Ñi qara'gaxala' qare'guenaxala'
1Cá'maq hueeto'ot da lquepaqataxanaxac
ñí'maq qoỹoqoshi'megue chaqai qaica lqalanec qota'olec,
2ca'maxare 'naac quiñi qara'gaxala': Chaqaqami' ná'maq si'iito'ot,
chaqaqami' i'guenaxala', ¡qami' qota'olec, spi'ỹa'a qami'!
3Qaiñiita ñi'maxare ishit ro'ootaxanlec qami'
caca noqoina se re'xogui chaqai na 'ueenataxac ralauataxan,
4ma' quepaqataxanlec qami' quenaua laua',
ca quiyim vi'so'oto, ca' qaica ca rovichiraque.
Ca ma' ipaquichiguilo naua la'qaatqa,
naua'maxare 'ec aca nquepaqataxanqate caqami'.
5Totaxan ro'chitalo naua lichico naua piri,
chaqai na novic qaỹahinec quiyi na'xa'a,
6chaqai naua nanatqa novirero quena' napalñi,
chaqai nauá'maq ralauataxana'pe quena' richiguiñi,
7ma' no'm mil ca ileu pa'aata'gue da nemaqai'
chaqai diez mil queda qatoiqui',
qam caqami', ca' qaica canchaqaica.
8Ta'ta'a quiyim chaqai huañita:
'ajñisac ma'le na hualoxonyipi ma' icoñiguit ca nouaxanaxaset.
9Ma' mashic 'guiñitot ñi qara'gaxala',
chaqai quiyim ñí'maq qoỹoqoshi'ma quepaqataxanlec qami',
10ca' qaica ca taalec qami' quena se no'uen,
vire'ta na nalolaxa se ỹovira'a ca ra'aachi';
11ma' ñi'maxare ila' ma'le na lelaatqaipi piguim laseripi,
ca na'maxare reloqota'a qami' quecanchaqai vi'sa'gue.
12Nanojshiguim qami' quenaua lqai'laqate',
qaiyi qaica ca roqopia'guita naua qapiaachichi' quena qa'.
13Ca shichi' qui'sañigui ca sauaxaic leta'allipi,
chaqai na iseripi leta'allipi chaqaiquipi chaqai na nanaiquipi.
14Ca' ñi qota'olec 'naac:
Ỹim ñca'laxatec quená'ogue noxonaxanaxaquipi
ma' ca'maxare nqo'chiiua' chaqai iuañiua'.
15Ma' roỹaxanaque aỹim, ca' sasaachiguit;
¡ca chaqaỹim ná'maq iỹaatac ma'le!
Ñaqata'a quenaua le'xoyaxaco,
ca so'uet quiyim 'xoic na imaqachin;
16ca' saanem quiyim ỹaatqajam ladoc da nachaalataxac:
Ca ¡so'uet quiyim ỹovirau'a da ica'laqataxanaxac!
