Só'maq mashic 'ue na netanec queso Israel llaalqaipi
1Ca na' ime dajo, ca seuane'talo saua cuatro nelaatqa piguim lase', nachaatesañi, hueeta'ñiguilo naua cuatro llico na nonot. Saua'maxare quepaxatesa'guit naua nonoochi', qaiyi se pe'terelec ana 'laua, chaqai ana huaaxai, chaqai ana qo'paq. 2Qai'neeta seuane'ta so piguim le'ec chicqa'gue da lqodoigue, lo'qoota'a aso letanaxanqate ñi qota'a ñí'maq nca'leetauec. Ca' sojo piguim le'ec ỹaualaq, qam ỹaatqajam netenegue da laualaxac quesaua cuatro nelaatqa piguim lase' sauá'maq iconchiguito' na'le da lquesaxanqa' quiyim na'axat na 'laua chaqai ana huaaxai. 'Naacsa':
3—Se na'axachii na 'laua chaqai ana huaaxai chaqai ana qo'paq, quiyim saqa' setanaq ná'maq lelaatqaipi ñi qota'olec, sahoqai aca netanaqsete huejlec nqaishinaq na latap.
4Ca' sa'xaỹaque ỹorete' só'maq mashic 'ue ana netanaqsete: Ciento cuarenta y cuatro mil quesá'ogue só'maq llaalqaipi so Israel. 5Ca' ỹovi' doce mil só'maq qaỹa'ue so netanec queso llaalqaipi so Judá, doce mil queso llaalqaipi so Rubén, doce mil queso llaalqaipi so Gad, 6doce mil queso llaalqaipi so Aser, doce mil queso llaalqaipi so Neftalí, doce mil queso llaalqaipi so Manasés, 7doce mil queso llaalqaipi so Simeón, doce mil queso llaalqaipi so Leví, doce mil queso llaalqaipi so Isacar, 8doce mil queso llaalqaipi so Zabulón, doce mil queso llaalqaipi so José, chaqai doce mil queso llaalqaipi so Benjamín.
Só'maq 'xoic qomyipi nodaachiguiñi lalagaxaic na looỹac
9Ca na' ime dajo, ca seuane'ta so ỹoreta'oguit qomyipi ỹoreta'oguit na la'qaatec, nachaatetañi quiyi reloqota'ñi so nashi nqa'xanqa' chaqai queso qagreta llaalec. Ca so'maxare ỹaatqajam 'xoic, mashic tot qaica ishit naloqochin, chaqai ỹantañi na nooỹac lalagaxaic, chaqai lo'qoota'a ana chavic laue. 10Sá'ogue netenegue da laualaxac, 'naacsa':
Da qarca'laxa chicqo'ot ñi qota'olec,
ñí'maq nqa'xantañigui añi nashi nqa'xanaxaqui,
chaqai ñi qagreta llaalec.
11Chaqai ná'ogue ná'maq nelaatqaipi piguim laseripi nachaatetaho naqallichinchiguiñi aso qa'xanaxaqui, chaqai so qo'xoiquipi, chaqai saua cuatro ise' nca'leesauec. Ca' ỹa'chi'iñi naua le'cootal, ỹoviraqtera'guit naua lataapi' na 'laua quiyi reloqota'ñi so qa'xanqa', ca imaqachinsac ñi qota'a, 12'neracsa':
¡Ajá'a, chaqaida 'neeta dajo! Da nemaqajnataxanaxa, da nauaq, da na'deenaxanaxa, da toonaxac,
da necaic, da nquesaxanaxa chaqai da na'ñaxac,
qoỹaanot ñi qota'olec,
ca' da'maxare qaica ca lqodoc nqohin. Ajá'a, ca' chaqaida 'neeta dajo.
13Ca 'ue so 'óna queso qo'xoiquipi yinat:
—¿Nega'ỹo' ná'maq najo ná'maq ỹantañi na nooỹac lalagaxaic, chaqai negue' cá'maq chicqa'gue?
14Ca' ỹim shinac na'le:
—Taque', qami' ỹa'gaxala', maq 'yiiñi'.
Ca' so'maxare 'naapiguiỹa':
—Nauajo nauá'maq ca'laxaterauec só'maq chalego lecaic ne'xoric. Ca naua'maxare quiỹo' naua loho chaqai lalagaxaqa nqai'ne', ỹahota'ahi saua leuo' ñi qagreta llaalec. 15Vichiguiño' hueete'e na reloqota'ñi na nqa'xanqa' ñi qota'a, chaqai ro'ueenataxantacot ñi'maxare quenaua'que naua na'xata' chaqai naua'que naua piri quiñi lo'ueenaxanaxaqui. Chaqai ñí'maq nqa'xantañigui añi nashi nqa'xanaxaqui ro'ootaxanteguelec. 16Ca tot ỹoviro'ot ma'le ca nqopaaxa chaqai ca laquip. Chaqai tot qaỹavigaxat cañi ra'aasa, chaqai tot nauata'guit ca npa'ỹaaxa. 17Ma' ñí'maq qagreta llaalec ñí'maq neetañigui na lavinñi yi nashi nqa'xanqa', ñi'maxare reloqota'a 'neeta'gue aca qagreta, chaqai ỹauega ca hua'ñi na ne'paxantashiguim huaxaỹaq chicqaugui da nca'laxa. Chaqai ñi qota'olec nquiỹouec ná'ogue na lachiripi quenaua nqote' na'maxare.
