Da nemaqajnataxanaxa hua'gue da piguim
1Ca' ỹim Juan, ca na' ime dajo, ca' ñidaanashiguim, ca' seuane'ta so lasom nauatetagui queda piguim. Qam sojo nivillaxac 'ec aca npe'te só'maq 'au netaxaỹa'ña aỹim, ca 'naapiguiỹa':
—Nochirishiguim quenajo. Ca' sachaxañiraxarom dá'maq 'neeta ma'le najo.
2Ca na' noviriñi da lquesaxanaxa so Espíritu Santo, ca' seuana yi nashi nqa'xanqa' hueeta'gue da piguim. Ca' quiyijo qa'xanqa' 'ue so nqa'xanta'ñi. 3Ca só'maq nqa'xanta'ñi yi qa'xanqa' da lashicyaxac 'nejem na qa' qashilec leenaxat jaspe, loqo'm ana cornalina. Ca' naua lahil so qa'xanqa', ca' 'ue so qoñi'gue. Qam da lqashilegaxa 'nejem na qa' leenaxat esmeralda. 4Chaqai naua lahil sojo qa'xanqa', ca' 'vii saua liỹa' sauane'talo veinticuatro nashi nqa'xanaxaqui', ca' quesaua'maxare nqa'xantañiguilo so veinticuatro quesó'maq ỹaatqajam qo'xoiquipi, nodaachiguiñi lalagaxaic na looỹac chaqai ana nado'onsañi chicqaugui na 'oro. 5Ca' quesojo nashi nqa'xanqa' chicqotapegueu'a na nqai'legaxa, na nalataxa, chaqai na soxonaxallipi. Chaqai queda reloqota'uegue so qa'xanqa' ỹaviquetauguilo saua siete ncoỹeraxanaxaqui', qam na lauaq 'ec na norec lauaq. Qam saua'maxare chaqaisaua saua siete no'ueenataxanaxaco se re'xoguilo chicqoro'ot ñi qota'a. 6Chaqai queda reloqota'gue so qa'xanqa' qai'neeta 'ue so 'ec lachiugue richaauec chaqai richiichiguiñi.
Chaqai quenaua lahil so qa'xanqa' hueesa'ñi saua cuatro ise' nca'leesauec no'qaachiguilo quenaua nqote' queda reloxoỹa'gue chaqai queda qoshiỹa'gue. 7So 'auaxaic quesauajo ise' nca'leesauec 'nejem na sauaxaic leta'a; chaqai so liỹa 'ec na tooro; chaqai so liỹa na lashic 'ec na qom; chaqai so liỹa 'ec na ho'ic ỹoota. 8Ca' sauajo cuatro ise' nca'leesauec da'ta'a seis laua' quiñi 'óna. Chaqai no'qaachiguilo quenaua nqote' quena pa'aauec chaqai quena pa'aauo. Chaqai quiyi na'xa'a chaqai yi pe sqai ỹaxañiñi quiyim 'nerac:
Qami' maq ỹaatqajam co'chiite',
qami' qara'gaxala' qota'olec maq sqaica ca qalañirac,
qami' ná'maq chaqai'en 'ue qami', chaqai 'ue qami' nagui, chaqai naata'quena ma'le.
9Chaqai quena' sauajo ise' nca'leesauec imaqachine' da lecaic chaqai ỹaanot da na'aachicyaxac só'maq nqa'xantañigui aso qa'xanaxaqui só'maq sqaica lqodoc da nachaalataxac, 10ca' so veinticuatro qo'xoiquipi ỹa'chi'iñi naua le'cootal quiyí'maq reloqota'ñi so'maxare, ca' imaqachin só'maq sqaica lqodoc da nachaalataxac, ca' illiguiñi ana nado'ontañi quiyí'maq reloqota'ñi so qa'xanqa'. Ca' 'nerac:
11Qami' qara'gaxala' qota'olec, ỹaatqajam 'chichiguiñi quiyim coñichiguit
da nauaq, da necaic, chaqai da nquesaxanaxa;
ma' qami' ro'ueenachiqui' ná'ogue nanchaqaina,
ma' chaqaida dá'maq vi'saque, ca' 'ue,
ca' re'oq ná'ogue na'maxare.
