Dá'maq 'neeto' na'le da leuanaxanaxac so Jesucristo
1Ca dajo dá'maq 'neeta da neuanaxanaxac ỹaanem ñi qota'a so Jesucristo, qaiyi so'maxare ỹa'deenaxanaxanegue na lelaatqaipi dá'maq sqaỹaloq re'oq. Ca' so Jesucristo ỹa'deenaxanaxanegue dajo leuanaxanaxac najo lelaatec Juan, chicqochigui nqai'en so lelaatec piguim le'ec. 2Ca' lliqueta dá'maq ỹa'xat quesá'ogue só'maq iuana, quiyim ỹa'xat na la'qaatqaipi ñi qota'a, dá'maq shi'co' i'taxajñi so Jesucristo.
3Chalego la'maxa quecá'maq retaqalec anajo lere, chaqai chalego la'maxa quecá'maq na'xaỹaxantac quiyim qaretaqalec dá'maq na'qaatec chicqo'ot ñi qota'a, chaqai quiyim ỹaatqajam huelec dá'maq qoỹeretalec anajo lere, ma' mashic tot qoỹoqaque ca lqodoc quiyim re'oq ná'ogue najo.
So Juan ilata aso lere saua siete 'lauari neetalgoto ná'maq mashic icoñiguit da na'qaatec
4Aỹim Juan, selatalo ana ỹerecse naua siete 'lauari neetalgoto ná'maq mashic icoñiguit da na'qaatec quená'maq neetalec yi 'laua Asia. Qamiri ỹaqaỹaripi, sahotaque quiyim coñiguit da qouagaxa chaqai da na'maxa chicqo'ot ñi qota'a, ñí'maq chaqai'en 'ue, ñí'maq chaqai'eno' 'ue quen, chaqai ñí'maq sqaica lqodoc quiyim 'ue. Chaqai chicqo'ot na siete nelaatqaipi se re'xogui reloqotau'a yi nqa'xanqa' ñi'maxare. 5Chaqai qai'neeta chicqo'ot so Jesucristo só'maq netaxaỹaxanqajnec ishit qoyiuelec ca la'qaatec, chaqai chaqaiso só'maq 'au qanca'laxatec queso nelauaxa, chaqai chaqaiso só'maq lashi na nashillipi hueetalec ana 'laua. So Cristo só'maq qare'xoren, ca nquiỹoorec saua qarasauaxasete', quiỹoxonalo sauá'maq chi leuo', 6chaqai ỹo'uet quiyim qomi' nashil chaqai quiyim qomi' letaxaỹaxanqajanqa quena qomyipi quiyim so'ueenataxanqot ñi leta'a qota'olec. Ca' da lauaq chaqai da lquesaxanaxa sqaica lqodoc chaqai'en lalamaxarete' so qara'gaxala'. Ajá'a, chaqaida 'neeta dajo.
7¡Ñaq ra'iiguit, na Cristo naquetaugui na naueguelec! Ca ná'ogue iuañi'chiguit ma'le, vire'ta ná'maq coñirqachit iuana ma'le. Chaqai ná'ogue na ỹoreta'oguit qomyipi hueetalec ana 'laua ỹaatqajam noỹentagui ma' idaana'guit. Ajá'a, ca' chaqaida 'neeta ma'le.
8Ca' 'naac ñi qara'gaxala': “Chaqaỹim ná'maq ỹim 'auaxaic, chaqai spa'aatec”, 'naac ñi qara'gaxala' ñí'maq sqaica lqalanec, ñí'maq chaqai'en 'ue, chaqai ñí'maq chaqai'eno' quen, chaqai ñí'maq naata'quena ma'le.
Dá'maq 'neeto' na' qaiuana da lauaq so Cristo
9Ỹim Juan, ỹim rqaỹahi, ỹim salequeta'guita quiyim i'xoyaxaua' qamiri, queda lo'ueenataxanaxac ñi qota'a chaqai queda qareualaxavic ỹaanema qomi' so Jesucristo. Ỹim ncoñiiteguesec na'le, senta'ñi ada delec leenaxat Patmos, sasougui quiyim sa'xatetac da la'qaatec ñi qota'a, dá'maq shi'co' i'taxajñi so Jesucristo. 10Chaqai hueetougui so na'xa'a quiyim qaimaqachin so qara'gaxala', ca na' ỹovita aỹim so lquesaxanaxa so Espíritu Santo. Ca' 'ue so sa'xaỹaque nivillaxac ỹaatqajam lam, 'maqa'tegue da ilaq, da lelamaxa 'ec aca npe'te. 11Ca 'naac caỹim:
—Ỹim ná'maq ỹim 'auaxaic chaqai spa'aatec, shintam aca la'auaxana na nerqaipi, chaqai aca pa'aatec. 'Chirelec maca lere dá'maq huañita. Ime, ca' lachitalo naua siete 'lauari neetalec ná'maq mashic icoñiguit da na'qaatec quiyi 'laua Asia: neralec yi Efeso, Esmirna, Pérgamo, Tiatira, Sardis, Filadelfia, chaqai yi Laodicea.
12Na'le, ca' ñaqalgoxoñi, ma' sahotaque seuana negue' só'maq sa'qaataque retaqatac. Ca na' ñamatashiguim, ca seuane'talo saua siete ncoỹeraxanaxaqui', ta'ta'a 'oro. 13Ca' quena lavinñi' saua siete ncoỹeraxanaxaqui', ca seuane'ta so 'ec so ỹale llaalec, qam saua loho novirerañi quenaua lapiaate', chaqai so nosaataxaqui 'oro naquejlec ana lotogue. 14Chaqai na lqahic laue ỹaatqajam ỹalagaq 'ec na qagreta laue lalagaxaic, loqo'm 'ec ana loñi. Chaqai naua nqote' 'ec norec lauaq. 15Chaqai naua lapiaate' qashilgue' 'ec na bronce nquiỹocsec chaqai nqatelecsec queca nqatelaxanaxaqui. Chaqai da lavillaxac 'ec da lelamaxa na lo'paxa ana huaaxai. 16Chaqai queda loic lo'qoota'alo saua siete huaqajñi. Chaqai quena lap chicqaugui so lecat ỹaatqajam ỹaxaraic, dos llaaxa'. Chaqai na lashic 'ec añi ra'aasa quena' ỹaatqajam quesaxan da lauaq.
17Ca na' seuana, ca' seuañi, 'ec yileu. Qam so'maxare ỹashil-lec aỹim, ỹahote'e da loic. Ca 'naapiguiỹa':
—Totaxan ro'chi'i'. Ỹim na' ỹim 'auaxaic, chaqai aỹim ná'maq spa'aatec. 18Ỹim ná'maq yca'leetauec. Ma' yileu na'le, qam nagui, ca' sqaica lqodoc quiyim yca'leetauec. Ỹim llo'qoota'alo soiquenta'pe naua lauaatqate da nelauaxa chaqai quecá'maq lapooqo' na lqui'i na leuaxaiquipi. 19Ca' 'chiriñi ná'ogue ná'maq huañichirigui, quená'maq 'ue nagui, chaqai quecá'maq 'ue ma'le. 20Ca' dajo dá'maq leloxoỹaxague' se re'xogui taỹauguilo saua siete huaqajñi huañichiriguilo llo'qoota'alo queda ỹoic, chaqai quesaua siete ncoỹeraxanaxaqui' 'oro: saua siete huaqajñi taỹaugui quiñi 'óna nelaatec quená'maq reloqota'a ná'maq mashic icoñiguit da na'qaatec neetalgoto yaua siete 'lauari, chaqai saua siete ncoỹeraxanaxaqui' taỹauguilo sauá'maq neetalgoto yaua siete 'lauari.
