1 Samuel 20

₁Ca' so David 'eet, chicqochi'ñi yi Naiot quiyi Ramá, quepegue' ca neeta'ñi so Jonatán, ma' ỹahotaque 'naapega:

—¿Nega'ỹo' ca se ỹa'maxañi so'uet? ¿Nega'ỹo' cá'maq sasauaxat? ¿Nega'ỹo' cá'maq ỹasauaxaset quiñi qataa'i' quiyim ñi'maxare ỹahotaque yalauat?

₂Ca' so Jonatán 'naaco':

—¡Ñi qota'olec se ỹa'maxaren ma'le dajo! Ca' ¡se ralauachi'! Qam 'yiiñisari' quiyim ñi ita'a sqaica ca ỹo'uet quiyim qaica ca ỹa'xaỹaxac, lodegaxat loqo'm cocho'qui'. Ca ¿negue' cá'maq 'neeta quiyim se ichoxochim quet dajo? ¡Qaica quet cá'maq la'maqa'!

₃Qam so David lotqai liỹa pilalec da la'qaatec, 'naaco':

—Ñi qataa'i' ỹaatqajam ỹa'deenta quiyim ỹim rqo'itaxachi', ca' peeta'a se ỹa'deenaxanaxanegue dajo qami', ma' sqoue quiyim sqa 'maxariñi'. Qam saanem qami' da ỹa'qaatec, 'qaachigui ñi qara'gaxala', quiyim sqaỹaloq yime.

₄Ca' so Jonatán inato' so'maxare, 'naaco':

—Ca' nagui ¿negue' cá'maq vi'saque quiyim so'uet caqami'?

₅Ca' so David 'naaco':

—'Ajñi', ma' nete'e nemaqachic, ma' dalaxaic ñi shiraigo. Ca' ỹim ñqa'xañi'ñi' ñi qarashi Saúl ma' squi'ỹaq. Qam yayaxañirac quiyim ñañoxojñi quiyi no'ueenaxa, toco' ma' nete'e liỹa ma' lavit. ₆Ca no'm ca qataa'i' renataxanaque aỹim, ca 'ñiraco' quiyim 'ue ca ỹashiilaxanaxac caqami' quiyim saigue da ỹa'a' Belén. Ma' cá'ogue ca iuo' laseripi ỹo'uet aca lachitaxanataxanqate, ca' ỹavigaxat quena' ỹovirec yi ñaaxa. ₇Ca no'm 'naac ỹa'maqachiguiñi, ca' qaica ca huapigui na iuel ma'le. Qam no'm ro'o, ca 'yiiñi' quiyim ỹahotaque se no'uen ca ỹo'uet caỹim. ₈Ca' vichiguiño' qouaquiric, ma' mashic ỹim relaachiqui', chaqai mashic saanaxauec da qara'qaatec quiñi qara'gaxala'. Ca' vichiguiño' nagui, no'm chaqaỹim ỹasauaxaset, ca' qami' yalauachi', se yipaquetaque yaviquira'a ca qataa'i'.

₉Qam so Jonatán 'naaco':

—¡Sqaica huapigui qavilli'! Ma' no'm sa'den quiyim ñi ita'a ỹahotaque ỹo'uet ca se no'uen caqami', ca' sa'ue ra'xaỹaxaqui'.

₁₀Ca' so David 'naaco':

—¿Nega'ỹo' ca ỹa'ue ỹa'xaỹaxac, no'm ca qataa'i' se no'uen ca 'naac caỹim?

₁₁Ca' so Jonatán 'naaco':

—Ỹala'e', qami' iỹaatac, qomi' saxalec na no'ueenaxa.

Ca' que', taarelec ca no'ueenaxa. ₁₂Ca co'na'le, ca' so Jonatán 'naaco' queso David:

—Saanec da ỹa'qaatec quiñi qara'gaxala' qota'olec quena Israel, quiyim nete'e chaqai nete'e liỹa chaqaiyi ñiichi'ñi añi ra'aasa sedaanaque ca la'maqa' quiyim sa'den cá'maq 'neeta'pegue ñi ita'a. No'm 'maxaraic, ca' sa'ue ca ra'xaỹaxaqui' ma'le. ₁₃Qam no'm ñi ita'a ỹahotaque ỹo'uet ca se no'uen, ca' ñi qara'gaxala' ỹaatqajam ỹo'uet ca ñouaxanaxaset, no'm se sa'ue ca ra'xaỹaxaqui', chaqai sotauañi' quiyim qarayichi'. Chaqai ¡rotauañi' ñi qara'gaxala', 'nejem nqai'en da lotaanaxanaxac quiñi ita'a! ₁₄Ca no'm ñaq yca'leetauec, ca' ỹaatqajam yi'xoriñi' ma'le, 'nejem dá'maq lqouagaxa ñi qara'gaxala' caqami'. Chaqai no'm yileu, _15-16ca' queeta nqai'ñi' da rqouagaxa'e' quena iuo' laseripi. Ca' ¡ñi qara'gaxala' imit cá'maq pa'guentac qami', ca' nomachichiguiñi cá'ogue!

Ca' chaqaido' da 'neeta co'na' so Jonatán chaqai so David ỹo'ueete' da na'deenaxague'. ₁₇Ca' so Jonatán, ma' se neme da lauochaxa queso David, ca' lotqai liỹa ỹaanec da la'qaatec quiyim chalego da lqo'iichi, 'ec nqai'en quiyim chi nauotalta'. ₁₈Ca co'na' ime, ca 'naaco':

—Ma' nete'e, ca' ỹovire'oga ca nemaqachic quena' ỹovirec shiraigo. Ca negue' cá'maq 'neeto' cá'maq nqa'xanqachi' ma' co'chiichi'ñi, ca qaro'uaachi'. ₁₉Ca ma' ỹovirerec caua tres na'xata', ca' paguec qaro'uaachi' ma'le. Ca' nagui nañoxochiriñi quiyi nañoqotqachi' queso, ca' viitetoto' yi lapoỹañi qa'. ₂₀Ca' ỹim sahindec caua tres ỹovioqo, taategue nqaishine' da'maxare, 'ec 'ue cá'maq sahintac. ₂₁Ca' shinapega ma'le ca ilaatec: Quitalo yaua ỹovioqo. No'm shinac: Yaua ỹovioqo pa'aatetquenajo caqami', mo'e', coñita, ca' qaica ca huapigui qavilli', ma' qaica ca ro'maxashichi' ma'le. Saanec da ỹa'qaatec caqami' chaqai quiñi qara'gaxala'. ₂₂Qam no'm shinac queca'maxare: Yi ỹovic pa'a'querajo caqami', ca' qui', ma' ñi qara'gaxala' ỹahotaque quiyim qami' qui'. ₂₃Ca' dajo qara'qaatec mashic saqatqajanqauec quiyim sqaica lqodoc, da'maxare mashic 'qaachigui ñi qara'gaxala'.

₂₄Ca' so David nqañoxojñi queso no'ueenaxa. Ca co'na' noviro so nemaqachic queso dalaxaic shiraigo, ca' so nashi nqa'xanñi quiyim que'e queso nqui'ỹaxala'. ₂₅Ca' nqa'xanchi'ñi so chaqai'en nqa'xanqa' ne'tot so 'imec lahi. Ca' so Jonatán reloqo'chiguit chaqai so Abner nqa'xanñi huaqa'te' so Saúl. Ca' so David nqa'xanqa' co'chiichi'ñi. ₂₆Ca' quesojo na'xa'a so Saúl qaica ca 'naac, ma' 'neetapego' quiyim 'ue ca ỹo'ueetetac se ỹa'maxañi, ca' se nouanaho ma' saqa' co'it. ₂₇Qam na' nete'e queso liỹa na'xa'a queso nqui'ỹaxac, ca' aso nqa'xanaxaqui so David qaiyiita co'chiichi'ñigui. Ca' so Saúl inat so llaalec Jonatán, 'naaco':

—¿Chi'negue ma' sqa nac scavit chaqai nagui quiyim que'e ca llaalec ca Isaí?

₂₈Ca' so Jonatán 'naaco':

—Ca David yashiila, ma' ỹahotaque quiyim taigue da Belén. ₂₉Ne'xoresene'tot aỹim quiyim sa'maxarenta taigue da'maxare, ma' ca lauo' ỹo'uet aca ỹavigaxat lachitaxanataxanqate hua'ñi nqai'en ca la'a', chaqai ca lqaỹaripi so'maxare noỹaxane ỹahotaque taiquera. Chaqai qai'neeta 'naapega aỹim quiyim yqouaguegue saxanec, ca' chaqai cocho'qui' ra'piicha ca lauo' laseripi. Vichiguiño' nagui se nqa'xanñi quiyim qami' lqui'ỹaxaua.

₃₀Co'na'le, ca' so Saúl ỹaatqajam ro'ỹa so Jonatán, ca 'naaco':

—¡Ỹaatqajam 'eco' qami' llaalec aca nanatqa lo'o' 'aalo! ¿'Ñiisapego' quiyim se sa'den quiyim nauochaxaua'e' so llaalec ca Isaí? ¡So'maxare ỹo'uet quiyim ỹaatqajam qanpocoxolec qami' chaqai añi qachii'i'! ₃₁Ma' quiyim so'maxare ñaq nca'leetauec quena 'laua, ca' qami' chaqai dá'maq ro'ueenataxanaxaqui' quiyim qami' nashi qaica ca la'maqa'. Vichiguiño' nagui laataxañire'oga, ca naviquiro, ma' ca'maxare 'maxaraic quiyim ileu.

₃₂Ca' so Jonatán 'naaco' queso'maxare:

—Qam ¿chi'negue queta' qaỹalauat? ¿Nega'ỹo' cá'maq se no'uen ỹo'uet?

₃₃Ca' so Saúl ỹacona aso laqui sham ỹa'a' so Jonatán. Ca so'maxare ỹa'den quiyim so leta'a se ỹasaguerentac quiyim ỹahotaque ỹalauat so David. ₃₄Co'na'le, ca' ỹaatqajam ro'o so Jonatán. Que'eetac, qam ne'laxashiguim queso nqui'ỹaxala'. Ca' tot nouanau'a so nqui'ỹaxac queso liỹa na'xa'a, ma' ỹaatqajam 'ue da 'neeta queso David, ma' so leta'a ỹo'ooqochit so'maxare. ₃₅Ca' queso liỹa na'xa'a, ca' ỹovita so laloqojnec quiyim nauane'e' so David. Ca' so Jonatán ta'oga so no'ueenaxa, nauequeta'pegue' so lelaatec ne'necoqui'. ₃₆Ca co'na' ỹovirerec, ca 'naaco' queso lelaatec:

—Chaqa'ma' ni'guiñite', quitalo ma'le naua ỹovioqo sahindec.

Ca' so lelaatec chaqa'ma' ne'guenta na' so Jonatán ỹahinec so lovic, qoỹoqo'ta ca ta'ñi nqai'en queso'maxare. ₃₇Ca co'na' so lelaatec ỹovita cá'maq ta'ñi so lovic, ca' so Jonatán netenegue da la'qaatec, 'naaco'sa':

—¡Yi ỹovic pa'aauec quedajo quena viise'e!

₃₈Ca' so Jonatán lotqai liỹa netenegue da la'qaatec, 'naaco':

—¡Raqamqai', niyiñi', sqai vire'e!

Ca' so Jonatán lelaatec ỹaconalo saua novioqo, ca' ỹodooriri' queso na'co'. ₃₉Qam qaica ca retan dajo, ma' so Jonatán chaqai so David qaisauate' na'deenta' queda'maxare. ₄₀Ca co'na' ime, ca' so Jonatán ỹaanema saua lovioqo so lelaatec. Ca 'naapega quiyim ỹodooro queca na'a' lodegaxat.

₄₁Ca co'na' mashic ỹoxogue so nelaatec, ca' so David nenoxonec, chicqo'tegue da lahi so lapootañi qaripi. Ca' tres ỹa'chi'iñi naua le'cootal ỹoviraqta'guit na latap na 'laua queso Jonatán. Ime, ca' nqo'goxata' chaqai noỹenta'ta', chi ỹovire'ta quiyim nimishiguim da 'neeta so David. ₄₂Ca co'na' dá'ogue dajo ime, ca' so Jonatán 'naaco' queso David:

—Mo'e', qui' ma'le, qaica ca huapigui qavilli', ma' dá'maq qara'qaatec mashic saanaxauec, chaqai 'qaachigui ñi qara'gaxala', chaqai sashiilaq quiyim ñi'maxare naua'que na'xata' reloqota'alo qomi', chaqai da qana'deenaxac ỹoviraugui ca qochaalqaipi naatashiguim.

Ca co'na' ime dajo, ca' so David eec. Ca' so Jonatán pila'a yi na'a'.