Salmos 2

₁¿Chi'negue ma' leleetecta' ná'maq ỹoreta'oguit qomyipi, ná'maq sqai huelec ñi qota'olec?

¿Chi'negue ma' ỹo'ueetetac na na'deenaxaquipi qaica ca 'negue?

₂Ná'ogue na nashillipi quena 'laua,

na'maxare sqai huelec, ca' lapoỹata',

ca npa'guene'e' ñi qota'olec chaqai ñi nashi lca'acsec.

₃Ca' ỹaualqatagui, 'naac:

¡Ñaqataq na lequeetenaxanqateripi coqomi'!

¡Ñosoqa'ahi naua lcoñiitaxanqate'!

₄Ñi qara'gaxala' qota'olec ñí'maq nashi queda piguim

chi raỹalegueretac i'neetac na'maxare.

₅Ime, ca' ro'o, ca qo'ỹoqochit;

ca na' ỹaatqajam paguec da lauel, ca 'naac:

₆Mashic shi'gue sano quiyim nashi quiyi Sión añí'maq ñaqa' co'teeta.

₇Ỹim sa'xat dá'maq ỹahotaque ñi qota'olec:

ñi'maxare 'naac caỹim: Qami' ná'maq qami' ỹaalec;

nagui, ca' ỹim qataa'i'.

₈Yashiila'e' quiyim saañiraxarom quiyim ralamaxarichi' ná'ogue na ỹoreta'oguit qomyipi

chaqai ỹovira'a ca lqodoc na 'laua,

ca' saanem qami' quiyim ralamaxarichi'.

₉Ca' viise'e ca rashillichi' lecat, ca nopoxoỹaxachiriñi na nashillipi;

¡ca poxoỹaxachirigui 'ec nqai'ñi' aca 'ueena 'laua!

₁₀Ca' qamiri nashillipi chaqai na'gaxalateripi quena 'laua, 'yiiñita dajo ma'le,

¡ỹaatqajam napaxaguiñiỹa ma'le dajo qaỹa'xatetac!

_11-12Nqouagaxaiñiỹot ñi qara'gaxala' qota'olec, qam ra'maxaichiguiñi chaqai ỹaatqajam ro'chiỹa;

'yiỹoto naua re'cootallii ñi'maxare, qam re'loxollitari',

'neeto' lotqai ro'o,

ca' qamiri rillivii quena nayic,

ma' da lonogoxonaxac ỹaatqajam se neme quiyim nachipishiguim.

¡Chalego loyac ca qom cá'maq idaantaque quiyim qaiquepaqataxanlec quiñi'maxare!