Salmos 33

₁'Ueenaxañilec ñi qara'gaxala', qamiri ỹale' huagaxaraqa;

queda lavillaxac na huagaxaraiquipi 'ue da loyac da no'ueenaxanaxac.

₂'Ỹaañiỹot da na'aachicyaxaguii ñi qara'gaxala', viite'e ana niviigue,

quiyim 'viiñii ca no'ueenec, qam viite'e aca niviigue,

₃'viiñii ca dalaxaic no'ueenec,

¡vigaxañii, qam maqachiñii ca riviigaxanaxaguii!

₄Naua la'qaatqa ñi qara'gaxala' ỹaatqajam lliquete';

ca' na lo'ueenataxanaxaquipi ichoxot quiyim ñi'maxare ipaquichiguilo naua la'qaatqa.

₅Ñi qara'gaxala' nqo'ta da neuagaxaric chaqai da 'maxataxaric;

¡da le'xorenataxanaxa ỹomatalec ná'ogue na 'laua!

₆Na piguim chaqai ná'ogue na hueeto'ot lo'ueenatec ñi qara'gaxala', ỹahote'e da la'qaatec

chaqai petelec quiñi lap.

₇Ñi'maxare lapoonta' chaqai ỹa'maxat

na huaxaỹaq caso qoỹoqochi'ñigui huaaxai.

₈Maqachiñii ñi qara'gaxala' ná'ogue na hueetalec na 'laua,

qaimaqachin quená'ogue na qomyipi quena 'laua.

₉Ma' ñi'maxare na' retaqa, ca ná'ogue 'ue;

chaqai na' ỹaanec da la'qaatec, ca ỹomat na lo'ueenatqaipi.

₁₀Ñi qara'gaxala' se ipaguigui nqai'en da 'neeta'pegue

na qomyipi sqai huelec ñi'maxare,

₁₁qam ná'maq 'neeta'pegue ñi qara'gaxala'

qaica idaxan, chaqaidaata da 'neetari'.

₁₂Ỹaatqajam chalego la'maxa ca qom quiyim chaqaiñi ñi qota'olec ñi la'gaxala',

cá'maq lca'acseripi ñi'maxare quiyim lalamaxareteripi.

₁₃Ñi qara'gaxala' na'iitañi queda piguim,

ca' ỹa'ajantac ná'ogue na qomyipi;

₁₄chaqai quecá'maq neeta'ñi ñi'maxare

na'iita'ña na hueetalec na 'laua;

₁₅chaqaiñi ñí'maq lo'ueenata ana ne'taxanataipi

chaqai ỹa'ajantac ná'ogue ná'maq ỹo'uet.

₁₆Qaica ca nashi nca'leuec, 'eno'm 'xoic ca nalliripi,

vire'ta se nca'leuec na 'ñaaxaiquipi 'eno'm 'xoic da lquesaxanaxa;

₁₇na shipiguiripi qaica ma' 'ue quet ca nca'laxatec;

'eno'm chalego da lquesaxanaxa,

qam qaica quet cá'maq ishit nca'laxatec.

₁₈Qam ñi qara'gaxala' se neme cochiitapega ná'maq imaqachin ñi'maxare

chaqai pi'ỹa'a da le'xorenataxanaxa,

₁₉ca nca'laxatec queda nelauaxa,

chaqai nca'laxatetauec quena' novi' na nqopaaxa.

₂₀Qomi' spi'ỹaaqa'a ñi qara'gaxala';

¡ñi'maxare qarotauan chaqai quepaqataxanlgoto qomi'!

₂₁Añi qare'taxanata netoon quiñi qara'gaxala';

ỹaatqajam spi'ỹaaqa'a dá'maq co'teeta leenaxat.

₂₂¡Se neme sqo ỹoxe'oga coqomi' da re'xorenataxanaxa'e', qami' qara'gaxala',

ma' chaqaida dá'maq sahoqotaque caqami'!