Lucas 12

₁Ca co'na' nqo'neetauec so lapootecta', ca' co'na' ỹaatqajam 'xoic so qomyipi. Ca vire'ta ỹapaguelec, ca' npataxata'. Ca' so Jesús ỹa'auaxan 'naapega so lapaxaguinatqaipi, 'naaco':

—'Neeto' se rovichii'a ana pe'taxachigui na pan hueetaugui na fariseoipi, qam da 'neeta: chaqaida da 'neeta quiyim 'neetapigui lauel quiyim 'maxaraic. ₂Ma' sqaica ca se re'xogui quiyim se qaỹa'den, chaqai qaica ca qoỹoqtetegueñi quiyim se re'oq nqohin. ₃Vichiguiño' cá'ogue cá'maq qamiri 'ñiỹac queca lapalqa', qara'xaỹa queca 'ec na'xa'a; chaqai quecá'maq 'xachii pa'xañitaho, loqo'm pohitagui ca 'imec lasom, ca' 'ec naualaxac queca pa'aashiguim queca 'imec.

₄Qamiri ỹaqaỹarolqa, shiñiỹapegaxaua' totaxan ro'chiỹa cá'maq ishit quiyim ỹalauat ca qom, ca' ime quiyim ỹalauat, ca se ishit quiyim 'ue ca liỹa 'ne'tegue. ₅Qam sa'xatema qamiri cá'maq ỹaatqajam ro'chiỹa: ro'chiỹa ma'le ñi qota'olec ñí'maq 'ue ca 'negue. Ma' ime quiyim naqata'a ca nachaalataxac ca qom, ime, ca lotqai ishit quiyim ilari'ña ca ncopatqo' na sauaqhuaiquipi. Ca' 'iñi ñi paguec quet ro'chiỹa.

₆¿Se qaimeene' caua cinco qo'oole, ñiguita nqohin caua dos namirolli'? Qam ñi qota'olec sqaca aca coua'e 'oono'lli' cana'maxare. ₇Ma' vire'ta na laue quena rqahiguii ná'ogue qanaloqochinta 'onatac nqohin. Totaxan ro'chii, ma' qamiri paguec lecaic aca rashivichii cacajo 'xoic qo'oole.

₈Ca' aỹim shinac quecá'ogue cá'maq ra'qaataxanem na qomyipi quiyim queeta'pegue' aỹim, ca' qai'neeta najo ỹale llaalec ichoxot quiyim lalamaxat na'maxare ma' hueetaugui na piguim le'ec lelaatqaipi ñi qota'a. ₉Qam ca se ra'qaataxanougui na qomyipi quiyim queeta'pegue' aỹim, ca' ca'maxare qai'neeta se sa'xat quiyim ỹalamaxat ma' seuetaugui na lelaatqaipi piguim laseripi ñi qota'a.

₁₀Chaqai no'm 'ue canchaqaica qom quiyim 'ue ca inaxalec ca se no'uen la'qaatec najo ỹale llaalec, qaiyiita qaỹapalaxat ca lasauaxaset. Qam ca se no'uen ca ỹa'xat queso Espíritu Santo, se ishit quiyim qaỹapalaxat ca lasauaxaset.

₁₁Ca ma' ỹovita quiyim qaraviguiu'a aca lapoxoqui na judioipi, loqo'm na nashillipi chaqai na na'gaxalateripi, qam sqai hueetapigui qavillii cá'maq 'xachii chaqai cá'maq 'ñiỹac. ₁₂Ma' quiyim ỹovita ca laloqo' quiyim taxahi, ca' so Espíritu Santo ỹapaxaguinguelo qamiri cá'maq leloxoỹaxac ca ra'qaachiguii.

₁₃Ca 'uo' so ỹale hueetañigui so qomyipi 'naapego' so Jesús:

—Qami' napaxaguinataxanaq, 'ñirapega ñi ỹaqaỹa quiyim ỹasectaqchigui da nesallaxa no'ueenaqto'oto qomi' na'le so qareta'a.

₁₄Qam so Jesús 'naaco':

—Shinapega qami', ¿negue' ca ỹaanem aỹim ca ỹo'ueenataxanaxac quiyim ño'laaque ca nasauaxaset, loqo'm quiyim sasectaqchigui ca nesallaxa?

₁₅Qai'neeta 'naaco':

—'Ajnaxañii chaqai rovichiỹa'a ná'ogue na nqo'itaxanqachic, ma' da nachaalataxac ca qom se ishit quiyim chicqaugui ná'maq 'xoic lesallaxa hueeto'ot.

₁₆Ca' quiyi, ca ỹa'uo' so raloqojnaxana, 'naaco':

—'Uo' so ỹale ỹaatqajam nesallaxanec. Ca so ro'ueenataxanteguelec 'laua ỹaatqajam 'xoic ana la so lanecsec co'na' naqat. ₁₇Ca' so nesallaxanec ra'deenataxantac, 'naaco': “¿Nega'ỹo' ca shi'ntegue nagui? Ma' ỹim qaica ca sella'gue quiyim sa'maxat ma' ñaqat ana la na ỹanecsec.” ₁₈Ca' ra'deenataxantac, ca 'naaco': “Ca' nagui sa'den dá'maq shine'tegue. Ỹim nagui samaxañi ñí'maq 'auaxaic ỹapoonaxanaxaqui cana la na ỹanecsec, qaiyi so'uet ca liỹa paguec lecaic nqaishin. Ca ma' ime, ca sellaugui ná'ogue ana la na ỹanecsec ma' ñaqat, qai'neeta ná'ogue ná'maq liỹa hueetaỹot. ₁₉Ime, ca' ñanecalta': Qami' ñachaalataxac, nagui mashic 'xoic na rovinqui' lapootañi, nalauguilo caua 'xoic ñaxaripi. Nagui, ca' nco'machirec, qui'i', ni'chi', chaqai netooñi'sac.” ₂₀Qam ñi qota'olec 'naapego': “Qami' ỹale ỹaatqajam qaico' ca 'yiiñiraque, quena pe qami' rillivi', ca' ná'ogue ná'maq 'maxachi'sac, ¿negue' cá'maq taalec ma'le?” ₂₁Ca' chaqaida da 'neeta ca qom quiyim chi lapoonñi ca lesallaxa, qam 'xoratam quiñi qota'olec.

₂₂Co'na' ime, ca' so Jesús 'naapegalo saua lapaxaguinatqa, 'naaco':

—Nagui shinapegalo qamiri: Se ishit quiyim chigohita 'yiiñitaque ca qanoxohi chaqai ca qatooỹaguii quiyim ñiiñi. ₂₃Ma' da chaalataxac sqai 'nejem cá'maq na'ic, chaqai da 'ueenataxac sqai 'nejem ca chi qoỹanñi nooỹac. ₂₄'Ajñii na ratecsan, ma' ná sqai danaxan, chaqai se raqataxan, chaqai sqaica ca lapoonaxanaxaqui, chaqai qaica ca lo'xac. Qam ñi qota'olec qui'ỹaxantac na'maxare. ¡Qam qamiri ỹapacauec ca rashivichaxaguii, sqai 'ñiita ana qo'oollipi! ₂₅¿Ca negue' ca caqamiri quiyim ỹapaguec ca lachitachic, ca' ishit quiyim noquiicshiguim ca ladogaxa? ₂₆Ma' quiyim qamiri sqai shichii cá'maq sqa lo, ca ¿chi'negue queta' 'xoic ca rque'guenataxanaxahi queca liỹa?

₂₇Ñaqa 'ajñii da lañaqtaxac ana peue 'ue ana lenoỹaxai. Ma' ana'maxare se ro'ueenataxan, chaqai se raqaletenaxan. Qam aỹim shinac quiyim vire'ta so nashi Salomón quesá'ogue so no'ueetaxat, sqai 'nejem da no'ueetaxac cana lenoỹaxai. ₂₈Ma' no'm ñi qota'olec ỹa'ue na no'ueetaxat ana peue quiyim nagui hueetalec na no'ueenaxa, ca nete'e, ca qaỹavigaxat qainaxaugui ca nqatelaxanaxaqui, ¡huose'quet se ỹa'ue ca no'ueetaxachii, qamiri cocho'qui' ca rpi'ỹaxaguii! ₂₉Ca' vichiguiño' mesqai 'xoic ca rachitachiguii, quiyim daañitaque ca qanoxohi chaqai queca ni'chiigui. ₃₀Ma' na qomyipi hueetalec ana 'laua chaqainaua nauá'maq coỹaretecto naua'que nauataxare'. Qam qamiri 'ue ñi qata'ahi quiyim shi'gue ỹa'den quiyim qamiri viñitapigui naua'que nauajo. ₃₁Qam qamiri ỹaatqajam na'xaỹaxañiỹa da lo'ueenataxanaxac ñi qota'a quiyim mashic ỹoiquentac ná'ogue najo, ca' qai'neeta coñiguit ma'le naua'que nauajo.

₃₂Totaxan ro'chii, ma' qamiri 'ñiita acá'maq ỹalamqate iloxoiqatecse qagreta. Qamiri sqo vite', qam ñi qata'ahi ỹaatqajam ỹa'maxarente' qamiri quiyim nouañiỹau'a da lo'ueenataxanaxac ma' ỹoiquentac ná'ogue najo. ₃₃Miiñii naua rouenaxahi. Ime, ca' 'ỹaañim na 'ue ca ỹouentaque. Ime, ca' 'viichii aca qachoxoguii se ishit quiyim qo'oq, chaqai da nesallaxa hueeta'gue da piguim ma' se imeho, chaqai se inoxono ca cuataxai, chaqai se rechigaxan ca pit. ₃₄Ma' cá'maq hueeta'gue ca resallaxahi, ca' chaqaica hueeta'ñi añi re'taxanatahi.

₃₅Ỹaatqajam na'maxachitañi, ỹaviquetaugui nqai'ñii aca rcoỹeraxanaxaguii. ₃₆'Ñiitam ca nelaatec quiyim nauaanta'guit ca na'co' quiyim novi' chicqa'a ca nashilaxac, qaiyi leuoteta ỹauachigui ca lasom ma' novi' ca'maxare, loqo'm chi roỹaxan. ₃₇Chalego la'maxa quecauajo nelaatqa quiyim ma' novi' ca na'coote' iuanejlgoto quiyim ñaq neloosauec ma' novi'. Ỹaatqajam llic da shinac quecajo a'co' na'maxajñi, ca nqa'xanaxañiñi caua'maxare, iloxoỹaxandelec ca nqui'ỹaxala', ime, ca' niỹoqshiguim ca na'ic. ₃₈'Eno'm novi' queca pe lauel, loqo'm ma' na'xa'atac, qam no'm novi' iuanejlgoto ñaq neloosauec, chalego la'maxa ma'le quecauajo nelaatqa. ₃₉Ca' 'yiiñita dajo shinac quiyim 'ue ca lalamaxat ca 'imec quiyim ỹa'deenta ca loviraqa' ca cuataxai chaqa'ma' yi nelootauec, ca se ỹasen quiyim qai'guentau'a quiyim qarocachot. ₄₀Ca' qamiri qai'neeta ỹaatqajam na'maxachitañi, ma' ne'laqataxanto ca loviraqa' najo ỹale llaalec.

₄₁Ca' so Pedro renataxan:

—Qami' qara'gaxala', dajo raloqojnaxanaxachi', ¿peeta'a nodaaterec tauguilo qomi', loqo'm ná'ogue na liỹa qomyipi qai'neeta?

₄₂Ca' so qara'gaxala' 'naaco':

—¿Ca nega'ỹo' ca 'nejem ca nelaatec qamaxaraic chaqai 'deenaxanqachaqaic quecá'maq ca na'co' pataxalec cá'ogue ca louenec queca la'a' quiyim qui'ỹaxanataxan ma' ỹovirelec ca laloqo'? ₄₃Chalego la'maxa quecajo nelaatec quecá'maq quiyim novi' ca na'co', ca natenejlec ỹo'ueetetac ca nelaataxaset. ₄₄Aỹim ỹaatqajam llic da shinac quecajo a'co' ỹamaxalec ma'le quiyim reloxoỹa'a cá'ogue cá'maq louenec. ₄₅Qam quecajo 'neetapega quiyim sqaua' novi' ca na'co', ca' ỹouaxantac na liỹaripi nelaatqaipi chaqana nelaataipi, ime, ca' quelec da lqui'ỹaxac, chaqai da ne'taxac quena lataxa, ₄₆ca' so na'co' novi' quecajo na'xa'a quiyim so lelaatec se ỹahotaque chaqai ca laloqo' se ỹa'den, ime, ca' qaỹa'ue ca nouaxanaxaset chalego lecaic, 'nejem nqohin ca nouaxanaxaset ná'maq mese na'xaỹaxan.

₄₇Qam ca nelaatec quiyim ỹa'den ca ỹahotaque ca na'co', qam se na'maxatetañi, chaqai se na'xaỹaxan, ca' ca'maxare ỹaatqajam 'xoic ca nouaxanaxac ma'le. ₄₈Qam ca nelaatec quiyim se ỹa'den ca ỹahotaque ca na'co', ca' ỹo'uet ca chicqaugui ca nouaxanaxaset, ca sqailligueme' ca nouaxanaxaset. Ma' ca 'xoic ca qoỹaanem, ca 'xoic ma'le ca qaroỹaxanaque, chaqai ca 'xoic ca qaipataxalec, ca paguec lecaic ca qaroỹaxanaque.

₄₉Aỹim ñanac quiyim scopata'a ca norec quena 'laua; chaqai ¡chalego na ishoxo quiyim chaqa'ma' ỹaviquetaugui nagui! ₅₀Aỹim sai'a quiyim 'xoic ca i'xoric, 'nejem ca nocoraxanaxac, chaqai ¡chalego na ỹachicoxo quiyim chaqa'ma' sahotaque quiyim ỹovirelec! ₅₁Qamiri ¿pe'taxañitaque quiyim ñodo ca leuagaxa na qomyipi? 'E', qaidaata quiyim neuagaxat na qom. ₅₂Ma' nagui taachi'ñi quiyim quecaua cinco queca na'a' chaqa'ma' neuagaxate', quecaua tres npa'guento caua dos, chaqai caua dos npa'guento caua tres. ₅₃Ca neta'a npa'guente'e' ca llaalec, chaqai ca ñaalec npa'guente'e' ca leta'a. Aca nate'e npa'guente'e' aca llaale, chaqai aca ñaale npa'guente'e' aca late'e. Aca 'ỹoqoro npa'guente'e' aca late, chaqai aca nate npa'guente'e' aca ni'ỹoqoro.

₅₄So Jesús qai'neeta 'naapega so qomyipi:

—Quena' qamiri huañiỹa na naueguelec chicqo'tegue da lauashiguim, ime, ca' 'ñiỹac ỹaxat ma'le. Ca' chaqaida ipaquichigui. ₅₅Chaqai quena' pe'taxanshiguim na nonot queda 'guiñi, ca' 'ñiỹac 'xoic ma'le ca npa'ỹaaxa. Ca' chaqaida ipaquichigui. ₅₆Ca' ¡qamiri mashic 'ñiitapega quiyim qamiri 'maxaraqa! Ma' qamiri 'yiiñii 'xachii na netanqaipi na piguim chaqai na 'laua, qam ¿chi'negue ma' sqa 'yiiñii ca 'neete' naua na'xata' seuqatauguilo nagui?

₅₇Qam qamiri ¿chi'neco' ma' se nimichiỹalta', qaiyi 'viichii ca ỹa'maqachiguiñi? ₅₈Ma' no'm 'ue ca ỹamaxalec qami' ca rasauaxashichi', ime, ca' talaxanegue qami' queca nashi, qam no'm ñaq quiita'gue ca nayic, 'maxaraic quiyim chaqa'ma' na'maxachire'e' ca npa'guenaxaua'e', qaiyi se ishit qaỹauegueu'a qami' cá'maq imitaque ca rasauaxashichi'. Ca' queca nimiitaxanaq queca nasauaxaset ilara'a qami' ca nouaataxanaq, ca' queca nouaataxanaq ỹanaugui qami' ca ncoñiitaxanaxaqui. ₅₉Ca' aỹim shinapega qami' quiyim sqai shichi' nenoxoñirec cacajo ncoñiitaxanaxaqui quiyim saqa' shivichiñi' aca pa'aatec ra'ualli'i'.