Salmos 146

₁¡Qaimaqachin ñi qara'gaxala' qota'olec!

Semaqachin ñi qara'gaxala' quedá'ogue da ñachaalataxac.

₂Semaqachin ñi qara'gaxala' quiyim ñaqai yca'leetauec.

So'uen ca no'ueenec quiñi qota'olec caỹim quiyim ñaqa 'ue aỹim.

₃Mesqai hueeto'ot nqai'ñii ca naquitaxaguii ca qom 'ue nqai 'negue,

quecá'maq chaqai qom se ca'laqataxan,

₄ma' quena' ileu, ca' pilougui na 'laua,

ca' chaqaica cá'maq na'xa'a, ca imeuo na na'deenaxaquipi.

₅Chalego loyac quecá'maq qom qaỹotauan quiñi nqota'olec so Jacob,

cá'maq ỹomato'ot da naquitaxac quiñí'maq qara'gaxala' qota'olec.

₆Ñi'maxare ỹo'uet na piguim, 'laua, chaqai ana huaaxai,

chaqai ná'ogue ná'maq hueetaugui na'maxare.

Chaqai chaqaidaata 'neetari' da la'qaatec, se ỹadalaxat.

₇Qoshiilec ná'maq se qaỹa'maxata'gue

chaqai ỹa'ue ca loq na qopaaxaiquipi.

Ñi qara'gaxala' souec nqai'en na ncoñiitecseripi;

₈ñi qara'gaxala' liỹa neuanñi nqai'en na qai'laq;

ñi qara'gaxala' nanojshiguim ná'maq mashic huaañi;

ñi qara'gaxala' i'xoren ca ỹale 'maxataxaraic;

₉ñi qara'gaxala' ro'ootaxanlec na ỹoqa'a ca chicqa'gue,

qui'ỹaxan na na'peloq chaqai ana pa'ỹe,

qam na hualoxonyipi ỹit nqai'en ca llicyaxac.

₁₀Ca' qami' na'a' lodegaxat Sión,

ñi qara'gaxala' se neme quiyim nashi;

ñi qota'olec caqami' sqaica lqodoc quiyim nashi.

¡Qaimaqachin ñi qara'gaxala' qota'olec!