Salmos 98

₁¡'Viiñii ca dalaxaic no'ueenec quiñi qara'gaxala',

ma' ñi'maxare chalego loyac dá'maq ỹo'uet!

¡Ma' ỹovireta'a doxonaxana

da chalego lecaic lquesaxanaxa da lqai'laxat co'teeta!

₂Ñi qara'gaxala' na'le ỹa'xateta'guit quiyim rauegaxan,

ñi'maxare re'oq nqai'en dá'maq no'uen lo'ueenataxanaxac,

ỹauanchigui nqai'en ná'ogue na ỹoreta'oguit qomyipi quena 'laua;

₃ỹaatqajam se coua'e da le'xorenataxanaxa

chaqai da laqamaxa quena llaalqaipi so Israel.

¡Qaiuana quenaua'que naua lahil na 'laua

quiyim rauegaxan ñi qota'olec coqomi'!

₄Netooñitac 'ueenaxañitalec ñi qota'olec,

qamiá'ogue ná'maq ñiitalec na 'laua;

ỹaatqajam 'xañite'uegue da netoonaxaguii

'ueenaxañilec queca no'ueenec.

₅'Viiñii ca no'ueenec quiñi qara'gaxala',

cuañitegueñi ca lelamaxa aca neviigue leenaxat arpa,

cuañitegueñi ca lelamaxa na neviiguellipi 'ue na lequeeteripi.

₆Netooñitalec da ro'viiñigui quiñi qara'gaxala' ñí'maq nashi,

cuañitapigui da lelamaxa ana npe'te.

₇Rauaxan da lelamaxa ana huaaxai chaqai ná'ogue ná'maq hueetañigui,

na 'laua chaqai ná'ogue ná'maq hueetalec;

₈ỹouaxanta' naua napoquena na lachiuguellipi,

chaqai lapoỹata' na quemaralgoto qa' ladocaipi,

ca' ỹaualqagui queda netoonaxac,

₉reloqoto'ot ñi qara'gaxala' novi' quiyim ỹoiquentac na 'laua.

Ñi'maxare ỹoiquentac ma'le na qomyipi quena 'laua,

ỹa'maqachiguiñi da lo'ueenataxanaxac, ná'ogue naloqojne'ejta'.