Apocalipsis 3

₁Qai'neeta lachita aca lere ñi nelaatec reloqota'a yí'maq mashic icoñiguit da na'qaatec na'ñi yi Sardis. 'Ñiraco': “'Eda 'neeta da la'qaatec ñí'maq no'qoota'alo daua siete no'ueenataxanaxaco se re'xoguilo chicqoro'ot ñi qota'a chaqai yaua siete huaqajñi: Ỹim sa'den ná'ogue ná'maq 'viichi'sac, chaqai quiyim mashic qami' leuaxaic, 'eno'm 'ue da lichoxoric aqami' quiyim qohinac rca'lli'sauec. ₂Nelo'irec, ca 'ñaxachi' dá'maq ñaqa 'ue ro'ueenataxanaxaqui' dá'maq mashic sham imeuo. Ma' ỹim seuana quiyim dá'maq 'viichi'sac se ỹa'maxañi quiñi qota'olec. ₃No'viñira'gue dá'maq napaxaguinataxaqui' coñichiguit na'le. Ca' netogochigui nqai'ñi' na qavilli'. Qam no'm se nelo'irec, ca' shicpegue' qami', qam sqa ỹaataq ca ỹoviraqa', shintari' ca cuataxai. ₄Qam 'ue na qomyipi quená'maq neeta'ñi na Sardis se napio'xote' naua loho. Ca na'maxare ñauequeta'pegue' ma'le, ỹansañi caua noho lalagaxaqa, ma' chi no'ueenataxac nqohin. ₅Ca cá'maq rauegaxan ma'le, ca' ỹañiñi nqohine' caua noho lalagaxaqa. Chaqai se sapalaxat ca leenaxat quiyim qoỹeretañi cayi lere nca'laxalate, ta'ta'a quiyim sa'xat quiñi ita'a chaqai quena lelaatqaipi piguim laseripi. ₆Ca cá'maq ỹa'den ca na'xaỹaxanaxac, ca no'uen quiyim na'xaỹaxana da la'qaatec so Espíritu Santo quená'maq mashic icoñiguit da na'qaatec.”

₇Qai'neeta lachita aca lere ñi nelaatec neeta'ñi yi Filadelfia. 'Ñiraco': “'Neeta da la'qaatec ñí'maq ỹaatqajam co'teeta chaqai lliqueta, ñí'maq hueeto'ot ada lauaatqate na lasom ñi lauo' so nashi David, ma' quena' ỹauachigui, ca' qaica ca ishit ỹapogui, chaqai quena' ỹapogui, ca' qaica ca ishit ỹauachigui: ₈Ỹim sa'den ná'ogue ná'maq 'viichi'sac. Ca' sella'gue dá'maq loqoisa'gue ñi 'ec lasom nauatetagui qaica ca ishit ỹapogui ñi'maxare. 'Eno'm sqai 'xoic ca rquesaxanaxa'e', qam na'xaỹaxañiteta da ỹa'qaatec chaqai mesqai 'xochiriñi aỹim. ₉Vichiguiño' ỹim ỹa'dooto nqaishine' aqami' naua le'cootal ná'maq queeta'pegue' so na'ỹaapec, ná'maq 'maatqaiquipi ná'maq 'naac judío laseripi qam sqai llic, qaiyi na'maxare ỹa'den ma'le quiyim se'xoriñi'. ₁₀Ma' na'xaỹaxañiteta da ỹaqataxac quiyim 'ue da reualaxaviqui'. Ca' quedajo, ca so'ootaxanlec ma'le aqami' quiyim ỹovita ca laloqo' quiyim qai'guen ná'ogue na qomyipi hueetalec ana 'laua. ₁₁Sqaỹaloq ñovi'. Lo'qo'ichiriñi ná'maq mashic hueeto'ot aqami', qaiyi qaica ca rouootaxana'gue ma'le ca raviguiqui'. ₁₂Ca cá'maq rauegaxan, ca' ỹim 'ec nqaishin aca nenojnaxa quiyim nolliitañi ñi lauo' ñi qota'olec, ca' totqa nac quiyi'maxare. Ca' quecaua'maxare serelgoto ma'le da leenaxat ñi qota'olec chaqai da leenaxat yi la'a' ñi'maxare, yí'maq dalaxaic Jerusalén chicqa'gue da piguim, chicqo'ot ñi qota'olec. Qai'neeta serelgoto ma'le caua'maxare ca dalaxaic ỹeenaxat. ₁₃Cá'maq ỹa'den ca na'xaỹaxanaxac, ca' no'uen quiyim na'xaỹaxana da la'qaatec so Espíritu Santo 'naapega ná'maq mashic icoñiguit da na'qaatec.”

₁₄Qai'neeta lachita ana lere ñi nelaatec reloqota'a yí'maq mashic icoñiguit da na'qaatec neeta'ñi yi Laodicea. 'Ñiraco': “'Neetasa' da la'qaatec ná'maq ỹaatqajam lliqueta, ná'maq ỹaatqajam ipacqajanchigui ca la'qaatec, ñí'maq chicqochigui ná'ogue ná'maq lo'ueenatec ñi qota'a: ₁₅Ỹim sa'den ná'ogue na 'viichi'sac. Sa'den quiyim sqai 'oometam qami' chaqai sqai qami' pa'e. ¡Saxanchi' qami' 'oometam, loqo'm pa'e! ₁₆Qam ma' chi pa'iigui qami', sqai 'oometa qami' chaqai mesqai qami' pa'e, ca' yisalgue qami'. ₁₇Ma' 'ñirac qami' nesallaxanec chaqai quiyim ra'maqaichiriñi chaqai quiyim tot qaica ca viñi'. Qam sqai huañita quiyim sqaica ca ra'maqachi'. Qami' 'xoraic, qaicanqaiyi, qami' qai'laq chaqai ñi'sauec. ₁₈Ca vichiguiño' 'ue da ỹaqataxac nagui caqami', quiyim chigoxochiro'ot aỹim ma'le cá'maq shiujnaxañita cá'maq ỹaatqajam 'oro nqatelecsec, qaiyi ỹaatqajam qami' nesallaxanec, chaqai quiyim chigoxochiro'ot aỹim quiyim shiujnaxañiraque ca qatooỹaqui' lalagaxaic, ca ñi'riñi, ca po'irelec ná'maq ỹo'ueetetac na nayiloxo quiyim ñi'sauec, chaqai shiujnaxañiraque ca latate' naua nqochichi', qaiyi neuañiriñi. ₁₉Ma' ỹim setaxaỹa'a chaqai salamaxat ca no'ueenataxac cá'maq yqo'ta. Ca' na'ñaxachi'o' chaqai netacocha'e'. ₂₀Ñaqai 'ajñi', ỹim nagui seuete'e na lasom, soỹaxantac. Ca no'm 'ue ca 'xaỹa da ỹoỹaxanaxac, ca ỹauate'oga aỹim queca nasom, ca' senoxonougui ca lauo'. Ca qomi' nqui'ỹaxaua'. ₂₁Ca cá'maq rauegaxan, ca' sa'ue ma'le ca loma' quiyi ñqa'xanqa' quiyim nashi, 'nejem aỹim ma' sauegaxan, ca ñqa'xanñi cañi nqa'xanaxaqui ñi qota'olec. ₂₂Cá'maq ỹa'den ca na'xaỹaxanaxac, ca' no'uen quiyim na'xaỹaxana so Espíritu Santo quedá'maq 'naapega ná'maq mashic icoñiguit da na'qaatec.”