Mateo 27

₁Ca co'na' richiguiñi, ca sá'ogue so lashi na netaxaỹaxanqajanqaipi chaqai so lqo'xonqaipi na judioipi mashic na'deenta' quiyim ỹa'ue ca la'maqa' quiyim qaỹalauat so Jesús. ₂Ca qaicoñireta'ta' naua lqai'laqate', ca qaỹauega'a so nashi Roma le'ec Poncio Pilato.

₃Ca co'na' so Judas só'maq ỹaano' na'le so Jesús, co'na' ỹa'den quiyim saua'maxare ỹaanchiguit da lelauaxa so Jesús, ỹaatqajam 'xoic da netogotaxa. Ca ỹopilaxatero saua treinta chiróla ta'ta'a plata quesaua lashil na netaxaỹaxanqajanqaipi chaqai so lqo'xonqaipi na judioipi. ₄Ca 'naaco' quesaua'maxare:

—Ỹim 'ue da ỹasauaxaset, ma' saañiguit da lelauaxa so ỹale qaica ca ỹasauaxat.

Qam saua'maxare 'neraco':

—Dajo coqomi' ¿negue' quet cá'maq 'negue? Ma' ¡dá'maq dajo chi rasauaxashichi'!

₅Ca' so Judas inaxaugui añi no'ueenaxanaxaqui late'ogue' aso nam. Ime, ca' eec, ca' chi coñitot na lqosot.

₆Ca' saua lashil na netaxaỹaxanqajanqaipi ỹaconta aso nam. Ca 'neraco':

—Se seshitaq quiyim sellaqañigui añi lahi' ana nachitaxanataxanqate anajo plata, ma' na'maxare laseuete da nachaalataxac ca qom.

₇Ime, ca' na'deenta' quiyim rishiujnaxanta so 'laua leenaxat 'laua lo'o no'ueenaxa, qaiyi 'ue ca nishinqa' ná'maq ileu ỹoqa'a chicqauec. ₈Vichiguiño' chi ỹovireta'a nagui sojo 'laua leenaxat leuoripi no'ueenaxa. ₉Ca' imiquio' dá'maq 'naaco' na'le so qota'a letaxaỹaxanqajnec leenaxat Jeremías, co'na' 'naac: “Ca' qaicona aso treinta chiróla chicqaugui ana leenaxat plata (asó'maq qoỹaano qaỹahotaque laseuete ca qom illiguiñi na Israel llaalqaipi), ₁₀ca caso'maxare, ca qarishiujnaxana so no'ueenaxa so 'laua lo'o, ca' ipaquichigui ma' chaqaida dá'maq yilarelec ñi qara'gaxala' qota'olec.”

₁₁Ca' so Jesús qaỹauega'a so nashi Pilato. Ca so'maxare inato' so Jesús, 'naaco':

—¿Qami'o' ná'maq qami' lashi na judioipi?

Ca' so Jesús 'naaco':

—Ajá'a, chaqaida dá'maq 'ñirac.

₁₂Ca co'na' so netaxaỹaxanqajanqaipi chaqai so qo'xoiquipi queso judioipi imaqateguelec na lasauaxaset, qam so Jesús qaica ca ỹa'xat. ₁₃Co'na'le, ca' qohinapego' queso Pilato:

—¿Sqai 'qa'ita ná'ogue ná'maq se no'uen qaimaqateguelec qami'?

₁₄Qam so Jesús qaica ca ỹa'xat. Ca' so nashi 'uo' da le'laxa. Ca' se ỹa'den ca 'neeta.

₁₅Qam so nashi 'uo' da chi lanatec, ma' co'quena' ỹovire'ogalo sauajo na'xata' lapoxoqui' na qom, ca so'maxare 'uo' quen na ỹosouec quena ncoñiiteguesec quecá'maq chi qarashiilaxanegue quena qom. ₁₆Ca 'uo' na'le so ncoñiiteguesec choxoraic leenaxato' Barrabás. ₁₇Ca co'na' saua'maxare lapoota'ta', ca renataxano' so Pilato, 'naaco':

—¿Negue' cá'maq viitaque sosouec: ñi Barrabás, loqo'm ñi Jesús ñí'maq qohinac nashi nca'laxaqui?

₁₈Ma' retano' quiyim chi npa'guenaxac dá'maq 'em qoỹaano' so Jesús.

₁₉Ca co'na' so Pilato ñaq nqa'xantalec so lo'ueenataxanqa', ca' aso loua 'uo' so nelaro la'qaatec, 'naaco': “'Neeto' lotqai 'iisapegueu'a so ỹale huagaxaraic, ma' squepe chalego lichic so i'guemataxac sauaxat so'maxare.”

₂₀Qam so lashillipi na netaxaỹaxanqajanqaipi chaqai so lqo'xonqaipi na judioipi na'yiiñiguit so qomyipi quiyim rashiilaxanegue qaỹosouec so Barrabás chaqai quiyim qaỹalauat so Jesús. ₂₁Ca' so nashi liỹo' retaqa, ca inate' saua'maxare, 'naaco':

—Quiyaua dos, ¿negue' cá'maq viitaque quiyim sosouec?

Ca saua'maxare 'neraco':

—Ca Barrabás.

₂₂Ca' so Pilato inate'o' saua'maxare, 'naaco':

—Ca ¿negue' cá'maq shinta'co' ñi Jesús ñí'maq qohinac nashi nca'laxaqui?

Ca saua'maxare 'neraco':

—¡Pachiñiro!

₂₃Ca' so Pilato 'naaco' quesaua'maxare:

—¿Nega'ỹo' cá'maq se no'uen ỹo'uet ñi'maxare?

Qam saua'maxare liỹa ỹaualqagui, 'neraco':

—¡Pachiñiro!

₂₄Ca co'na' so Pilato retan quiyim qaica ca nemaq so qomyipi, ta'ta'a quiyim noquiiquetashiguim nqai'en na naỹaac, ca relaataxanaco' so huaxaỹaq, ca' quiỹo' naua lqai'laqate' qaỹa'ajantac sá'ogue. Ca 'naaco':

—Ỹim sqa saỹapegueu'a ca lelauaxa dajo ỹale, ma' qaica ca lasauaxaset. Ca' chaqaiqamiri 'viiquiñitac.

₂₅Ca' sá'ogue so qomyipi nemaashiguim, 'naaco':

—¡Qomi' chaqai na qochaalqaipi ñomatqalta' quiyim qarasauaxaset da lelauaxa!

₂₆Co'na'le, ca' so Pilato ỹosouec so Barrabás. Ca relaataxanlec quiyim qaỹouaxantac so Jesús. Chaqai na' ime, ca' ỹaanec quiyim qaipateno.

₂₇Ime, ca' saua nale' so nashi ỹauegue' so Jesús ỹaueguereu'a so lauo' lodegaxat so'maxare. Ca lapoonta' sá'ogue so nalliripi so'maxare, ca qalapoỹau'a so Jesús. ₂₈Ime, ca' qanaqate' saua loho, ca' qoỹañigui aso lachima ladocai toc. ₂₉Chaqai qaipaxajta' aso le, ca' qoỹanagui na lqahic 'ec nqohin ana nashi nado'o, chaqai qaipataxagui da lqai'laxat loic aso lashilete. Co'na'le, ca' qaỹa'dooto' quen naua ne'cootal chi qai'neetac, qohinaco' quen:

—¡La', qami' ná'maq qami' lashi na judioipi!

₃₀Chaqai qai'neeta qanatoqoto' quen, chaqai qaicona aso lashilete, ca qaỹouaxañigui na lqahic. ₃₁Co'na' ime qohinta'gue dajo da ne'naxac so'maxare, ca' qanaqat aso lachima ladocai toc, ca' qoỹañiguilo sauá'maq chaqai loho. Ime, ca' qaỹaueguec quiyim qaipateno.

₃₂Ca co'na' mashic inoxondec, que', ca natenda'guit so ỹale na'gue da Cirene, leenaxat Simón. Ca' qohinapega quiyim i'xat so npatenaxala' so Jesús.

₃₃Ca co'na' ỹovijta yi 'laua leenaxat Gólgota, ca' da leloxoỹaxac dajo na'qaatec 'neetasa': napal lqahic lpi'nec loma'. ₃₄Ca' yi hua'ño' na' qane'taxañigui so Jesús so lataxa qaỹalecqajñiguit ca chim. Qam co'na' ime i'guen, ca' se ni'chigui.

₃₅Ca co'na' mashic ime qaipateno, ca' saua nouaataxana' lase' nallichiguilo saua loho so Jesús, qaiyi naloguilo saua'maxare. Ca' quedajo, ca' ipaquichigui dá'maq 'naaco' na'le so letaxaỹaxanqajnec ñi qota'a co'na' 'naac: “Nallichiguilo na'le saua ỹoho, ca neuagaxachiguilo.” ₃₆Co'na' ime, ca' nqa'xañiñi quiyi'maxare, ca nauaansa'a ỹa'ajansac so'maxare. ₃₇Ca quená'maq nalooshi'ma na lqahic so'maxare, ca qaỹo'uet so nerec hueetalec dá'maq 'neeta da lasauaxaset, 'neetasa': “Najo na Jesús ná'maq lashi na judioipi.”

₃₈Qai'neeta saua dos cuataxaqa npatenaxaua' nqohin so'maxare: 'óna so pa'aata'gue da loic, chaqai so liỹa queda nemaq. ₃₉Chaqai ná'ogue ná'maq que'tegueyi ỹoviraqtetapega, ỹaxaỹaxantac na lqahic. ₄₀Ca 'naac:

—Qami' ná'maq 'ñirac so'irigui ñi no'ueenaxanaxaqui late'ogue' na'ñi na Jerusalén, ca' quecaua tres na'xata', ca' lotqai ñá'ogue no'xoñirishiguim. Nagui, ca' chi nca'laxachiralta'. Ca no'm ỹaatqajam qami' llaalec ñi qota'olec, ca renochirec nagui quena npatenaxalachi'.

₄₁Chaqai saua lashil na netaxaỹaxanqajanqaipi, chaqai saua napaxaguinataxana' quena naqataxaquipi, chaqai so fariseoipi, chaqai so lqo'xonqaipi na judioipi, qai'neeta ỹoviraqtesapega so'maxare. 'Neraco' quen:

₄₂—Ishit nca'laxatec ca liỹa, qam ñi'maxare se ishit quiyim chi nca'laxatalta'. No'm llic quiyim chaqaiñi ñí'maq lashi na llaalqaipi so Israel, ca' renotec queda npatenaxala', qaiyi seuaqlec ñi'maxare. ₄₃Ñi'maxare ỹaanot da lpi'ỹaxac ñi qota'olec. Ca' chaqaiñi ñí'maq qota'olec ñí'maq nca'laxatec quet nagui, no'm llic nqo'ta. Ma' ñi'maxare mashic 'naac coqomi' quiyim llaalec ñi qota'olec.

₄₄Vire'ta sauá'maq npatenaxaua' cuataxaqa qai'neete' ỹoviraqtesapega so'maxare.

₄₅Ca co'na' na'xa'a lavinñi, chi ỹovireta'a lavitari', 'xoico' so napalaxa quená'ogue na 'laua. ₄₆Ca co'na' mashic rashiiñi aso ra'aasa, ca ỹaualqo' netenegue da laualaxac so Jesús, 'naaco':

—Elí, Elí, ¿lama sabactani? —dajo 'naac: Qami' qota'olec, qami' qota'olec, ¿chi'neco' ma' yalachi'?

₄₇Ca 'vio' saua quesauá'maq hueese'eyi 'qaachirigui, ca 'neraco':

—Ñijo ỹale roỹaxantaque ca qota'a letaxaỹaxaqui leenaxat Elías.

₄₈Ca' queco'na'le, ca 'uo' so 'óna quesaua'maxare ne'laxatashiguim, ne'guenta, idaanaque nauol. Ca co'na' ime illijñi queso lataxa lochiviaxaic, ca coñiro quena lo'lo aso nque'e. Ca' ỹaañigui na lap quiyim nqo'goxoguit. ₄₉Qam saua liỹa' 'neraco':

—'Xañirac, ñaq sa'ajnaq sha'apiguito' novi' ca Elías, ca nca'laxatec.

₅₀Ca' so Jesús lotqai liỹa netenegue da laualaxac. Ca' ileu. ₅₁Ca' queco'na'le, ca' so lapoxot añi no'ueenaxanaxaqui late'ogue' na'ñi yi Jerusalén shicchichiguiñigui na lavinñi, chicqoshi'mquera, ca' ỹovira'nquira, ca i'loxol na 'laua chaqai ropoxoỹa'gue na qaripi. ₅₂Ca' huajñigui na napal lahiripi, chaqai vire'ta 'xoic na leuaxaiquipi liỹa nca'leuec quená'maq huelco' quen na'le ñi qota'olec. ₅₃Ca co'na' ime liỹa nca'leuec so Jesús, ca' so qomyipi nenoxonshiguim cana lahi'. Ca' taugui yi Jerusalén yí'maq hua'ñi quena' qanqouagaxainot ñi qota'olec. Ca' yí hua'ño' na' 'xoic na qomyipi iuanchigui.

₅₄Ca co'na' so lashi so nouaataxanaq chaqai sauá'maq liỹa' reloqosa'a so Jesús, co'na' iuanchigui i'loxol na 'laua chaqai ná'maq liỹa 'uo' na'le, ca 'xoico' da lqolonqa'. Ca 'neraco':

—Ỹaatqajam llic ñijo ỹale ỹaatqajam llaalec ñi qota'olec.

₅₅Ca 'xoico' so 'aallipi hueete'eyi ra'iitaho qoỹoqote'oga, quesauá'maq queesa'pegue'o' na'le so Jesús quiyi Galilea, chaqai ỹotauansaco' quen. ₅₆Ca' quesaua'maxare ỹalequesauquio' saua María lase yi Magdala, chaqai aso María late'e so Jacobo chaqai so José, chaqai aso late'e' saua dos llaalqa so Zebedeo.

₅₇Ca co'na' mashic sham napalñi, ca 'uo' so ỹale nesallaxanec leenaxat José, na'ñi yi na'a' Arimatea. So'maxare qai'neeta huelec so Jesús. ₅₈Ca so'maxare quepegue' so Pilato, ca rashiilaxanegue so Jesús. Ca' so Pilato ila' da la'qaatec quiyim qoỹaanem so'maxare. ₅₉Ca' so José naqajñi queso npatenaxala' so Jesús, ca' lepategue queso necanec lalagaxaic co'teeta. ₆₀Ca illaugui asó'maq chi ỹauaaque lalamaxarete lahi', só'maq relaataxanlco' na'le quiyim qani'ỹaho caso qa'. Ca' co'na' ime ỹapogui queso qa' lodegaxat, ca' eec. ₆₁Ca hueeso'o'yi na'le saua María Magdala lase chaqai aso liỹa María, nqa'xansañi, neesa'ñi yi reloxoỹa'ogue aso napal lahi'.

₆₂Ca na' ime so na'xa'a 'maqataxaqui, ca' ỹovita so na'xa'a co'mataxaqui, ca' so lashillipi na netaxaỹaxanqajanqaipi chaqai so fariseoipi quepegue' so Pilato. ₆₃Ca 'neraco' queso'maxare:

—Qami' qarashi, so'leentaqa'te cajo ỹale 'maatqaic 'naiquen na' ñaq nca'leetauec, quiyim ma' ime'ueque caua tres na'xata', ca lotqai liỹa nca'leuec queca lelauaxa. ₆₄Ca' vichiguiño' 'maxaraic quiyim 'viichi' caua neloxoỹa' cañi lahi', toco' ma' ỹovirerec naua tres na'xata', qaiyi se qarocachau'a yi loshicmaxa quiyim pe quena lapaxaguinatqaipi, ime, ca 'naac quena qomyipi quiyim liỹa nca'leuec queso lelauaxa. Ca' quedajo ma'le, ca dá'maq pa'aatec na'maachic paguec lecaic ma'le quesó'maq 'auaxaic.

₆₅Ca' so Pilato 'naaco' quesaua'maxare:

—'Eda da nouaataxanyipi. Mohi, quii, ca' ỹaatqajam 'maxachichiguiñi pohichigui aca lahi'.

₆₆Ca' saua'maxare que', ca' ỹaatqajam ỹa'maxachichiriñi aso lahi', ca' qaỹa'ue aso netanaxasete so qa' lapooque' aso lahi'. Ca na' ime, ca' qano'ueenaqterañi saua nouaataxanaq lase' quiyim reloxoira'a.