Salmos 71

₁Qami' ỹa'gaxala', se'guenot qami', ca 'ootaxañirelec aỹim,

'neeto' pi'it nqai'ñi' aỹim.

₂¡'Ootaxañirelec aỹim, ca' yca'laxachirec,

ma' qami' huagaxaraic!

Qouaquiric, na'xaỹaxañiriua' chaqai yca'laxachirec.

₃'Ñiisari' aca quemaralec qa' ladocai quepaqataxanteguelec aỹim,

¡'ñiisari' ca 'imec i'guenaxaqui chaqai ica'laxaqui!

¡Ma' mashic qami' qa' ñañoqotaxaqui chaqai iuo' i'guenaxaqui!

₄Qami' qota'olec caỹim,

yca'laxachirec, qaiyi se yaqajñi na hualoxonyipi,

qaiyi se yaqajñi ca lauataxanaxai chaqai na qa'uaiquipi,

₅ma' qami' ỹa'gaxala', shi'gue na' ñaqai ỹim ne'necoqui'

'ue da ipe'e caqami' quiyim qaicanqaida caỹim.

₆Ma' na' ñaqai seuetaho

chaqa'ma' sashiltau'a qami'.

¡Ca ñi'qaañi nqai'ñi'!

¡Ca' se neme quiyim semaqachintac qami'!

₇Ỹaatqajam 'xoic na 'ue da le'laxa caỹim,

qam qami' ná'maq qami' i'guenaxaqui.

₈Yá'ogue yi na'xa'a

semaqachintac da recaiqui';

₉totaxan liỹoqoira'piguito' aỹim ma' ỹim qo'xoỹom;

totaxan yalachi'o' ma' tot qaica ca iquesaxanaxa.

₁₀Na ñpa'guenaxauaripi ná'maq ỹahotaque yalauat,

lapoỹata', na'deenta, ỹahotaque yaqajñi.

₁₁'Nerac: ¡Cuañiỹac, coñilec,

ma' ñi qota'olec shi'gue ca'e,

ca' qaica ca ishit nca'laxatec!

₁₂Qami' qota'olec, totaxan ỹoxe'oga qami' caỹim;

¡chaqa'ma' nanaqui' yotauañi'!

₁₃¡Ỹaatqajam 'ue da layiloxo chaqai na'laañi

ná'maq pa'guentac da ñachaalataxac!

¡Ca 'xoic nqai'ñi' ca layiloxo quena liỹaripi

ná'maq ỹahotaque quiyim 'ue ca sasougui!

₁₄Qam ỹim se neme da ỹauaanaxanaxac,

chaqai lama'xa nqo'neetauec quiyim semaqachiñi';

₁₅Yá'ogue yi na'xa'a sa'xatetac

quiyim qami' qarca'laxachirec chaqai 'viichi' da ỹa'maqachiguiñi coqomi'.

¡Ca' dajo ỹaatqajam se sa'den ca reloqo'tegue!

₁₆Qami' ỹa'gaxala', sa'xate' nauá'maq 'viichi' chalego lecaigue';

¡sa'xatetac quiyim qaqamite' qami' huagaxaraic!

₁₇Qami' qota'olec,

qami' yapaxaguiñi' na' ñaqai ỹim ne'necoqui',

qam qaiyiita sa'xatetac dá'maq lecaic da ro'ueenataxanaxaqui'.

₁₈Qami' qota'olec caỹim, totaxan yalachi'o',

'eno'm ma' mashic ỹim qo'xoỹom chaqai 'xoic aca ỹalagaxai,

ma' sahotaque sa'xatetac dá'maq chalego lecaic rquesaxanaxa'e',

sa'xatetapeguem najo qomyipi chaqai ca ñaqai naata.

₁₉Na ỹa'maqachiguiñi ro'ueenataxanaxaqui', qami' qota'olec, ỹaatqajam ỹoviro'ot na piguim;

chalego lecaic da ro'ueenataxanaxaqui',

¡ỹaatqajam qaica ca 'nejem qami'!

₂₀'Eno'm 'xoic na yoviraxachirau'a se no'uen chaqai na ne'xoric,

qam qaiyiita liỹa yca'laxachirec;

'eno'm qoỹoqochi'ña ca seueta'ñi, qam naqachirishiguim aỹim quena 'laua,

₂₁ca nqo'naxachirec ca imaqachic,

ca liỹa lo'daxachirigui iuel.

₂₂Ca quena' ỹim, ca so'ueenaxan, semaqachin quiyim ipaquichiguilo naua ra'qaataxahi',

socantapigui da lelamaxa ana niviigue arpa chaqai ana salterio,

qami' qota'olec, qota'olec quena llaalqaipi so Israel.

₂₃Ca ñitoontac quiyim so'ueenaxantacot qami',

somato'ot qami' da ñachaalataxac, ma' nca'laxachirec.

₂₄Chaqai vire'talo naua ỹa'qaatqa quiyim setaqatac,

shinac quiyim qami' huagaxaraic,

ma' ná'maq ỹahotaque sasougui ca se no'uen

ỹaatqajam chalego na layiloxo.