1Qaq da hua'auchiguiñi iqataxac 'eeta': Ñeshetaique da qoqueto'ot da 'anqouagaxaueetalec 'enauac na shiỹaxauapi ana 'alhua, qataq 'aatacot da 'ana'achecỹaxac Ñim Lo'onatac 'Enauacna souaxat 'enauac nam 'am ỹo'otec qataq 'aỹaxanot da 'am ỹachaxana da lqouagaxanaqtaic qataq da 'am itaua'n. 2Nataqa'en 'am seqata da 'anqouagaxaueetalec na nta'alpi maye 'amaqtaqaicpi qataq 'enauac na ltauapi, yaqto' selagaqtapiguiñi qataq qaica ca da. Nachaqrata da ỹataqta salaxasoxoguet Ñim Lo'onatac 'Enauacna, qataq ỹataqta no'on da qarataxac da salegaqtaigui na laỹepi shiỹaxauapi. 3Qaq de'era qouagaxaunaxac, nachera da ỹataqta ỹaỹamaqchiguiñi qataq laỹamaxannatac Ñim Lo'onatac 'Enauacna maye Qarca'alaxaqui, 4cha'aye Ñimaye nshetaique da 'enauac nca'alec na shiỹaxauapi, qataq ivira'a da ỹaỹateeta da:
5'Oonolec Ñim Lo'onatac 'Enauacna,
qataq nataqa'en 'oonolec so chegoqchigui da ishet da
qomi' ỹaueegueta da selagaqtapiguiñi da souaqto'ot Ñim Lo'onatac 'Enauacna:
Somaye nacheso So Jesucristo, maye shiỹaxaua.
6So Jesús ỹan co'ollaxa da lalamaxat nachaalataxac
da yaqto' nca'alaxatec 'enauac na shiỹaxauapi ana 'alhua.
Qaq nache chegoqchiguiña,
da Ñim Lo'onatac 'Enauacna qomi' ỹachaxanalo
da huotaique da nca'alaxatec 'enauac na shiỹaxauapi.
7Ỹoqo'oye Ñim Lo'onatac 'Enauacna aỹem ỹamaq da sa'axatem nam saishet da judiopi de'era no'on na'axaỹaxac. Qaq aỹem sapaxaguenec namayepi da ỹataqta 'eesa qataq dam naigui da qaipi'iỹa'a Ñim Lo'onatac 'Enauacna. ¡De'era ỹa'aqtaxanaxac ỹataqta 'eesa, saishet da satenataxaatac!
8Ỹoqo'oye sauotaique da na ỹalleppi maye do'onaxaatac, da ivita da nqouagaxauen qalaq ỹachaxaato'oto naua lhua'q Ñim Lo'onatac 'Enauacna qataq ỹaxaañi da ncotatega't qataq da nnota'a't. 9Nataqa'en sauotaique da na 'alpi maye 'amqaanataxanaxaipi da ỹataqta ỹaỹamaxatta da no'otaxac, qataq ỹaỹaten da ntel-la't, saishet da ño'oxonnaxai. Yaqto' da no'otaxat nachera da ỹaỹamaqchiguiñi lataxac. Saishet da nachera da yo'oqchigui da huo'otaq ỹo'ot na laue, huo'otaq ca 'otaxat chegaqaigui na oro huo'otaq perla, huo'otaq ỹauo'o aca lapoto anam qaỹoqteua'a. 10Nachaqrata da na shiỹaxauapi ỹa'aalac souaxat nam no'on maye ỹo'ottac acamaye, dam lataxac aca 'alo maye ỹauotec qataq huo'o naq 'enec naqa'en Ñim Lo'onatac 'Enauacna. 11Nataqa'en ñeshetaique da na 'alpi ỹataqta na'axaỹaxana da napaxaguenataxanaxac. 12Cha'aye saishet da sashenem aca 'alo da dapaxaguenataxan da huo'otaq huetaigui na laỹepi 'amqaanataxanaxaicpi. Qataq saishet da napacapeguelec ca ỹalleppi. 13Cha'aye Ñim Lo'onatac 'Enauacna hua'auchiguiñi co'ollaxa da ỹo'ot so Adán. Qaq co'ollaq ime, nache ỹo'ot aso Eva. 14Qataq nataqa'en so pa'aguenataxanaxaic saishet da hua'auñi da ỹatenachet so Adán. Aso Eva maye hua'auñi da ỹatenachet, qaq co'ollaq ỹatenachet, nache asomaye huo'o da lasouaxashet. 15Qalaxaye na 'alpi ishet da qanca'alaxatec da ỹataqta huelec da ntela'a da lco'oxoc, qataq da ỹa'amaqten So Jesucristo, qataq ỹataqta ỹauotec na laỹepi qataq huetaigui da ntela'a da lataxac qataq iqui'itaxatta da nachaalataxac.
