Ná'maq nca'leuec ma'le quena Israel llaalqaipi
1Nagui, ca' senataxan: ¿Peeta'a ñi qota'olec tot icoñiguito' nagui so Israel laseripi só'maq lalamaxareteripi? ¡'E', mesqaida! Ma' ỹim qai'neeta ỹim Israel le'ec, ỹim lauo' le'ec so Abraham, chaqai sachigoxougui na llaalqaipi so laual Benjamín. 2Ma' ñi qota'olec shi'gue lca'acsec na Israel laseripi quiyim lalamaxat. Ca' nagui se liỹoqa'piguit. ¿Sqa 'yiiñiỹo' qamiri dá'maq 'nerac naua naneresañi la'qaatqa ñi qota'a? Dá'maq 'neeto' na'le so qota'a letaxaỹaxanqajnec leenaxat Elías na' nqouagaxainot ñi'maxare, ca' 'ue na imaxalec so Israel laseripi, 'naaco': 3“Qami' ỹa'gaxala', sá'ogue so retaxaỹaxanqajanqui'pi qaỹalauat, chaqai qaỹosogui ná'maq hua'ñi quiyim qanqouagaxainot qami'. Ca qaỹimetam yo'ueenañi, qam qai'neeta ỹim qaỹahotaque qayalauat.” 4Qam ñi qota'olec 'naaco': “Ỹim soỹoote'oga yi siete mil qomyipi quiyim se ỹa'dooto naua le'cootal quiyim nqouagaxainot ñi no'ueenatec nashiilec leenaxat Baal.” 5Ca' chaqaida 'neeta nagui quiyim ñaqa 'ue ná'maq no'ueenañi quená'maq qanca'au'a ma' qai'xoren quiñi qota'olec. 6Ca no'm qanqouaguegue quiñi qota'a quiyim qanca'au'a, ca' mesqai chicqochigui quet cá'maq ỹo'uet ca qom; ma' queta'le, dá'maq lqouagaxa quet ñi qota'a, ca' sqai ỹaatqajam nqouagaxa.
7Ca ¿negue' cá'maq 'neeto'? Quiyim ná'maq Israel laseripi se ỹanata cá'maq idaantaque, qam ná'maq lca'acseripi ñi qota'a, ca' ỹanata. Qam ná'maq liỹaripi no'ueena'guit quiyim se na'xaỹaxan. 8Ca ipaquichigui dá'maq 'nerac yaua naneresañi na'qaatqa: “Ñi qota'a ỹo'uet quena'maxare quiyim se ỹa'yiiñiguit; ca ỹo'uet quiyim se neuanñi chaqai sqai 'qaa. Ca' chaqaida 'neetari' vire'ta nagui.” 9Ca qai'neeta so nashi David 'naac:
Saxanchi' ma'le cá'maq lqui'ỹaxac lodegaxat na'maxare ỹo'uet ca lque'maxa, 'nejem aca noqoina chaqai aca naleguec,
qaiyi ma' repoxolaxanlec, ca' qaỹa'ue ca nouaxanaxaset.
10Quiyim naua nqote' qai'la', ca' se nauanñi,
chaqai na lelaq chaqai 'neetari' se nalamaxashiguim.
Da lca'laxa ná'maq mesqai judioipi
11Nagui, ca' senataxan: ¿'Nesam chaqaido' quiyim na judioipi na' repoxolaxan huaañi, ca' tot rapogoxoshiguim? ¡'E', mesqaida! Ta'ta'a quiyim na' se na'xaỹaxan na judioipi, ca' na mesqai judío laseripi 'ue da lligo queda nca'laxa, qaiyi ná'maq Israel laseripi na'ñaxat quiyim ỹadenaxat na'maxare. 12Ca vichiguiño' quiyim queda lasauaxaset na judioipi, ca ỹauate'oga da ne'xorenataxanaxa quená'ogue na qomyipi hueetalec na 'laua, chaqai quiyim ỹo'maauec, ca ỹo'uet quiyim qai'xoren na mesqai judioipi, ca ¡huose'quet quiyim mesqai paguec quet ca ne'xorenataxa na'maxare, no'm ỹovi' ca na'xa'a liỹa inoxono!
13Qam ỹim nagui 'uo' da sa'xat caqamiri ma' sqai qamiri judío lase'. Ma' ñi qota'olec yilata na mesqai judío laseripi, ca vichiguiño' ỹaatqajam semaqachin da ỹo'ueenatec. 14Ma' sahotaque quiyim 'ue ca quená'maq chi iuo' laseripi, 'ue ca lipiichi quiyim ỹadenaxate' qamiri, qaiyi 'ue ca nca'leuec quena'maxare. 15Ma' quiyim se qaicoñiguit na judioipi, ca 'ue da lligo ná'ogue na qomyipi hueetalec na 'laua quiyim qaicoñi'chiguit quiñi qota'a, ¿huose'queto' sqai paguec queto' ma' ỹovita liỹa qaicoñiguit na'maxare? Ỹaatqajam sqaica 'nejem ca lauaq ma'le, 'ec quiyim liỹa qanca'laxatec ca mashic shi'gue ileu. 16Ma' cá'maq 'auaxaic pan chicqochigui aca naqaulata, quiyim mashic qoỹaanot ñi qota'a, ca qai'neeta cá'ogue ca naqaulatec lalamaxaret ñi'maxare. Chaqai cauá'maq lpa'yii aca qo'paq, quiyim mashic qoỹaanot ñi qota'a, ca' qai'neeta ná'ogue na lasotellipi lalamaxarete ñi'maxare.
17Ca 'uo' ná'maq judioipi 'ec lasote aso nanecse leenaxat olivo mashic shi'gue qaichaxauec. Ca quiyí'maq chicqochi'ñi, ca' qaỹa'deuo qami', ma' qami' 'ñiisari'o' na'le aca olivo hueuec. Ca shichi' nouañirau'alo saua lpa'yii chaqai da lca'laxa aso nanecse olivo. 18Qam 'neeto' lotqai 'ñiisapega paquirauec quenauá'maq ỹaatqajam lasote aso'maxare. No'm 'ñiisapega paquirauec, qam ñaqai 'yiiñira'a quiyim se nolli'sañi saua lpa'yii, ma' sauá'maq lpa'yii chaqaisaua sauá'maq nolliisañi qami'.
19Qam sqoue 'ñirac: “Ajá'a, qam sauá'maq lasote qaichaxarec, qaiyi qaya'deuo cada olivo.” 20Ajá'a, ỹa'maqachiguiñi. Qam qaỹouaxandec, ma' sqaica ca lpi'ỹaxague', ca qami' 'ue ca romachi' ma' 'ue da rpi'ỹaxaqui'. Ca vichiguiño' se nemaqajñi'. Ta'ta'a quiyim richillirañi. 21Ma' quiyim ñi qota'olec se i'xorene' saua lalamaxarete lasote na' ichaxarec, ca qai'neeta qami' se re'xoriñi' ma'le. 22'Ajñi' quiyim chalego leuagaxaric ñi qota'a, qam qai'neeta qaica lqouagaxat. Ma' ñi'maxare se nqouaguegue na'le cá'maq 'ue ca ỹasauaxat, qam caqami', ca' huagaxaraic. Qam qui'salec da lqouagaxa; ma' no'me', qami' qai'neeta qarichaqairec. 23Ca quedá'maq liỹa 'neetasa': no'm na judioipi pilac quiyim huelec, ca na'maxare lotqai liỹa qaỹa'deuo, ma' ñi qota'olec 'ue da lquesaxanaxa quiyim ishit liỹa ỹa'deuo. 24Ma' qami', ma' mesqai qami' judío le'ec, ca' qaichaxauec qami' cacá'maq olivo hueuec, ca' qaỹa'deuo ñaqto nqohin qami' casó'maq ỹaatqajam no'uen nanecse olivo, ¡huose'quet quená'maq judioipi ma' ỹaatqajam lalamaxarete lasote adá'maq no'uen nanecse olivo, ca lotqai liỹa qaỹa'deuo cadá'maq lalamaxarete chicqaugui olivo!
Dá'maq 'neeta ma'le da lca'laxa na Israel laseripi
25Vichiguiño' qamiri ỹaqaỹa', sahotaque quiyim 'yiiñii dá'maq se re'xogui 'ne'tegue ma'le ñi qota'a, qaiyi sqai 'ñiitapega quiyim qamiri 'deenaxanqachaqaqa. Ma' 'ue na Israel laseripi ná'maq ỹaatqajam se na'xaỹaxan, qam ta'ta'a ma' ỹovita ca laloqo' quiyim inoxono ná'ogue ná'maq sqai judío laseripi. 26Ca ma' ỹovirelec dá'ogue dajo, ca ná'ogue na Israel laseripi qanca'laxatec ma'le. Ma' naua naneresañi la'qaatqa ñi qota'a 'neracsa':
Chicqochi'ñi ma'le yi Sión cá'maq ỹosouec ma'le na llaalqaipi so Jacob,
chaqai nquiỹogoñi quena se no'uen.
27Ca' 'eda 'neeta ma'le da ña'maqataxac ma' ña'maxate'e' na'maxare,
ma' ỹovita quiyim ñaqata'a na lasauaxaset.
28Ma' na judioipi se icoñiguit na'le da na'qaatec chicqaugui da nca'laxa, ca npa'guenaxaua nqohin ñi qota'a, qaiyi 'ue ca qayiguiuo qamiri; qam ñi qota'a ñaqai i'xorentac na'maxare, ma' lca'acsec só'maq 'auaxaic leta'allipi. 29Ma' cá'maq ỹaan ñi qota'a, ca se liỹa icona, chaqai se ishit quiyim se ipacqajñigui so loỹaxanaxac. 30Ma' qamiri na'le se na'xaỹaxañiỹa ñi qota'a. Qam nagui ma' na judioipi se na'xaỹaxana ñi'maxare, ca' ñi'maxare 'ue da le'xorenataxanaxa caqamiri. 31Ca' chaqai 'nejem nagui na'maxare ma' se na'xaỹaxana ñi qota'a, qam qaidaata quiyim ñi'maxare 'ue da le'xorenataxanaxa quena'maxare, 'nejem dá'maq 'ne'tegue na'le caqamiri. 32Ma' ñi qota'olec quepaqchiguit ná'ogue naloqojne'ejta' quiyim se qana'xaỹaxana, qaiyi ma'le ñi'maxare naloqojne'ejta' ma'le ná'ogue ma' i'xoren.
33¡Ỹaatqajam chalego lecaic da lqouagaxa ñi qota'olec, chaqai da la'deenaxanaxa, chaqai qaỹaataq ca ỹa'den! Chaqai se sa'deenaq quiyim sa'xataxe' naua na'deenaxaco, chaqai vire'ta se sa'deenaxe' naua nayicyaxaco. 34Ma' “¿negue' ca ỹa'deene' naua la'deenataxanaxaco ñi qara'gaxala'? loqo'm ¿nega'ỹo' cá'maq ỹapaxaguin ñi'maxare? 35¿Negue' queto' ca 'ue ca ỹa'auaxan ỹa'ue ca ỹaanem ñi qara'gaxala', qaiyi ñi'maxare 'ue ca ỹaanem ma'le ca'maxare?” 36Ma' ná'ogue nanchaqaina chicqo'ot ñi qota'olec, chaqai chi lo'ueenatqaipi ñi'maxare, chaqai chi lalamaxareteripi. Ca vichiguiño' ¡se neme semaqachinqatac ñi qota'olec! Ajá'a, chaqaida 'neeta dajo.
