Zacarías 5

₁Ca 'ue so liỹa iuanaxanaxac. Seuane'ta aso lere ỹaỹoxontac. ₂Ca' so nelaatec piguim le'ec yinat: ¿Negue' só'maq reuanachiqui'?

Ca' shinac: Seuane'ta aso lere 'vii naua lerqa, ỹaỹoxonta; nueve metro da ladogaxa chaqai cuatro y medio dá'maq leca'gue.

₃Ca na'le, ca 'naapiguiỹa': Ca' chaqaiyi hueetalec qoỹeretañi dá'maq se no'uen ỹovita nqohin yá'ogue yi 'laua. Ma' chaqaida dá'maq qoỹeretalgoto naua'que naua lahil, ca' cá'maq rocachi loqo'm ca ỹaanec ca la'qaatec nallitalta', qam se ipaguigui ca la'qaatec, ca chaqa'ma' 'ue ca nouaxanaxaset. ₄Ñi qara'gaxala' sqaica lqalanec i'taxajñi da la'qaatec: Ỹim selatalo qamiri dajo se no'uen, qaiyi inoxonaugui ca lauo' ca cuataxai chaqai ca lauo' cá'maq ỹaanec ca la'qaatec nallitalta', qam se ipacqajñigui, ỹiquetapigui da ỹeenaxat. Ca dá'maq se no'uen chaqaiyi hueeta'ñi chaqai ỹovireto'o' ma' tot qaica ca niquiaq chaqai ca qa'.

₅Ime, ca' nqo'neho só'maq piguim le'ec retaqata'pegue' aỹim, ca 'naac: ¡Ñaqai 'ajñite' ñí'maq re'oq ma'le'!

₆Ca' senat, shinac: ¿Negue' ñi'maxare?

Ca so'maxare 'naac caỹim: Ñi'maxare naloqojnaxanaxaqui, ñí'maq naloqojnaxaqui na lasauaxaset ná'maq neetalec najo 'laua.

₇Ca' aso naloqojnaxanaxaqui 'ue aso lapooquete imaañi na quiguiñi. Ca na' qanauasshiguim aso lapooquete, ca 'ue aso 'aalo nqa'xantañi, neetañigui aso naloqojnaxanaxaqui. ₈Ca 'naac caỹim só'maq nelaatec piguim le'ec: “Ñijo 'aalo, ñi'maxare chaqaina ná'maq se no'uen.” Ca' pataxañigui asó'maq naloqojnaxanaxaqui, ca ỹapoñigui caso lapooquete quiguiñi.

₉Ca na' liỹa ya'ỹa'a, ca' seuane'talo saua dos 'aalo, qam 'vii naua laua' chaqai qaỹamaqate' quena nonot. Naua laua' 'ec naua damec laua', ca ỹoote', qam i'xatete' aso naloqojnaxanaxaqui.

₁₀Ca na'le, ca' senat só'maq nelaatec piguim le'ec só'maq setaqata'pegue', shinac: ¿Negue' cá'maq ỹodootegue aso naloqojnaxanaxaqui?

₁₁Ca so'maxare 'naac caỹim: Taategue da Babilonia, no'xoñishiguim ca no'ueenaxanaxaqui. Ca ma' ỹomate' ca no'ueenaxanaxaqui, ca chaqaiyi illiralec ma'le cá'maq lomala'.