Job 39

₁¿Qami' peeta'a 'yiiñi' quena' co'o ana qagreta neuec?

¿Huañito' quena' co'o ana naueenec?

₂¿'Yiiñi' ỹorete' caua shiriguiri quena' co'o?

₃Quena' co'o, ca' ỹa'que'ejta',

ca' ne'qaañi ca llaalec.

₄Quena'le, ca' ỹiitauec quena no'ueenaxa,

ca quena' ime, ca' eec, ca tot rapil.

₅¿Negue' cá'maq ỹaanem da leuagaxa ca 'ashin neuec?

¿Negue' cá'maq ỹaxantac quiyim sootauec?

₆Ỹim setan cá'maq loma' hueetalec ca 'laua qaica qom,

na ca'megue ná'maq 'ue na 'ue.

₇Se nqo'ta na nauaxanaxa quena na'a',

chaqai se na'xaỹaxana na laualaxaquipi na no'ootaxanaq.

₈Queeteguelgoto naua no'ueenaxari idaantaque ca 'uaqapi,

idaantaque canchaqaica 'uaqapi ladala quiyim ỹa'ic.

₉¿Peeta'a 'ñiisapega shichi' 'ueenataxañirigui ca tooro neuec,

loqo'm hueetaugui ca rcoñiitaxanaxagui'i' quena qalo'e' queca pe?

₁₀¿Peeta'a shichi' quiyim coñichiro, ca' 'ueenataxañirigui quiyim saugaxañi',

loqo'm quiyim coỹaretalec qami' quiyim moxoiqataxañisac quena no'ueenaxa?

₁₁¿Peeta'a pi'iisa'a ca'maxare ma' ỹaatqajam quesaxanaxaic,

ca' 'xañitegue quiyim ỹo'uet ca ro'ueenachiqui'?

₁₂¿Peeta'a 'ñiisapega quiyim ỹa'maqachiguiñi qataxañirigui ca'maxare quena qadañiguishigui' ala

chaqai quiyim lapoonta' potogola ná'maq co'teeta la?

₁₃Ñaqai 'ajñi' so mañic:

so'maxare 'maaxaic, ỹauatetapiguilo naua laua',

'neete'm naua laua' na natagoxonaq.

₁₄Ỹalate' ỹapolgoto naua lco'ueete' quena lo'uaxanaxa,

qaiyi viriguilo nqai'en na ra'aasa lauaq.

₁₅Sqai huapigui lauel quiyim 'ue ca pataqarañi,

chaqai sqoue ca liỹa isecỹac co'ỹaaguilo.

₁₆Ỹaatqajam qa'uaic quena llaalqaipi, mashic 'ec sqai llaalqaipi,

chaqai se iten quiyim na'laañi da lo'ueenataxanaxac.

₁₇Ma' ỹim sqai saanem ca la'deenataxanaxac,

chaqai se sa'ue ca no'uen no'ueenataxac.

₁₈Qam quena' ne'laxashiguim, ca 'eet,

ca' chi i'neetac ca shipgaq chaqai quecá'maq neetalec.

₁₉¿Loqo'm qami' ná'maq vite ca lquesaxanaxa na shipgaq,

loqo'm 'viichi' na lanaxa' laue lemaqatet na lqosot?

₂₀Ca' ¿qami'o' ná'maq renot nqai'ñi', 'ec nqai'ñi' aca piñai,

ca' da nemaqajnaxac quiyim rachiminaxantari', ca' ỹaatqajam 'xoic da lichic?

₂₁Ca' ri'ỹaxantari' quena' hueetalec ana quemaralec,

chaqai qaica ca lqolonaxa quena' i'guentaugui ca lauataq.

₂₂Chi i'neetac da lichic chaqai se no'chi,

chaqai se ỹolauqachit na lecat,

₂₃'eno'm roviqui na lovic lahi' ná'maq neetashiguim nalauataxai,

chaqai 'eno'm 'ue lpoqo ana niqui chaqai ana nahinaxanqate.

₂₄Ỹaatqajam se ỹoỹojlgoto naua qoỹoqojlgoto,

quena' ilamigui ana npe'te, ca' se ishit i'maqata.

₂₅Noỹen quena' 'xaỹaque ana npe'te;

ñaq qoỹoqo'ta, qa' ita'guit na lahita na lauataq,

'qaataque na la'qaatec na nashi quena' relaataxan chaqai na naualaxaquipi.

₂₆Ca ¿ỹaatqajam qami'o' 'deenaxanqachaqaic,

ca' paxaguiñitegue da laỹoxoc na qatañiguit lodegaxat

quena' ỹo, taigue da 'guiñi?

₂₇Ca ¿qami'o' ná'maq lachi'o' na o'ic

quiyim ỹanalec ca lpa'gue' ana qa' ladocai?

₂₈Na'maxare quiyi pe chaqai yi na'xa'a hueetalec ana qa',

ỹo'uet ca le'guenqa' quena lo'lo ana qa' ladocai.

₂₉Ca hueetashiguim qoỹoqoshi'megue quenoxontac,

ra'iitaque ca loxonec.

₃₀Na llaalqaipi ỹaatqajam loqo' naua leuo',

ca quecá'maq hua'ñi ca leuaxaic,

ca' yí hua'ñi, ca' qaỹauana.