Salmos 139

₁Qami' ỹa'gaxala', qami' ya'ajñisac chaqai ya'yiiñi';

₂qami' 'yiiñi' ná'ogue ná'maq so'uet;

chaqai ñaq qoỹoqo'ta aỹim chaqa'ma' 'yiiñi' da ỹa'deenataxanaxac.

₃¡'Yiiñi' naua'que naua ỹouoxoco,

'yiiñi' ná'ogue ná'maq so'uet!

₄'Eno'm saqa' sa'xat ca ỹa'qaatec,

qam qami' ỹa'gaxala', shi'gue 'yiiñi'.

₅Ỹaatqajam qaica ca idaaqa' nqai'ñi' yahiquinchiriñi;

nalojlec nqai'ñi' aỹim da rqai'laxachi'.

₆Chalego lecaic dá'maq na'deenaxanaxa ỹaatqajam se sovi';

¡chalego lishicshi'megue, qaica quet cá'maq ñaquitetaque quiyim sa'den quet!

₇¿Negue' queto' ca saigue, qaiyi qoỹoqo'ta ỹim queso ne'espíritu'e'?

Chaqai ¿negue' queto' ca saigue, qaiyi sqo vichiriua'?

₈Queta' ỹim saashiguim quena piguim,

qai'neeta chaqaiyi viise'e;

chaqai queta' sa'ñigui da lauajñi na 'laua,

qaiyiita viisa'ñi yi'maxare;

₉chaqai quet ñaỹoshiguim, saigue da lqodoigue,

loqo'm queta' sena'gue da lqodoc aso huaaxai queda lauashiguim,

₁₀qaiyiita ỹovira'oga ỹim queta'le da rqai'laxachi';

¡qaiyiita da rqai'laxachi' se yayaxanec lo'qootañi aỹim!

₁₁Loqo'm queta' sahotaque ñañoxotougui na napalaxa,

loqo'm ñigui napalaxa ná'maq lauaq coỹaretailec,

₁₂na napalaxa se ishit yayoxojñi caqami',

yi pe richiichiguiñi 'ec nqai'ñi' yi na'xa'a.

¡Yi napalaxa chaqai yi na'xa'a qaican ỹapaguec caqami'!

₁₃Chaqaiqami' ná'maq 'viichi' na'le ná'ogue na ỹoshicmaxa;

'maxachireta' na'le aỹim quena lauel aca ỹate'e.

₁₄Semaqachiñi', ma' 'xoic da i'laxa,

ma' chalego la'maxa dá'maq 'viichi'o' na'le.

¡Ca' quedajo, ca ỹaatqajam sa'yiinchigui!

₁₅Mesqaida quiyim se re'xogui quet dá'maq lqo'naxac na ỹoshicmaxa,

ca dá'maq se re'xogui na' qaya'maxatetegueñi,

na' qayo'ueetetac ỹaatqajam spa'ỹaañom quena 'laua.

₁₆Naua nqochichi' ỹa'ajansac na ỹoshicmaxa na' na'maxatetecta';

dá'ogue dajo naneretañi hueetalec aca nilliri'i'.

Retañite' cá'maq ỹorete' caua na'xata' queda ñachaalataxac

na' saqa'leca canchaqaica queda'maxare.

₁₇Qami' qota'olec,

chalego lecaigue' naua ra'deenataxanaxagohi';

¡quiyim ima'ta', qaica naloqochin na'maxare!

₁₈Quetqai sahotaque ñaloqochin, ca' paguec 'xoic quet quena lo'uaxanaxa;

chaqai queta' somat, qam qaiyiita seueto'ot qami'.

₁₉Qami' qota'olec,

naqachi' da nachaalataxac na hualoxonyipi

chaqai ỹoochire'oga caỹim na lauataxanaxairipi,

₂₀ná'maq se no'uen na ỹa'xatetac caqami',

quená'maq ne'laxashiguim, ỹahotaque nco'ỹa'e' qami'.

₂₁Qami' ỹa'gaxala',

¿se yoquii'o' quen ná'maq qami' loquiiaxat

chaqai se yqo'ta ná'maq queetapegueu'a qami'?

₂₂¡Ỹaatqajam qaica 'nejem da ỹoquiiaxa!

¡Shinta'gue cá'maq ñpa'guenaxaua!

₂₃Qami' qota'olec,

ya'ajñi', 'yiiñira'a añi i'taxanata;

yi'guiñi', 'yiiñira'a da ỹa'deenataxanaxac;

₂₄ya'ajñi' no'm shiqueta'gue ca se no'uen nayic,

ca' yashaxañiri'ñigui ca nayic sqaica lqodoc.