Yqo'ta so'uet dá'maq vi'saque, qami' qota'olec
1Saanot da ñaquitaxac ñi qara'gaxala',
ca ñi'maxare nqai'guiñi, ma' ỹahotaque 'xaỹa da ỹaualaxac;
2yca'laxatec queso ỹaatqajam nelauaxa,
yanojshiguim na' sham ya'pishiguim.
Co'ỹaxanlgoto naua ipiaate' ada qa',
ca' ỹa'ñaxateguelo naua ichil quiyim yco'ỹaxanñi.
3Ca chicqotougui na ỹap nqai'en so dalaxaic ỹo'ueenec,
so no'ueenec imaqachintac ñi qota'olec.
Ca 'xoic ná'maq i'laq na' iuanchigui dajo,
ca' 'ue da lpi'ỹaxac quiñi qara'gaxala'.
4¡Chalego la'maxa queca qom quiyim pi'ỹa'a ñi qara'gaxala',
chaqai se idaanaque ná'maq se no'uen da llicyaxac,
chaqai ná'maq nqouagaxaintacot na nashiilec nqolac!
5Qami' ỹa'gaxala' chaqai qota'olec caỹim,
'xoic ná'maq imaqachin qami' quena ro'ueenachiqui'
chaqai quiyim 'yiiñisapegalo qomi'.
¡Qaica ca 'nejem qami'!
Sahotaque quiyim sa'xat da'maxare,
qam ỹapaquerauec quecá'maq sa'xat quet.
6Qami' se rqo'chita na qaỹavigaxat nachitaxanataxanaxat
chaqai ana la aca nanecse qoỹaantapego;
chaqai sqai vi'saque quiyim 'ue ca qaicopata'a
chaqai aca nachitaxanataxanqate quiyim qaỹapalaxat ca nasauaxaset.
Qam qami' huachiriguilo naua ique'laa lauaco.
7Vichiguiño' shinac: Ỹim seuete'e najo,
ma' chaqaida dá'maq qoỹeretañi caỹim cayi lere.
8Ỹim yqo'ta quiyim so'uet cá'maq vi'saque, qami' qota'olec caỹim;
¡da rapaxaguinataxanaxaqui' selliitagui añi i'taxanata!
9Ỹauanchigui nqaishin na 'xoic ralamaxarichi'ipi
quiyim sachaxan dá'maq ỹaatqajam 'maxaraic.
¡Qami' ỹa'gaxala', ỹaatqajam 'yiiñite' quiyim se yi'maqata!
10Chaqai se yi'maqata, ta'ta'a quiyim sa'xat da no'uen ro'ueenataxanaxaqui';
sa'xatetac quiyim ipaquichiguilo naua ra'qaataxahi' chaqai da rca'laqataxanaxaqui'.
Sqai soxojñi da re'xorenataxanaxa'e' chaqai quiyim lliqueta da ra'qaachiqui'
quena 'xoic ralamaxarichi'ipi.
11¡Qam qami' ỹa'gaxala', totaxan 'xañiriñi quiyim yiñiiquiñi'sac!
¡Se neme quiyim 'ootaxañiseguelec aỹim queda re'xorenataxanaxa'e' chaqai quenaua lliquete' ra'qaataxahi'!
