹaỹaten. 'Eeta'am da qanqat so lapoxot da ntoonaxac. 17-18Cha'aye So Qarataxala' qataq So Saqcha'a Na'añaxac 'oonolec da lataxac, qaq ỹoqo'oye cam hueta'ague So Saqcha'a La'añaxac So Qarataxala', nache qaica ca saq huesochiguiñi. Qaq qomi' mashe qaica som lapoxot na qarashec, nache shenaqta'am aca tannaxai da lqashelgaxa da sachaxanaq da llo'oxoyec Ñim Qarataxala' maye naralaxat da qanachaalataxac. Qaq huo'o da qana'achec souaxat da qomi' ỹo'oteque So Saqcha'a Na'añaxac da ñequigaqta'aguet naqa'en da shenaqta'am Somaye.
