Job 3

¡Ỹaatqajam lochi'n so pe só'maq viichigui na' qaico'ỹegue aỹim!

¡Ỹaatqajam chalego la'aaxa nqaishin so na'xa'a na' ñi'qaañi!

₄¡Chalego la'maxa quetaxan sojo na'xa'a ñigui pe nqohin,

chaqai ñi qota'olec sqaica nqai'en so'maxare,

ca' se richiguiñi queta'le!

₁₁¿Chi'neco' ma' se yileuauquio' na'le na lauel aso ỹate'e,

loqo'm na' ñi'qaañi, ca' ñileuañi quet?

₁₂¿Chi'neco' ma' 'vio' na'le saua ne'cootal hueetalgoto nqohin aỹim na'le,

chaqai saua no'ueetel quiyim yillipaxane'?

₁₃Quetaxan yileu queto' na'le,

ca nagui queta' ỹim 'maaxaic selaqata,

ñco'matetapeguec, sqaicanqaida,

₁₄salequetaugui na nashillipi chaqai na lotauaripi,

ná'maq qano'xontecshiguim na lahiripi late'ellipi,

₁₅loqo'm quena nashillipi,

quená'maq no'xataxachiguilo naua lauooto' quena 'oro chaqai quena plata.

₁₆¿Chi'neco' ma' se qaishinño' na'le aỹim shinta ca se nouoc ne'qaañi,

loqo'm 'nejem ca noctoqui' neleuañi?

₁₇Ma' añi napal lahi' hua'ñi da lqodoc ca ỹo'ueetetac na se no'uen,

chaqai ná'maq mashic nco'teuec, ca chaqaiyi hua'ñi, ca' nco'matec;

₁₈ca' chaqaiyi hua'ñi, ca' huaguiñi na ncoñiitegueseripi,

ca' totqa 'xaỹa da laualaxac na neloxoỹaripi;

₁₉chaqai chaqaiyi huera'ñi qaica ca qaỹapacqajnauec queca nesallaxanec chaqai ca 'xoraic,

chaqai ca na'ac souec queca na'co'.

₂₀¿Chi'neco' ñi qota'olec ma' ỹaanem da nachaalataxac cá'maq 'ue da le'xoric?

¿Chi'negue ma' ỹaanem da lca'laxa cá'maq 'xoic da nqui'ic,

₂₁cá'maq nauaantaque ca lelauaxa, qam se ỹovitot,

'eno'm idaantaque, 'nejem nqai'en ca nouenec chalego loyac qoỹoxojñi?

₂₂Ca' da netoonaxac cajo ỹale novita,

quena' ỹovita quiyim qaishinñi.

₂₃Ca' ñi qota'olec qauaata nqai'en ca'maxare, qam se neuanñi nqai'en,

quepaxat ná'ogue na lliquipi ca'maxare.

₂₄Da noỹenaxac, da'maxare 'eco' ca noq,

ca 'ec ỹaquip da ỹachootaxac queda nqui'ic.

₂₅Ca ná'ogue ná'maq yo'chiitaque,

quená'maq 'xoic da iqolonaxa,

ca' chaqaina ná'maq tajlec aỹim.

₂₆Qaica ca ñco'mataxac chaqai ca i'maqa';

se sanata ca neuagaxa, ta'ta'a quiyim qaica ca ỹo'daxa.