Salmos 95

₁Nahiquena, so'ueenaxanqatalec ñi qara'gaxala', ñitoonqatac;

so'ueenaxanqatalec ñí'maq quepaqataxanteguelgoto qomi' chaqai qarca'laxaqui.

₂Senoxonaxau'a, sachoqotaho da qana'aachic,

chaqai so'ueenaq ca no'ueenec, semaqachinqatac.

₃Ma' ñi qara'gaxala' chaqaiñi ñi qota'olec lodegaxat,

chalego lecaic lashi ná'ogue na nashiilqaipi nqolaquipi.

₄Ñi'maxare lo'qootañi

ná'maq paguec qoỹoqochi'ña pa'ỹaañi quena 'laua;

looỹaco nauá'maq paguec qoỹoqoshi'mque quemaralgoto qari.

₅Ana huaaxai lalamaxarete ma' chaqaiñi lo'ueenata;

¡ỹahota'ahi naua lqai'laqate' na' ỹo'uet na 'laua!

₆Ỹalahi, sa'daqaiñi naua qare'cootal;

sa'daqoto naua qare'cootal ñi qara'gaxala',

ma' ñi'maxare qomi' lo'ueenatqa.

₇Ñi'maxare qota'olec coqomi', chaqai qomi' lalamaxarete';

'ec qomi' qagreta lqui'ỹaxanata.

Na'xaỹaxañiỹa dá'maq 'naac nagui ñi'maxare caqamiri:

₈Totaxan 'ñaxachii añi re'taxanatahi, 'ec na'le quiyi Meriba,

'nejem so na'xa'a quiyi Masah, quiyi 'laua qaica qom,

₉na' yi'guen so 'auaxaic qataa'illipi,

'eno'm mashic iuana da ỹo'ueenataxanaxac.

₁₀Quecaua cuarenta ñaxari

so'ootapega so qomyipi,

chaqai shinac: Najo qomyipi chalego da llitaxanaxac;

¡se na'xaỹaxanalo naua ilaataxanaxaco!

₁₁Ca na' so'o, ca' saanec da ỹa'qaatec

quiyim se inoxona'a ma'le yi ñco'matqa'.