Saanto'ot da ñaquitaxac ñi qota'olec
1Ỹaatqajam shintari' ca peele ỹalauat laquip, imitetaque ca huaxaỹaq,
chaqaida shintari' sedaantaque qami' qota'olec.
2'Eco' ỹaatqajam 'xoic da ỹaquip quiñi qota'olec, ñí'maq chicqo'ot da nca'laxa.
¿Chi' laquio' liỹa ñovira'a ñi qota'olec?
3Quiyi na'xa'a chaqai quiyi pe 'ec sa'queeta'pe naua ỹachi',
qam se neme quiyim qayinatetac:
¿Hueeta'gue ca qota'olec caqami'?
4Ca quena' sa'deentaque dajo,
ca' ñañaañiguit da nqui'ic.
So'leente'te quena' salequeta'guit so qomyipi,
sauequetau'a añi no'ueenaxanaxaqui quiñi qota'olec,
ỹaualqatagui queda netoonaxac chaqai da na'aachicyaxac.
¡Ca' chalego lemaqachic quena'le!
5¿Chi'negue queta' yiualtegueñi?
¿Chi'negue queta' 'ue ca hueetapigui iuel?
Ma' da ñaquitaxac saanot ñi qota'olec,
Ñí'maq ỹim shiquetalec semaqachintac.
¡Ñi'maxare qota'olec caỹim chaqai ica'laxaqui!
6Ỹaatqajam 'xoic na i'miaqataxanaxa.
Vichiguiño' ỹaatqajam sa'deentapega quen qami'
quena' seuete'e yi 'laua huaugui aso lachiugue Jordán
chaqai cada qoỹoqoshi'megue qa' ladocai leenaxat Hermón chaqai yi Mizar.
7Ca qara'xaỹa quena tocot qoỹoqochi'ñigui
ca lelamaxa na huaxaỹaq;
na 'xoic huaxaỹaq remaxashiqui' quiyim queeteguelec aỹim.
8Quiyi na'xa'a noviriua' da le'xorenataxanaxa ñi qara'gaxala',
chaqai quiyi pe, ca' se neme da ỹo'ueenaxanaxac
chaqai da ñqouagaxainaxac quiñi qota'olec, ñí'maq chicqo'ot da ica'laxa.
9Ca' shinac quiñi qota'olec ñí'maq ro'ootaxanteguelec aỹim:
¿Chi'negue ma' coua'ire'e aỹim?
¿Chi'negue queta' sachicota
chaqai quiyim ypataqatañi na ñpa'guenaxauaripi?
10Ỹovire'talo naua ipi'naqa seuete'
paguelec na la'qaatqaipi na ñpa'guenaxauaripi,
chaqai quiyim se yayaxanac yinatetac:
¿Negue' ca hueeta'gue ca qota'olec caqami'?
11¿Chi'negue queta' yiualtegueñi?
¿Chi'negue queta' 'ue ca hueetapigui iuel?
Ma' da ñaquitaxac saanot ñi qota'olec,
Ñí'maq ỹim shiquetalec semaqachintac.
¡Ñi'maxare qota'olec caỹim chaqai ica'laxaqui!
