Job 19

¿Chi' laquio' 'xañiñi quiyim viitaque da i'xoric,

chaqai yque'maqachichitac quenaua ra'qaataxahi?

₃Ma' pillitailec quiyim quiitapiguiỹa';

ca ¿qaico' ca rayiloxohi quiyim 'ñiita'gue dajo caỹim?

₄'Eno'm quiyim ỹaatqajam 'ue ca ỹasauaxaset,

qam ca ỹasauaxaset qaỹimeta ya'axat.

₅Ca' 'ñiitapega paguec 'maxaraqa qamiri caỹim,

ca' ỹaatqajam viraqchitapiguiỹa' quedá'maq i'xoric.

₆Ca' qamiri ỹaatqajam 'yiiñita quiyim chaqaiñi ñi qota'olec yinaxañi,

ca' chaqaiñi ñí'maq ta'ñigui nqai'en aỹim añi noqoina.

₇Quiyim yaualaq shinac: ¡qayalauat!,

qam qaica ca saachiguit aỹim;

soỹaxantac quiyim qayotauan, qam qaica ca na'xaỹaxan.

₈Ñi qota'olec ỹapo'ñigui so ỹic, qaiyi sqa shique'tegue;

ca' se re'xogue nqai'en so ỹic quena napalaxa.

₉Ca' ỹaatqajam rouootaxana'gue sá'ogue so isallaxa;

chaqai icona dá'ogue da imaqachic.

₁₀Ca' ỹaatqajam yi'xorqachitetam;

ca' ¡ỹaatqajam na'laxatañi da ñaquitaxac!

₁₁Ca' ỹaatqajam ỹomatailec dá'ogue da lauel,

'ec npa'guenaxaua nqai'en aỹim.

₁₂Ná'ogue na nalliripi imailec quiyim yiloquin;

nahiquinchiguiñi na ỹa'a',

ca' na'maxajñi quiyim yiloquin.

₁₃Ñi qota'olec ỹo'uet quiyim na ỹaqaỹaripi chaqai na ñauochaxauaripi

noỹootec caỹim, 'ec ỹoqa'a ca sachigoxogue.

_14-15Ca' na iuo' laseripi chaqai na ñauochaxauaripi yalat,

chaqai ná'maq neeta'ñi yi ỹa'a' coua'e aỹim.

Na ilaataipi 'ec nqai'en aỹim ca ỹoqa'a.

Ca' tot ya'den.

₁₆Chaqai no'm soỹaxana ca ilaatec, se na'xaỹaxan;

'eno' 'xoic ca ipagaxallic.

₁₇Chaqai no'm ñqo'neu'a añi ỹoua, ca imaqaiguit,

chaqai naua ỹalamaxarete' ỹaalqa naqaiqueraỹa'.

₁₈Vire'ta na ñaaqaipioqui' se nqo'chiiua';

quena' chi ñi'laxashiguim, ca chaqa'ma' se no'uen na qaỹa'xat caỹim.

₁₉Ná'maq paguec ñauochaxauaripi quen, nagui ỹamaqahic;

ná'maq ỹaatqajam paguec yqo'ta, nagui, ca' ypa'guen.

₂₀Na ỹoshicmaxa ronata'guita naua ipi'naqa,

mashic 'ec tot yalo'guit quiyim yca'leetauec.

₂₁Rqouaguiic yi'xoriñii, qamiri ñauochaxaua',

ma' ñi qota'olec taalec nqai'en aỹim da lqai'laxat.

₂₂¿Chi'negue ma' yocañitac, 'ñiitari' ñi qota'olec?

¿Mese nalootaño' quiyim shi'gue netaguitauec aỹim?

₂₃¡Saxanchi' 'ue ca ỹichiñi naua ỹa'qaatqa,

hueetalec nqai'en ca lecat, qaiyi hueesalec!

₂₄¡Saxanchi' 'ue ca ỹahote'e ca lecat quiyim ỹotocqosañi,

hueesalec nqai'ne' ca quiguiñi loqo'm ca qa', ca' sqai pale' caua lerqa!

₂₅Ỹim sa'den quiyim nca'leetauec cá'maq ro'ootaxanlec aỹim,

ca' chaqaica cá'maq quepaqataxanlec aỹim quena 'laua.

₂₆'Eno'm nateta'ñiguit na ỹa'at,

qam ỹim seuana ma'le ñi qota'olec.

₂₇Seuana ma'le quenaua ñqote',

ỹim ỹaatqajam seuana ma'le, mesqai ca ỹoqa'a.

Ilamqauec da ña'ñaaqataxac

₂₈na' sa'xaỹalo qamiri quiyim 'ñiỹac:

“¿Negue' quet cá'maq 'neeta quiyim socanqatac quet?

Ma' so lpa'a' dá'maq se no'uen chaqaiñi ñí'maq hueetagui.”

₂₉Qam ro'chiỹo' so lecat,

só'maq lecat rouaxanaxana quen ñi qota'olec quena se no'uen.

Qam qamiri 'yiiñita quiyim 'oonoqui' ñí'maq imit ca nasauaxaset.