Zacarías 3

₁Na' ime, ca' ñi qara'gaxala' ỹa'ue so iuanaxanaxac, ỹachaxañim so Josué só'maq lashi na netaxaỹaxanqajanqaipi, nachaatetañi, reloqoto'ot so nelaatec piguim le'ec, lelaatec ñi qara'gaxala'. Hueeta'gue da loic so Josué só'maq na'ỹaapec ỹahotaque 'ue ca ỹa'xat pataxañi quedá'maq 'neetari' so Josué. ₂Ca na'le, ca' so lelaatec ñi qara'gaxala' 'naapega só'maq na'ỹaapec: ¡Ñi qara'gaxala' nelaxa qami' ma'le! ¡Ñi qara'gaxala' ñí'maq nqo'ta yi Jerusalén nelaxa qami' ma'le! Ma' najo ỹale 'neetari' aca poqo ỹaviquetaugui qaỹachigoxotaugui ca poqoipi.

₃So Josué ỹaatqajam napio'ohi' saua loho ỹansañi na' reloqoto'ot so lelaatec ñi qara'gaxala'. ₄Ca na'le, ca' so nelaatec ilate' saua lotaua' quiyim qanaqate' saua loho so Josué sauá'maq loho napio'ohi'. Ime, ca' 'naapega: 'Ajñi', dajo 'neetasa' quiyim nagui ñquiỹouec so rasauaxashichi'. ¡Nagui so'uet quiyim no'viichiriguilo naua noho nemaqachic lo'ol!

₅Ca chaqa'ma' ilate' saua lotaua' quiyim qoỹañigui so Josué so 'ec ncolligue' na lqahic co'teeta. Ca saua'maxare nado'inñi nqohin, ca na' ime, ca qoỹañiguilo saua loho nemaqachic lo'ol. Qam so nelaatec piguim le'ec naqaida nachaatetañi.

₆Ime, ca' so lelaatec ñi qara'gaxala' 'naac queso Josué: ₇'Neetasa' da la'qaatec ñi qara'gaxala' sqaica lqalanec: Ỹaatqajam quiichiri'ñiguilo naua ñayicyaxaco chaqai 'viichi' naua'que nauá'maq ro'ueenataxahi' nauá'maq samaqairelgoto. Ca no'm 'ñitetegue dajo, ca' chaqa'ma' ro'viiñirañi loqoira'a na no'ueenaxanaxaqui caỹim. Cochi'ta na'maxare chaqai naua nasoxoco, ca' ỹim sa'ue ca romachi' ma'le, viisañiguilo nauajo ilaatqa piguim lase' nauá'maq 'ue da lo'ueenataxanaxague' caỹim.