Mateo 26

₁Ca co'na' so Jesús mashic ỹa'xat dá'ogue dajo, ca 'naaco' queso lapaxaguinatqaipi:

₂—Ca' mashic qamiri 'yiiñii quenauajo dos na'xata', ca ỹovire'oga so na'xa'a quiyim qaỹo'leente so na'xa'a co'na' qanaqata'a so qomyipi quiyi Egipto. Ca' najo ỹale llaalec qoỹaano ma'le quiyim qaipateno.

₃Ca' quesojo na'xa'a, ca' so lashillipi so netaxaỹaxanqajanqaipi quena' qaretaxaỹa'pegue' ñi qota'a, chaqai na napaxaguinataxanaq quena naqataxaquipi, chaqai na judioipi qo'xoiquipi, lapoỹata' quiyi nasoxoc yi la'a' so Caifás, lashi so netaxaỹaxanqajanqaipi. ₄Ca hua'anyi, ca qana'deentapigui so Jesús quiyim qaiconlec qaỹalauat qaỹayinta. ₅Qam 'neraco' quen:

—Sqai huaugui nqaishinaq ca lapoxoc lodegaxat, qaiyi sqaica ca le'laxa na qom.

₆So Jesús hueeta'ño' yi Betania, hueete'e yi la'a' so Simón só'maq qohinaco' quen rishiita na loshicmaxa. ₇Ca qanqo'neu'o' na'le caso 'aalo i'xateta aso coraxat lahi' lo'daxaraic lahita, 'xoic lesega'a. Ca co'na' so Jesús reloqotalec so nqui'ỹaxala', ca aso'maxare ỹocorelec na lqahic so Jesús queso coraxat lo'daxaraic lahita. ₈Ca co'na' saua lapaxaguinatqa iuanta dajo, ca ro'ỹe'. Ca 'neraco':

—¿Chi'negue dá'maq 'ec qaiualaxain? ₉Ma' dajo ishit qoỹoqota'a nqohin quiyim qaimen, ca' qaỹotauan na 'xoraiquipi.

₁₀'Qaatapegalo' so Jesús, ca 'naaco' quesaua'maxare:

—¿Chi'negue ma' sqai 'xañiỹac anajo 'aalo? Dajo ỹo'uet caỹim 'xoic loyac. ₁₁Ma' na 'xoraiquipi se neme ỹalequetauguilo qamiri, qam ỹim sqai queeta quiyim salequetauguilo qamiri. ₁₂Dá'maq ỹo'uet caỹim dajo 'aalo, quiyim ỹocorelec na ỹoshicmaxa queso aceite lo'daxaraic lahita, ỹa'maxatetañi quiyim qayishinñi. ₁₃Ỹaatqajam llic da shinac caqamiri, quiyim canchaqai hua'gue quena lahil na 'laua, quiyim qaỹa'xat dajo na'qaatec chicqaugui da nca'laxa, qai'neeta qaỹa'xat dá'maq ỹo'uet caỹim dajo 'aalo, qaiyi qaỹo'leenta'a ada'maxare.

₁₄Ca' so 'óna quesaua doce lapaxaguinatqa so Jesús, leenaxat Judas Iscariote, eec quepegue' retaxaỹa'pegue' so la'gaxala' na netaxaỹaxanqajanqaipi. ₁₅Ca 'naaco' quesaua'maxare:

—¿Ỹote' aca nañaañii quiyim saano so Jesús?

Ca saua'maxare ishiuetene' saua treinta chiróla chicqaugui ana lecat leenaxat plata. ₁₆Ca queco'na'le, ca so Judas idaantaque ca la'maqa' quiyim ỹaanouguilo saua'maxare so Jesús.

₁₇Ca quesó'maq la'auaxanec na'xa'a quena' qaỹa'ic so pan qaca aca lalequete pe'taxachigui, ca' so lapaxaguinatqaipi nqo'neu'a so Jesús. Ca inat:

—¿Negue' cá'maq hua'gue cá'maq vi'saque quiyim sa'maxataxañi ca rqui'ỹaaqachi' ma' qui'i' quecá'maq na'xa'a ma' qaỹo'leenta'a so na'xa'a co'na' qanaqata'a so qomyipi quiyi Egipto?

₁₈Ca so'maxare 'naaco':

—Quiipegue' yi na'a' lodegaxat Jerusalén, ca ma' viriu'a yi la'a' cajo ỹale, ca 'ñiỹaco': “Ñi qara'gaxala' 'naac: Yi ỹaloqo' tot qoỹoqaque. Ca' na ra'aachi' sahotaque iqui'ỹaaqa' ma' sa'ic ca na'ic ma' qaỹo'leente so na'xa'a na' qanaqata'a so judioipi quiyi Egipto, iqui'ỹaxaua' naua ỹapaxaguinatqa.”

₁₉Ca saua'maxare que', 'neetetegue dá'maq 'naaco' na'le so Jesús, ca ỹa'maxachiñi ca nqui'ỹaxac.

₂₀Ca co'na' mashic pe, ca' so Jesús chaqai saua doce lapaxaguinatqa reloqosalec so nqui'ỹaxala'. ₂₁Ca co'na' ñaq que'eeta'pe, ca' so Jesús 'naaco' quesaua'maxare:

—Ỹaatqajam llic da shinac caqamiri, quiyim 'ue ca 'óna caqamiri yayaano ma'le.

₂₂Ca co'na'le, ca saua'maxare 'ue da lachicoqo'. Ca' 'onatac renataxan, 'naaco' quen:

—Qami' qara'gaxala', ¿ma'taq ỹim?

₂₃Ca' so Jesús 'naaco' quesaua'maxare:

—Ñí'maq ñouante'e' quena qarqui'ỹaxaqui peguet, ca' chaqaiñi ñí'maq yayaano ma'le. ₂₄Qam najo ỹale llaalec ỹaatqajam quiichigui da 'nerac naua naneresañi la'qaatqa ñi qota'a. Qam ¡'xoraicolec cá'maq qom yayaano! Cajo ỹale paguec la'maxa quetaxan se ne'qaaño' na'le.

₂₅Co'na'le, ca retaqo' so Judas só'maq ỹahotaco' ỹaano, 'naaco':

—Qami' ỹa'gaxala', ca' ¿chaqaỹimo' na'maxare?

Ca' so Jesús 'naaco':

—Ajá'a, chaqaqami'.

₂₆Ca co'na' ñaq que'eeta'pe, ca' so Jesús ỹacona so pan, ca ỹaanot da na'aachic ñi qota'olec. Ca na' ime, ca ỹasectaxachigui, ca ỹaanouguilo saua lapaxaguinatqa. Ca 'naaco':

—A'guii, najo ná'maq ỹoshicmaxa.

₂₇Na' ime, ca' icona aso 'taxaqui, ca ỹaanot da na'aachic ñi qota'olec. Ca' imeenec, ca 'naaco':

—Qamiá'ogue ni'chiigui najo 'taxaqui. ₂₈Ma' najo ná'maq iuoripi i'taxajñi dá'maq dalaxaic 'maqataxac. Ca' qaỹocoraqta'pe, qaiyi 'xoic cá'maq qaỹapalaxat ma'le ca lasauaxaset. ₂₉Qam ỹim shinac caqamiri quiyim tot liỹa ñi'chigui najo li'i ana 'úva, toco' ma' ỹovita ca na'xa'a quiyim liỹa ñi'ta'to qamiri queca 'ec dalaxaic lataxa, ma' seuqataugui da lo'ueenataxanaxac ñi ita'a qota'olec ma' ỹoiquentac ná'ogue najo.

₃₀Ca co'na' ime ỹo'ueensac so no'ueenec, ca querepegue' aso quemaralec late'ogue' nananqa' ana qo'paq olivos. ₃₁Ca' so Jesús 'naaco' quesaua'maxare:

—Qamiá'ogue palac da rpi'ỹaxaguii caỹim quena pe. Ma' 'nerac naua naneresañi la'qaatqa ñi qota'a: “Salauat ma'le cá'maq neloxoỹaq, ca' neuagaxatetac ma'le ana qagreta.” ₃₂Qam ma' ime ma' liỹa yca'leuec, ca' sa'aueta'a ma'le yi Galilea.

₃₃Co'na'le, ca' so Pedro 'naaco':

—'Eno'm ná'ogue palac da lpi'ỹaxac caqami', qam ỹim 'e'.

₃₄Co'na'le, ca' so Jesús 'naaco' queso'maxare:

—Ỹaatqajam llic da shinac caqami', chaqaina najo pe, ma' saqa' noỹen ca huaqa'e, qala' shi'gue tres 'ñirac quiyim sqai huañirapiguiỹa'.

₃₅Ca' so Pedro 'naaco':

—'Eno'm qayalauat shiqueta'ñi' qami', qam se ñoqolliguit.

Ca sá'ogue so lapaxaguinatqaipi dá'ogue da la'qaatec.

₃₆Co'na' so Jesús chaqai saua lapaxaguinatqa ỹovijta yi 'laua leenaxat Getsemaní. Ca 'naaco' quesaua'maxare:

—Nqa'xañiñi quenajo, ca' ỹim shicpegue' yijo ñqouagaxain.

₃₇Ca' ỹauec so Pedro chaqai saua dos llaalqa so Zebedeo. Ca nauata'guit so lachicoxo chalego lecaic chaqai so lachitachic. ₃₈Ca 'naaco' quesaua'maxare:

—Ñauata'guit queda ñachaalataxac 'ec sham yalauat na ỹachicoxo. Qovii'e quenajo, qam sqai laxaiỹo'.

₃₉Co'na'le, ca' so Jesús cocho'qui' liỹa eec, ca nqa'paxañiguit na 'laua. Ca nqouagaxainot ñi qota'olec, 'naaco':

—Qami' ita'a, no'm shichi' quiyim se ỹovichiguit nqai'ñi' aỹim da i'xoric 'ec aca naqana chim. Qam sqaida quet dá'maq chi sahotaque, ta'ta'a cá'maq vi'saque.

₄₀Ca pilalo' na'le saua lapaxaguinatqa, ca' iuanejlgoto' laqatem'. Ca 'naaco' queso Pedro:

—¿Sqai shichiỹo' 'ñiitari' aỹim shi'gouc nelohitauec? ₄₁Nelohitauec qamiri, chaqai nqouagaxaiñii, qaiyi se novitalo qamiri ca ne'guenaxaguii. 'Nesa ma' llic rasapchita qamiri, qam na roshicmaxahi se nasapet.

₄₂Ca lotqai liỹa eec, ca 'neetayi da nqouagaxainaxac:

—Qami' ita'a, no'm 'ue ca la'maqa' quiyim se sovira'a dajo ñi'guenaxac, qam no'uen quiyim chaqaida nqai'ñi' cá'maq vi'saque.

₄₃Ime, ca' pil, ca lotqai iuanejlgoto laqatem' saua lapaxaguinatqa, ma' naua nqote' la'qaatecta', paguelec na lelaxac. ₄₄Ca ỹaxanta'pe, eec, ca lotqai liỹa nqouagaxain, qaidaata dá'maq la'qaatec ỹopilaqteta'gue. ₄₅Ca quepegue' yí'maq hueesa'ñi saua lapaxaguinatqa. Ca 'naaco' quesaua'maxare:

—Nagui maqsa' laxahi chaqai nco'machiuec. Ma' mashic ỹovita yi laloqo' quiyim najo ỹale llaalec qoỹaaneu'a na qomyipi hualoxonyipi. ₄₆Ne'laxachishiguim, qolaq, mashic novi' ná'maq yayaano.

₄₇Ñaq retaqataco' so Jesús co'na' noviro so Judas só'maq 'óna quesaua doce lapaxaguinatqa, liỹaatac so 'xoic qomyipi 'ue na lecat chaqai na nepon qo'paq, nelaatqaipi queso letaxaỹaxanqajanqaipi na qomyipi quena' qaretaxaỹa'pegue' ñi qota'a chaqai so lqo'xonqaipi na judioipi. ₄₈So Judas só'maq remeenaxan, ỹa'uo' so letanec, 'naaco':

—Cá'maq sqo'goq, ca' chaqai caga'ỹo' cá'maq coñilec, ca' coñirii.

₄₉Co'na'le, ca' nqo'neu'a so Jesús, ca 'naaco':

—¡Laa', qami' ỹa'gaxala'!

Ca' nqo'goq. ₅₀Ca' so Jesús 'naaco' queso'maxare:

—Qami', ¿negue' ca naquire'oga?

Co'na'le, ca qanqo'neu'a so Jesús, ca' qaiconlec, ca qaicoñi'. ₅₁Co'na'le, ca 'uo' so 'óna quesaua nauegaxaua' so Jesús no'vicshiguim so lecat, ca ỹouaxanec aso lque'la so lelaatec so lashi so netaxaỹaxanqajanqaipi. ₅₂Co'na'le, ca' so Jesús 'naaco' queso'maxare:

—Shichirigui na lecachi' ca lahi', ma' ná'ogue ná'maq ỹahote'e na lecat quiyim nalauat, lo'o ma'le ca lecat ma' qaỹalauat. ₅₃¿Sqa 'yiiñiỹo' quiyim ỹim seshit sashiila ñi ita'a qota'olec quiyim nela' quet nagui ca paguelec doce mil lelaatqaipi piguim laseripi? ₅₄Qam quiyim shi'ntegue dajo, ca ¿negue' quet cá'maq 'neeta quiyim ipaquichiguilo quet naua naneresañi la'qaatqa ñi qota'a, ma' ỹa'xate' quiyim chaqaida 'neeta ma'le dajo?

₅₅Co'na'le, ca' so Jesús 'naaco' queso qomyipi:

—¿Chi'neco' ma' viita'ahi na lecaachiri chaqai naua nepoñiri quiyim naguii'oga aỹim mashic 'eco' ỹim cuataxai? Taxanta' naua'que na'xata' ñqa'xantañi quen salequetauguilo qamiri, sapaxaguinataxantac cañi no'ueenaxanaxaqui late'ogue' na'ñi yi Jerusalén, qam se ycoñirii. ₅₆Qam 'neeta dá'ogue dajo, qaiyi ipaquichigui dá'maq 'naaco' na'le so letaxaỹaxaquiripi ñi qota'a ỹa'xat quenaua naneresañi na'qaatqa.

Co'na'le, ca 'eet so lapaxaguinatqaipi, no'ueenaqchichiguiñi so Jesús.

₅₇Ca sauá'maq coñite' so Jesús, ỹaueguereu'a yi la'a' so Caifás só'maq paguec la'gaxala' so netaxaỹaxanqajanqaipi, ca shi'co' lapoota'ta' na'le so rapaxaguinataxanta'pegue na naqataxaquipi chaqai so lqo'xonqaipi na judioipi. ₅₈Qam so Pedro coỹaretaho', qam qoỹoqo'chiguit, chi ỹoviretau'o' yí'maq ỹaatqajam nasoxoc só'maq paguec nashi. Ca co'na'le, ca' nqa'xanñi, huaqata'to saua nouaataxanaq lase', qaiyi ỹa'ajantac cá'maq 'neeta ma'le dajo.

₅₉So lashillipi na netaxaỹaxanqajanqaipi chaqai so lqo'xonqaipi na judioipi chaqai sá'ogue só'maq nashillipi ỹo'ueetegueñi na leloxoỹaxaquipi, idaantaque ca la'maqa' quiyim ỹo'uet ca lasauaxaset so Jesús, 'eno'm sqai llic, qaiyi qoỹaañiguit ca lelauaxa. ₆₀Qam qaica quet cá'maq qaỹanata, 'eno'm 'xoic so qomyipi ỹoviro, na'majanteguelec so'maxare. Qam na'chaqai, ca co'uaataxante' ỹovirero saua dos 'maatqaqa. ₆₁Ca saua'maxare 'neraco':

—Dajo ỹale 'naac na'le: “Ỹim seshit sopoxoỹaxachigui añi no'ueenaxanaxaqui late'ogue' na'ñi na Jerusalén, qam quecaua tres na'xata', ca lotqai ñá'ogue ño'xonshiguim.”

₆₂Co'na'le, ca ne'laxashiguim so lashi na netaxaỹaxanqajanqaipi, ca 'naaco' queso Jesús:

—¿Qaica ca 'ñirac? ¿Negue' cá'maq 'neeta ná'maq qaimaqateguelec qami'?

₆₃Qam so Jesús se retaqa. Co'na'le, ca' so lashi na netaxaỹaxanqajanqaipi 'naaco' queso'maxare:

—Soỹaxanot nagui ñi qota'olec ñí'maq nca'leetauec quiyim ỹa'ue ca nouaxanaxashichi' no'm sqai llic ca ra'qaachiqui'. Nichoxochite' no'm qami' ná'maq nashi nca'laxaqui, qami' llaalec ñi qota'olec.

₆₄Ca' so Jesús 'naaco':

—Ajá'a, chaqaỹim, chaqaida dá'maq 'ñirac. Chaqai qai'neeta shinac caqamiri huañiỹa ma'le najo ỹale llaalec nqa'xanta'gue da loic ñi qota'olec ñí'maq sqaica qalanac, chaqai naquetaugui ma'le na naueguelec quena piguim.

₆₅Co'na'le, ca' so lashi na netaxaỹaxanqajanqaipi nasectaxata'ahi saua loho. Dajo netanec quiyim chalego lauel. Ca 'naaco':

—Dajo ỹale napaqueteguelec ñi qota'olec quenaua la'qaatqa. ¿Negue' quet ca liỹa qom souenaq quiyim ra'qaataxan? Ma' qamiri ỹaatqajam 'xaichigui dá'maq la'qaatec quiyim napaqueteguelec ñi qota'olec. ₆₆Ca ¿negue' cá'maq 'ñiỹac?

Ca saua'maxare 'neraco':

—Da'maxare 'ue da lasauaxaset, ca' qaỹalauat ma'le.

₆₇Co'na'le, ca' qanatoxogui na lashic so'maxare, chaqai qaỹouaxan. Chaqai saua liỹa', ca ỹouaxanyigui na lashic so'maxare. ₆₈Ca qohinaco' queso'maxare:

—Qami' ná'maq qami' nashi nca'laxaqui, ¡ñaqai 'xachi' negue' cá'maq rouaxañi'sac!

₆₉Co'na'le, ca' so Pedro nqa'xantañi pa'aatauec quiyi nasoxoc. Ca 'uo' aso nelaata nqo'neuo' queso'maxare, ca 'naaco':

—Qami' qai'neeta riỹa'isac quen da Jesús dá'maq le'ec yi Galilea.

₇₀Qam so Pedro reloqotaugui so qomyipi na' noqolliguit, 'naaco':

—'Taque', se sa'den dá'maq 'xachisac.

₇₁Ca' so Pedro co'na' mashic quepegue' ñi lasom, ca qaiuane'ta caso liỹa. Ca 'naaco' quesauá'maq neesa'anyi:

—Sojo ỹale qai'neeta liỹaatac na'le so Jesús só'maq Nazaret le'ec.

₇₂Ca' so Pedro lotqai liỹa noqolliguit, 'naaco':

—Ỹaatqajam llic quiyim se seuanapega da ỹale.

₇₃Co'na' ncopaata, ca qanqo'neu'a so Pedro quesauá'maq hueese'eyi. Ca qohinaco':

—Ỹaatqajam llic quiyim qami' qai'neeta lliquisauguilo na'le saua'maxare, ma' vire'talo naua ra'qaataxahi' ỹaatqajam 'nejme' naua la'qaatqa saua'maxare.

₇₄Co'na'le, ca' ỹaatqajam noqolliguit, ca 'naac quiyim qaỹalauat quiyim llic iuana so'maxare. Ca 'naaco':

—'Taque', ỹaatqajam se seuanapega dajo ỹale.

Ca' queco'na'le, ca' noỹen so huaqa'e. ₇₅Co'na'le, ca' so Pedro ỹo'leente'te dá'maq 'naaco' na'le so Jesús: “Ma' saqa' noỹen ca huaqa'e, ca' qami' tres noqollicchitegue aỹim.” Ca' so Pedro ta'oguiyi, ca ỹaatqajam noỹen.