Ñi qota'olec ỹalequetauguilo qomi'
1Ñi qota'olec quepaqataxanteguelgoto qomi' chaqai qarquesaxanaxa;
chaqai quena' 'ue da qareuogoxo, ca' qarotauan.
2Vichiguiño' se qaro'chi
'eno'm sogui na 'laua,
'eno'm iyinñi ana quemaralec qa' ladocai quena lauajñi aso huaaxai,
3'eno'm ilamigui aso huaaxai chaqai naỹoxonshiguim na lo'paxa,
'eno'm i'loxol ana quemaralec qa' ladocai sauaxat da lonogoxonaxac.
4Aso lachiugue chaqai na taỹau'alo ñaachi ỹo'uet da netoonaxac yi qota'olec la'a'
yí'maq paguec co'teeta quena la'aateripi ñí'maq ỹapacauec quená'ogue.
5Ñi qota'olec neetañigui lavinñi yi'maxare chaqai ro'ootaxanteguelec,
ñi qota'olec ỹotauantac quena' sham richiguiñi.
6'Ue da lelamaxa na qomyipi quena 'laua, chaqai i'loxol na nashillipi,
na 'laua sogui quena' qara'xaỹaque quiyim retaqa.
7¡Ñi qara'gaxala' ñí'maq qaica ca lqalanec ỹalequetauguilo qomi'!
¡Ñi qota'olec queso Jacob chaqaiñi ñi quepaqataxanteguelgoto qomi'!
8Nahiquena ñaqai 'ajñii ná'maq ỹo'uet ca ne'laxa
quená'maq ỹo'uet ñi qara'gaxala' quena 'laua:
9ñi'maxare ime nqai'en na lauataxac
quenaua'que naua lahil na 'laua;
ỹaqaguit na no'xoshic,
ỹaqaguitetajlec ana niquillipi,
¡copata'a ana nahoglena lauataxaqui!
10¡Nemanachichii! ¡'Yiiñii'a quiyim ỹim qota'olec!
¡Ỹim spa'aatashiguim quená'ogue na qomyipi!
¡Ỹim spa'aatashiguim quená'ogue na 'laua!
11¡Ñi qara'gaxala' ñí'maq qaica ca lqalanec ỹalequetauguilo qomi'!
¡Ñi qota'olec queso Jacob chaqaiñi ñi quepaqataxanteguelgoto qomi'!
