Marcos 3

₁Ca' so Jesús lotqai liỹa inoxonougui aso lapoxoqui na judioipi, ca hueeta'ño'yi so ỹale ỹaatqajam rashivita da lqai'laxat. ₂Qam 'uo' na ỹalequetaho quiyim chi nauaanta'a so Jesús quiyim ratarenataxañigui so na'xa'a co'mataxaqui, qaiyi ishit quiyim qohinac 'ue ca lasauaxaset so'maxare. ₃Ca' so Jesús 'naapego' só'maq ỹale rashivita so lqai'laxat:

—Ne'laxachirishiguim, ca' nachaachiriñi quena lavinñi.

₄Co'na' ime, ca inato' so qomyipi:

—¿Negue' cá'maq qaỹa'maxarenta quiyim qaỹo'uet quiyi na'xa'a co'mataxaqui, cá'maq ỹa'maqachiguiñi, loqo'm ca se ỹa'maxañi? ¿Qanca'laxatec ca qom, loqo'm qaỹalauat?

Qam saua'maxare i'marete', qaica ca retaqa. ₅Co'na'le, ca so Jesús ro'oogui na' ỹamataugui so qomyipi. Ca' 'ue da lachicoxo, ma' saua'maxare se na'xaỹaxane'. Ca 'naapego' só'maq ỹale:

—Ỹeguec nqai'ñi' na rqai'laxachi'.

Ca' ỹeguec nqai'en da lqai'laxat, ca chaqa'ma' imeuec. ₆Co'na'le, ca inoxonec so fariseoipi, ca ta'oga na nalliripi so Herodes quiyim qaretaxaỹapigui cá'maq qohinta'gue quiyim qaỹalauat so Jesús.

₇Qam so Jesús eec liỹareta'pe saua lapaxaguinatqa, querepegue' so lemanaxa aso latogot late'ogue'. Ca 'xoic so qomyipi quegue so'maxare, chicqochi'ñi yi Galilea. ₈Ca co'na' qara'xaiguelec na lecaic ná'maq ỹo'uet so'maxare, ca 'xoic ná'maq nacpegue' so'maxare, chicqau'a yi Judea, chaqai Jerusalén, chaqai yi Idumea, chaqai da lqodoigue queda laseego aso lachiugue Jordán, chaqai quiyi 'laua Tiro chaqai yi Sidón, ma' qaỹahotaque qaiuana so'maxare. ₉Ca vichiguiño' so Jesús chaqa'ma' qatalo saua lapaxaguinatqa quiyim ỹa'maxatesañi aso qom lahi' huaxaỹaqse, qaiyi se qanpataxagui so'maxare queso qomyipi, ma' mashic ỹapaguelec. ₁₀Ma' mashic ỹapaguelec ná'maq ỹomatec so'maxare, ma' ná'ogue ná'maq ralolaxaiquipi nqa'paxana'a, ma' ỹahotaque quiyim ipootau'a so'maxare. ₁₁Chaqai co'quena' qaiuana quena ne'ec lecmaxaic, ca chaqa'ma' ỹa'chi'iñi naua le'cootal quecá'maq reloqota'ñi so'maxare, ca' ỹaualaq, 'naaco' quen:

—¡Qami' ná'maq qami' llaalec ñi qota'olec!

₁₂Qam so Jesús ỹaatqajam se ỹala'gue quena' 'naapega quiyim se ỹa'xat negue' so'maxare.

₁₃Ca co'na' ime dajo, ca so Jesús taashi'megue aso quemaralec ladocai. Ca roỹaxanalo' sauá'maq nqo'teu'alo so'maxare, ca saua'maxare querepegue' so'maxare. ₁₄Ca nca'au'alo saua doce quesaua'maxare quiyim nauegaxaua' so'maxare, chaqai ilate' quiyim ỹa'xate' da na'qaatec. ₁₅Chaqai ỹaanem da lquesaxanaxa quiyim ỹomatec na ralolaxaic, chaqai quiyim ỹo'daauec na ne'ec lecmaxaic. ₁₆Ca' 'enaua naua leenqate' saua doce: Simón, só'maq so Jesús ỹanegue na'aamataxat Pedro; ₁₇Jacobo chaqai so lqaỹa Juan, llaalqa so Zebedeo, sauá'maq ỹanegue na'aamataxate' Boanerges, ca' da reloqo'tegue dajo 'naac, soxonaxa llaalqa; ₁₈Andrés, Felipe, Bartolomé, Mateo, Tomás, Jacobo, llaalec so Alfeo; Tadeo, Simón só'maq chicqaugui na cananistaipi, ₁₉chaqai so Judas Iscariote, só'maq ỹaano' na'le so Jesús.

Ca co'na' ime, ca inoxono' queso 'imec, liỹareta'pe saua lapaxaguinatqa. ₂₀Ca lotqai liỹa lapoỹaho so 'xoic qomyipi, vire'ta ca' se ỹa'maxañi quiyim qui'ỹe'. ₂₁Ca co'na' 'xaiguelec dajo so lauo' laseripi so Jesús, ca' naque, ma' ỹahotaque quiyim ỹauec, ma' qohintapega mashic neleguemaxat.

₂₂Chaqai qai'neeta 'uo' na chicqota'gue da Jerusalén quena rapaxaguinataxanta'pegue na naqataxaquipi. Na'maxare 'naaco':

—Dajo ỹale hueeto'ot ñi Beelzebú ñí'maq lashi na ne'ec lecmaxaic, ca' quedá'maq lquesaxanaxa ñi Beelzebú ro'ootaxantapega quena ne'ec lecmaxaic.

₂₃Ca' so Jesús roỹaxanalo' saua'maxare, ca ỹa'uo' so laloqojnaxanaxaqui, 'naaco':

—¿Negue' quet cá'maq 'neeta quiyim so na'ỹaapec chi no'daalta'? ₂₄Ca nashi no'm noỹojchi na nalliripi, ca' nco'ỹata', ca' cajo nashi da 'neetari' sqai queeta. ₂₅Chaqai cá'maq chi neuo' laseripi no'm noỹojchi, ca' npa'guenta'ta', ca' da 'neetari' sqai queeta. ₂₆Ca no'm so na'ỹaapec ỹoretecchi, ca' chi npa'guenalta', chaqai quiyim ỹora'chi da lquesaxanaxa, ca' sqai queeta da 'neetari'. Ta'ta'a quiyim dajo ỹoviraqteta'a ca lqodoc quiyim imeho.

₂₇Ma' qaica ca ishit inoxonougui ca lauo' ca quesaxanaxaic ỹale ca rouootaxana'gue na louenqaipi, no'm sqai 'au coñirañi. Ta'ta'a no'm 'ne'tegue dajo, ca' qaigueme ishit rouootaxana'gue ca louenqaipi.

₂₈Dá'maq shinac nagui caqamiri ỹaatqajam lliqueta, quiyim ná'ogue na qomyipi ishit quiyim qaỹapalaxat na lasauaxaseteripi, chaqai ná'ogue ná'maq ỹa'xat se no'uen. ₂₉Qam cá'maq se no'uen ca ỹa'xat quiyim retaxaỹa'guit so Espíritu Santo, ca ca'maxare tot ishit quiyim qai'xoren. Ta'ta'a quiyim tot qaỹapalaxat ca lasauaxaset.

₃₀'Eda 'naaco' na'le so Jesús, ma' so qomyipi 'naaco' quiyim 'ue so le'ec lecmaxaic so'maxare.

₃₁Co'na'le, ca ỹovirero' saua lqaỹa' chaqai aso late'e so Jesús, qam saua'maxare pa'aasauec, ca relaataxanda'a so'maxare. ₃₂Ca ná'maq nqa'xantañi lapooto'ot so Jesús 'naaco' queso'maxare:

—Ada qachii'i' chaqai daua rqaỹachi' pa'aasauec, idaansaque aqami'.

₃₃Qam so Jesús 'naaco' quesaua'maxare:

—¿Negue' acá'maq ỹate'e, chaqai cá'maq ỹaqaỹaripi?

₃₄Ime, ca' ra'ỹaugui só'maq nqa'xantañi reloqoto'ot so'maxare. Ca 'naaco':

—Nauajo nauá'maq ỹate'e chaqai ỹaqaỹaripi. ₃₅Ma' cá'maq ỹo'uet cá'maq ỹahotaque ñi qota'olec quiyim qaỹo'uet, ca' chaqaica cá'maq ỹaqaỹa ỹale, chaqai ỹaqaỹa 'aalo, chaqai ỹate'e.