Marcos 2

₁Ca co'na' ỹore'ueguelo saua na'xata', ca' so Jesús liỹa inoxonougui yi na'a' Capernaum, ca qara'xaiguelec so'maxare quiyim hueete'e ca la'a'. ₂Ca cha'ma' 'xoic so lapoỹata' qomyipi, chi ỹovireta'a quiyim qaica ca ledaaqa' ñi lasom ñi 'imec. Qam so'maxare ỹa'xatetac da la'qaatec ñi qota'olec. ₃Ca qanodou'a yi hueeta'ñi so Jesús so ỹale se ra'ñiigue, qane'xateta so'maxare quesaua cuatro ỹale'. ₄Qam ma' saua'maxare se ishite' ỹovirera'a so Jesús, ma' ỹapaguelec so qomyipi. Ca saua'maxare naqate' so lahi na lelaq so 'imec quiyí'maq naloochi'ña so'maxare. Ca quesó'maq nauaatec, ca quiichi'ñigui nqohin só'maq ralolaxaic hueetalec so lacanec. ₅Ca so Jesús co'na' iuana da lpi'ỹaxague' saua'maxare, ca 'naaco' queso ralolaxaic:

—Qami' ỹaalcolec, nagui qaỹapalaxat ná'ogue na rasauaxashichi'.

₆Qam 'vio' saua ỹalequesaho quená'maq rapaxaguinataxanta'pegue na naqataxaquipi, nqa'xansañi, ra'deenataxanta'pe, 'neraco': ₇“¿Chi'neco' dá'maq la'qaatec da ỹale? Ma' napaqueteguelec ñi qota'olec, ma' qaica ca ishit ỹapalaxat ca nasauaxaset, qaiñiita ñi'maxare.” ₈Qam só'maq Jesús chaqa'ma' ỹa'den dá'maq la'deenataxanaxague' saua'maxare, ca 'naaco':

—¿Chi'negue ma' 'ñiita'gue dajo, da ra'deenataxanaxaguii? ₉¿Negue' ca paguec se qalaq quiyim qohinac queca ralolaxaic: “Qaỹapalaxate' caua rasauaxashichichi'”, loqo'm qohinapega: “Ne'laxachirishiguim, nañireta' na qacanqui', ca' qui'”? ₁₀Ca' nagui sachaxanalo qamiri quiyim najo ỹale llaalec 'ue lquesaxanaxa quena 'laua quiyim ỹapalaxat ca nasauaxaset.

Ca 'naapego' so se ra'ñiigue:

₁₁—Shinapega qami' nagui, ne'laxachirishiguim, nañireta' na qacanqui', ca' quirepegue' ca ra'aachi'.

₁₂Ca chaqa'ma' ne'laxashiguim so ralolaxaic, inanta' so lacanec. Ca' ca'e yí'maq hueeta'ñi, ca sá'ogue so qomyipi chi ra'i'tegue. Ca' quedajo, ca sá'ogue 'xoic da le'laxa. Ca' imaqachintac ñi qota'olec, 'naaco':

—Se ỹauanapega 'ue ca seuanqachigui 'nejem dajo.

₁₃Ca co'na' ime dajo, ca' so Jesús lotqai liỹa quepegue' yi lahi aso latogot late'ogue'. Ca co'na' sá'ogue so qomyipi nqo'neu'a so'maxare, ca' ỹapaxaguin. ₁₄Ca co'na' eec, ca iuane'ta so Leví só'maq llaalec so Alfeo. Nqa'xantañi quiyi nishiuetenaxanqa' quena qomyipi quena' qaishiueten so nashi quiyi Roma. Ca 'naapego':

—Quitegue aỹim.

Ca' so Leví ne'laxashiguim, ca' quegue.

₁₅Ca co'na' so Jesús que'eetac quiyi la'a' so Leví. Ca 'xoico' na ỹacona'piguit ana nishiuete so nashi quiyi Roma, chaqai na sauaqhuaiquipi, nqa'xantañi, lqui'ỹaxaua so Jesús chaqai saua lapaxaguinatqa, ma' ỹaatqajam 'xoico' so qomyipi queeta'pegue' na'le so'maxare. ₁₆Qam ná'maq rapaxaguinataxanta'pegue na naqataxaquipi chaqai na fariseoipi co'na' idaana'a so Jesús quiyim lqui'ỹaxaua sá'ogue so qomyipi, 'naaco' quesaua lapaxaguinatqa so Jesús:

—¿Chi'neco' ñí'maq ra'gaxalarii que'eeta'pegue' chaqai ne'teeta'pegue' ná'maq ỹacona'piguit ana nishiuete ñi nashi quiyi Roma chaqai na sauaqhuaiquipi?

₁₇Ca co'na' so Jesús 'xaỹa dajo, ca 'naaco':

—Quecá'maq sqaicanqaida chaqai queca no'ueenta, ca se ỹouen ca natarenataxanaq, ta'ta'a ná'maq ralolaxaiquipi. Ma' se ñanac quiyim soỹaxana cá'maq 'maxaraic, ta'ta'a ná'maq sauaqhuaiquipi.

₁₈'Uo' so na'xa'a co'na' nqopaaqachite' saua queesa'pegue' so Juan chaqai na queeta'pegue' na fariseoipi. Ca 'vio' saua qomi' nagrepegue' so Jesús, ca' inate' so'maxare:

—¿Chi'neco' ma' nqopaaqachit ná'maq queeta'pegue' so Juan chaqai ná'maq queeta'pegue' na fariseoipi, qam naua rapaxaguinataxahi' se nqopaaqachite'?

₁₉Ca' so Jesús 'naaco' quesaua'maxare:

—¿Peeta'a ishit quiyim nqopaaqachit cá'maq ỹalequetau'a ca nashilaxac quiyim cá'maq huonaxaua ñaq ỹalequeta'guit ca qomyipi? Ca no'm ñaq ỹalequetaho cá'maq huonaxaua, ca' se ishit nqopaaqachit. ₂₀Qam 'uo' ca na'xa'a quiyim qarouootaxana'gue ca'maxare, ca' quiyi, ca' nqopaaqachit.

₂₁Ma' qaica cá'maq ishit napalaten ca nooỹac leteraxaic quiyim rapalatenaxana ca dalaxaic hualoq lahi. Ma' cá'maq dalaxaic ma' cata', ca paguec nqo'naxatec cá'maq lasectaxa. ₂₂Chaqai qaica ca ishit iỹoxogui aca isecỹac loshicmaxa leteraxai queca dalaxaic lataxa. Ma' cá'maq dalaxaic lataxa ỹachipiaxata'gue ca loshicmaxa, ca na'lerañi cauá'maq loshicmaxa chaqai ca lataxa. Ca vichiguiño' quiyim qaỹocoriñi ca dalaxaic lataxa, ca qaỹocori'ñigui aca dalaxai loshicmaxa.

₂₃Ca 'uo' so na'xa'a co'mataxaqui, ca' so Jesús queetalec so nanaxanqa', ca' saua lapaxaguinatqa so'maxare no'tequesa'ña ana trigo la. ₂₄Ca' so fariseoipi 'naaco' queso'maxare:

—'Ajñi', ¿chi'negue ma' ỹo'ueete' nauá'maq rapaxaguinataxahi' dá'maq se qaỹo'uet quiyi na'xa'a co'mataxaqui?

₂₅Qam so Jesús 'naaco' quesaua'maxare:

—¿Se ỹauano' quen taxahilec qamiri dá'maq 'neeto' na'le so nashi David co'na' so'maxare chaqai saua nauegaxaua' 'ue da louenaxanqa' chaqai qopate'? ₂₆Co'na' so David inoxonougui ñi lauo' ñi qota'olec co'na' so Abiatar ñaq lashi na letaxaỹaxanqajanqaipi na qomyipi quena' qaretaxaỹa'pegue' ñi qota'a. Ca ỹa'gue' saua paañi' mashic shi'gue qoỹaanoto ñi qota'a, só'maq qainaata na netaxaỹaxanqajanqaipi ishit ỹa'ic, chaqai nouanta'to sauá'maq nauegaxaua'.

₂₇So Jesús 'naaco' qai'neeta quesaua'maxare:

—Na' qaỹo'uet so na'xa'a co'mataxaqui, qaỹauaaque nco'mataxaqui na qom, qam mesqaiyi yí'maq na'xa'a co'mataxaqui yí'maq 'em qaỹo'uet na qom. ₂₈Vichiguiño' najo ỹale llaalec 'ue da lquesaxanaxa quiyim 'ue ca relaataxanlec quiyi na'xa'a co'mataxaqui.