1¡Qami' iqo'itqate, ỹaatqajam chalego da royaaqui'!
¡Ỹaatqajam chalego da royaaqui'!
Naua nqochichi' 'ec dos coviguiñigo'
napoosañi quena napoxogui'i';
na qavi'i' 'ec quetaq llaalcoqui'
rishiquitac cada qa' quiyi Galaad.
2Ná'ogue ana rovi'i' naloochiguiñi,
'ec ana nelo qagreta
chita'gue chicqa'ñigui ca nachilaxaqui,
chaqai ỹa'maqatañi quiyim qanepetec.
3Naua qadapchi' togue'
'ec ca qo'laaxaic toc
chaqai lo'daxaraqa naua ra'qaataxahi'.
Naua rashilqui' 'ec caua granada lahil
richiitau'alo quena napoxogui'i'.
4Na rqosochi' lo'yaxanec,
'ec ada na'ajnaxanaxalate lo'ueenata na'le so nashi David,
qaỹo'uet qaỹahotaque no'goxonaxat lahi'.
No'xatetañi nqohin ana mil nquepaqataxanqate,
lquepaqataxanqate na 'ñaaxaiquipi.
5Naua ro'viichi' 'ec caua dos qagreta huaaya',
que'eeta'pe quena 'uaqapi neesañigui ana qo'paq 'ue ana lenoỹaxai.
6Toco' ma' sham richiguiñi, ca' eec na la'al,
ca' shicpegue' ada qa' huaalec na qo'paq louaq mirra,
cada quemaralec huaalec na nichiinaxanaxat lo'daxaraic lahita.
7¡Ỹaatqajam qami' lo'yaxana, qami' iqo'itqate;
ỹaatqajam ỹovirañi da royaaqui'!
¡Ỹaatqajam qaica ca ra'aqshichi'!
9Mashic cuachita añi i'taxanata,
qami' lo'yaxana ñapiitaxaua;
mashic cuachita añi i'taxanata,
ca na'chaqai 'oonoqui' ra'ira'a aỹim,
queso 'oonoqui' lequet ana rqola'e'.
10¡Chalego lo'daxa da neneequesenaxaqui',
qami' ñapiitaxauo'lli'!
¡Da neneequesenaxaqui' paguec lo'daxa quena lataxa;
chalego lo'daxa lahita na nocoraxachi'
quená'ogue na liỹa lo'daxaraic lahita!
11Qami' ỹalamaxarete ñapiitaxaua,
quena qadapi' 'ec rapic li'i na chicqotapougui.
¡'Ec rapic li'i chaqai naua no'i' hueeto'ot na ro'legaxanaxachi'!
¡'Ec na lahita quiyi Líbano
na lahita ana neloxogui'i'!
12Qami' ñapiitaxauo'lli',
qami' nanaxanqa' napoota'a,
huaxaỹaq lahi' napootau'a,
huaxaỹaq ne'paxantashiguim 'ue añi qaỹotocqotalec;
13nanaxanqa' hua'ñi ñaxashiguim ana granada lo'daxarai ana la;
nanaxanqa' 'ue ana lenoỹaxai ana alheña,
14ana nardo chaqai azafrán,
chaqai ana noqola late'e lo'daxaraic lahita chaqai ana canela,
chaqai ná'ogue ana liỹa qo'paq nichiinaxanqate,
mirra, áloes;
¡chaqai ná'ogue ná'maq liỹa lo'daxaraic lahita!
15Añi huaxaỹaq lahi' quiyi nanaxanqa',
añi'maxare ni'ỹa,
ca na la'uaxac chicqotape'oga yi Líbano.
16Nonot huaquiaxaic, ¡nelo'irec!
Nonot chicqa'gue da 'guiñi, ¡nanaqui'!
Pi'chiilec na ỹanaxanqa',
qaiyi huaguec na lo'daxa na lahita.
'Naac aso 'aalo
Qami' iqo'itaxat, nanaquirepegue' na qadanaxanqachi',
ca 'qui' ná'maq lo'daxaraic la.
