Salmos 32

₁Ỹaatqajam chalego la'maxa queca ỹale

quiyim na lo'maxac chaqai na lasauaxaset ná'ogue mashic qaỹapalaxat.

₂Chalego la'maxa ca qom quecá'maq ñi qota'olec se ỹa'ue ca lasauaxaset

chaqai quiyim sqai hueetagui ca na'maachic.

₃Na' saqa' sa'xat na ỹasauaxaset,

na ỹoshicmaxa se no'uen da 'neetari',

paguelec na ỹaualaxac quenaua'que naua na'xata',

₄ma' quiyi na'xa'a chaqai quiyi pe

ñauateta'guit da lesallaxa na rqai'laxachi'.

'Ec ana lenoỹaxai ỹasoxot na npa'ỹaaxa quiyi ñaaxa,

ca' chaqaida dá'maq 'neeta dá'maq shintari' na'le.

₅Qam sá'ogue sichoxotem qami', qaica ca se sa'xat

da ỹasauaxaset chaqai da ỹo'maxac;

taachigui na iuel sa'xatem qami' na ỹasauaxaset,

ca' qami' ỹa'gaxala' palaxachi' sá'ogue.

₆Vichiguiño' quena' 'ue da neuogoxo,

ca ỹaualqot qami' ná'maq queetalec qami',

chaqai no'm 'xoic ca huaxaỹaq, ca i'paxanlec,

qam se ỹovitoto caua'maxare.

₇Qami' ná'maq qami' i'guenaxala':

'ootaxañirelec aỹim quenaua lichico,

yahiquinchiguiñi na laualaxac na huegaxanaxaiquipi.

₈Ñi ỹa'gaxala' 'naac:

Ỹim sa'ajantac qami'.

Chaqai 'ue ma'le ca sapaxaguiñitegue,

ỹaatqajam sapaxaguinta qami',

sachaxan ma'le ca nayic quiitetegue.

₉Totaxan 'ñiite'm ca que'laic loqo'm ca shipgaq

sqaica ca la'deenataxanaxac,

chaqai qanollaañi queda lpotorishic,

qaỹahota'ahi la'gaqa chaqai lapse',

ma' no'me', ca se nqo'neu'a qami'.

₁₀Quena hualoxonyipi 'xoic ma'le ca nqui'ic,

qam da le'xorenataxanaxa ñi qara'gaxala'

nquepaxachichiguiñi ná'maq pi'ỹa'a ñi'maxare.

₁₁Netooñigue ñi qara'gaxala',

qamiri ỹale' huagaxaraqa chaqai 'maxataxaraqa;

¡netooñitac chaqai raualaxahi queda netoonaxaguii!