Juan 6

₁Ca' co'na' ime dajo, ca' so Jesús taita'gue da laseego aso latogot late'ogue' quiyi Galilea, ca' chaqaso aso ỹovira'ta'gue yi na'a' Tiberias. ₂Ca 'xoic na qomyipi queeta'pegue' so'maxare, ma' 'xoic na qaiuantapigui ỹo'ueetetac so'maxare quena netanqaipi se qaiuanapega quena' ỹomatec na ralolaxaiquipi. ₃Ca so Jesús taashi'megue aso quemaralec ladocai. Ca' quiyi, ca hua'ñi ca nqa'xanñi chaqai so lapaxaguinatqaipi. ₄Ca mashic nepalataho so na'xa'a lapoxoqui na judioipi ỹa'ue lemaqachic quena' ỹo'leente na' ca'e yi Egipto. ₅Co'na' namatashiguim so Jesús, ca iuañi'chiguit so 'xoic qomyipi coỹareta'pegue' so'maxare. Ca 'naaco' queso Felipe:

—¿Nega'ỹo' ca sachigoxotqa'gue quiyim seshiujnaxanqaque ca na'ic, qaiyi que'e ná'ogue najo qomyipi?

₆Qam so Jesús 'naaco' dajo, ma' ỹahotaque ỹa'den cá'maq 'naac so Felipe. Ma' chaqaiso só'maq Jesús ỹaatqajam ỹa'deenta ca leloxoỹaxac cá'maq ỹo'uet. ₇Ca so Felipe 'naaco':

—Quiyim doscientos aca denarios, ca' qarishiujnaxanaque ca pan, qam qayiita se nalouec, 'eno'm cocho'qui'tac nqohin ca loq quiñi 'óna.

₈Ca' so Andrés, ma' liỹa ỹalequetaugui so napaxaguinatqaipi chaqai chi lqaỹa so Simón Pedro, 'naaco':

₉—Quenajo 'ue da noctoqui' 'vii daua li'ỹaaco cinco paañi' chicqaugui ana cebada chaqai dos nalliñi', qam ¿negue' queto' ca nishaapigui mashic ỹapaguelec na qom?

₁₀Ca' so Jesús 'naaco':

—'Ñiỹapega nqa'xanñi ná'ogue na qomyipi.

Qam 'xoico' na 'uaqapi quiyi qoyiueta'ñi. Ca nqa'xanñi so 'uo' ca cinco mil qomyipi. ₁₁Ca' so Jesús ỹaconalo saua paañi'. Ca na' ime ỹaanshiguim da na'aachic quiñi qota'olec, ca ỹaanouguilo saua lapaxaguinatqa, ca saua'maxare imeendec quesá'ogue so nqa'xantañi. Ca chaqaida 'ne'tegue quesaua nalliñi' qai'neeta imeendec quesá'ogue so qomyipi, chi ỹovireta'a sá'ogue quema'. ₁₂Ca co'na' mashic sá'ogue quema' so qomyipi, ca' so Jesús 'naapegalo' saua lapaxaguinatqa:

—Lapooñii ná'ogue na naauec ni'ỹoqoteripi, qaiyi qaica ca na'laañi.

₁₃Ca' qalapoon, vire'ta no'xahi' saua doce canastos quesó'maq lahillipi ni'ỹoxot quesaua cinco paañi' chicqoraugui ana cebada. ₁₄Ca co'na' so qomyipi iuanchigui dajo netanec se qaiuanapega ỹo'uet so Jesús, ca 'naaco':

—Ỹaatqajam llic quiyim chaqaida da'maxare dá'maq la'qaataxanqajnec ñi qota'a qaỹa'xateta'guit quiyim naỹa'a ana 'laua.

₁₅Qam so Jesús co'na' retan quiyim qaỹahotaque quiyim qaỹaconeu'a, qaỹahotaque quiyim nashi, ca so'maxare lotqai ca'e so qomyipi, ca taashi'megue aso quemaralec ladocai, ma' ỹahotaque qaisoota nodaatec.

₁₆Ca co'na' mashic pe, ca saua lapaxaguinatqa so Jesús, ca taaraxaso'ma aso latogot late'ogue'. ₁₇Ca renojonyigui aso qom lahi' huaxaỹaqse, ca paquera'ta na lavinñi aso latogot, ma' ỹahosaque ỹovirereta quiyi Capernaum. Qam mashic napalñi, qam so Jesús saqa' ỹoviraxasom. ₁₈Ca pe'taxanshiguim so nonot quesaxanaxaic, ca ỹaatqajam 'ue na lo'paxa quena huaxaỹaq. ₁₉Ca co'na' mashic qoỹore'teguelo saua'maxare, ca qaiuañi'chiguit so Jesús nai'a aso neesañigui, queetalec na huaxaỹaq. Ca saua'maxare ỹaatqajam 'ue da lqolonqa'. ₂₀Qam so'maxare 'naaco' quesaua'maxare:

—Totaxan ro'chii, chaqaỹim na'taxare.

₂₁Ca saua'maxare chaqa'ma' ỹahosaque renojshiguim so'maxare caso lahite'. Ca' quiyi, ca chita'gue, ca ỹovirereta queso laseego quiyí'maq taira'ta'a 'laua.

₂₂Ca' queso liỹa na'xa'a só'maq qomyipi no'ueena'ta'gue da laseego añi latogot late'ogue' retan quiyim que' saua lapaxaguinatqa so Jesús, nerañigui aso qasooto'lli' qom lahi' huaxaỹaqse neeta'anyi, qam so Jesús se nauequetecto saua'maxare. ₂₃Qam co'na'le, ca lotqai 'vio' saua liỹa' qom lahiri chicqora'gue da na'a' Tiberias, novite' quiyi sqoỹoqaque quiyí'maq hua'ño' na' qaỹa'ic so pan co'na' ime ỹaanshiguim da na'aachic so qara'gaxala'. ₂₄Ca co'na' ỹa'den so qomyipi quiyim sqaica so Jesús chaqai saua lapaxaguinatqa, ca só'maq qomyipi renojñiguilo saua qom lahiri huaxaỹaqse, ca taita'gue yi Capernaum idaanaque so'maxare.

₂₅Ca co'na' so qomyipi ỹovijta'gue da liỹa laseego añi latogot late'ogue', ca qaiuanejlec so Jesús. Ca' qainato', qohinaco':

—Qami' napaxaguinataxanaq, ¿laquio' na' novichireta quenajo?

₂₆Qam so Jesús 'naaco' queso qomyipi:

—Ỹaatqajam llic da shinac caqamiri, quiyim qamiri daañitaque aỹim ma' na' qui'ii ỹovire'ta quemari, qam mesqaida quiyim 'yiiñichigui ca netanec se qaiuanapega. ₂₇Mesqo 'ueenataxañii hiñiteguelec ca na'ic tai'a quiyim imeho, ta'ta'a ca na'ic se imeho chaqai chicqaugui ca nca'laxa sqaica lqodoc. Ca chaqaica cá'maq na'ic ỹaanema qamiri najo ỹale llaalec, ma' ñi qota'olec chaqaina ná'maq ỹiquichigui quiyim ỹa'maxarenta.

₂₈Ca co'na'le, ca qainat so'maxare, qohinaco':

—¿Negue' queto' ca shinqa'tegue quiyim so'ueetaq cá'maq ỹahotaque ñi qota'olec quiyim so'ueetaq?

₂₉Ca' so Jesús 'naaco':

—Dá'maq ỹahotaque 'viichii ñi qota'olec, dá'maq quiyim viilec ná'maq nela' ñi'maxare.

₃₀Ca qainato' so'maxare:

—¿Negue' ca netanec chaxañitalo qomi' quiyim seuanqachigui, qaiyi seuaqlec qami'? ¿Negue' cá'maq 'viichi'? ₃₁Saua 'auaxaqa qareta'al ỹa'gue'o' so maná co'na' queetalec so 'laua qaica qom, ma' chaqaida dá'maq 'nerac yaua naneresañi na'qaatqa. 'Nerac: “Ñi qota'olec qui'ỹaxanegue so qomyipi so pan chicqashiguim queda piguim.”

₃₂Ca' so Jesús 'naaco':

—Ỹaatqajam lliqueta da shinac caqamiri: Quiyim mesqaiso so Moisés só'maq ỹaanema qamiri so pan chicqashiguim, ta'ta'a ñí'maq ita'a ñí'maq ỹaanema qamiri cá'maq ỹaatqajam pan chicqashiguim queda piguim. ₃₃Ma' cá'maq pan ỹaan ñi qota'olec, chaqaica cá'maq nenojñi chicqashiguim queda piguim, ca ỹaanem da lca'laxa na qomyipi.

₃₄Ca qohinapego' so Jesús:

—Qami' qara'gaxala', chaqai 'neetari' se neme 'ỹaañisapeguema qomi' cajo pan.

₃₅Ca' so Jesús 'naaco':

—Chaqaỹim ná'maq pan chicqaugui da nca'laxa. Cá'maq nacpegue' aỹim, ca se ỹauanapega quiyim qopat; chaqai cá'maq huelec aỹim, ca se ỹauana ỹalauat laquip. ₃₆Qam mashic shi'gue shinac caqamiri, qamiri sqai viilec, 'eno'm qamiri ra'iitaỹot. ₃₇Ná'ogue ná'maq nañaañim ñi ita'a nacpegue' aỹim; chaqai ná'maq nacpegue' aỹim, se so'da'guit. ₃₈Ma' ỹim se ñanac quiyim chi ñanoiquentac quiyim sachicqa'gue da piguim, ta'ta'a quiyim so'uet dá'maq ỹahotaque ñí'maq yila'. ₃₉Ma' dá'maq ỹahotaque ñí'maq yila' ita'a quiyim aỹim qaica ca ña'laxatañi quená'maq nañaañim, ta'ta'a quiyim liỹa ñca'laxatec quecá'maq pa'aatec na'xa'a. ₄₀Dá'maq ỹahotaque ñí'maq yila' quiyim ná'ogue ná'maq ra'ỹo'ot na llaalec ñi qota'olec chaqai huelec, ca 'ue da lca'laxa sqaica lqodoc; chaqai ỹim liỹa ñca'laxatec queca pa'aatec na'xa'a.

₄₁Ca' quedajo, ca so judioipi queeteguelec so Jesús quedá'maq 'naac quiyim 'naac: “Ỹim chaqaỹim ná'maq pan chicqo'ot na piguim.” ₄₂Ca 'naaco' so qomyipi:

—¿Dajo mesqaido' da Jesús da llaalec so José? Qomi' seuanaxa so leta'a chaqai aso late'e, qam ¿chi'neco' da'maxare ma' 'naac chicqo'ot na piguim?

₄₃Co'na'le, ca 'naaco' so Jesús:

—'Xañiñi quiyim quiiteguelec aỹim. ₄₄Sqaica ca ishit nacpegue' aỹim, no'm se qanauego quiñi ita'a ñí'maq yila'; chaqai aỹim liỹa ñca'laxatec queca pa'aatec na'xa'a. ₄₅Naua naneresañi la'qaatqa só'maq letaxaỹaxanqajanqaipi ñi qota'a 'neetayi da 'nerac: “Ñi qota'olec ỹapaxaguin ná'ogue ma'le na qomyipi.” Vichiguiño' ná'ogue ná'maq na'xaỹaxana ñi ita'a, chaqai 'ue na ỹa'den chicqo'ot ñi'maxare, ca nacpegue' aỹim.

₄₆Mesqaida quiyim 'uo' ca iuanapega ñí'maq ita'a; chaqainaata ná'maq chicqo'ot ñi qota'olec, ca iuana ñi'maxare. ₄₇Ỹaatqajam llic da shinac caqamiri, quecá'maq huelec aỹim, ca 'ue ca lca'laxa sqaica lqodoc. ₄₈Chaqaỹim ná'maq ỹim pan chicqaugui da nca'laxa. ₄₉So 'auaxaic qataa'illipi ỹa'ico' na'le so maná na' queetalec yi 'laua qaica qom, qam qaiyiita sá'ogue nelliviñi. ₅₀Qam ỹim sa'xatetac só'maq pan chicqo'ot na piguim, ca no'm 'ue ca ỹa'ic so'maxare, ca' se ileu. ₅₁Chaqaỹim ná'maq ỹim pan nca'leetauec chicqa'gue da piguim. Cá'maq ỹa'ic najo pan, ca' 'ue da lca'laxa sqaica lqodoc. Chaqai cá'maq pan ỹim saanec, chaqaina ná'maq ỹoshicmaxa. Ca ỹim saanec, qaiyi nca'leuec na qomyipi quena 'laua.

₅₂Co'na'le, ca so judioipi chi retaqata'ta', ca 'naaco':

—¿Chi negue' queto' ca 'neeta quiyim da'maxare nañaanoxorom quiyim sa'guinaq ná'maq chi loshicmaxa?

₅₃Ca' so Jesús 'naaco' queso qomyipi:

—Ỹaatqajam lliqueta da shinac caqamiri, ma' no'm qamiri sqa 'guii na loshicmaxa najo ỹale llaalec, chaqai se ni'chiiguilo caua leuo', ca' sqaica ca rca'laxahi. ₅₄Cá'maq ỹa'ic na ỹoshicmaxa chaqai ni'chiguilo naua iuo', ca' 'ue da lca'laxa sqaica lqodoc. Ca' ỹim liỹa ñca'laxatec ma'le queca pa'aatec na'xa'a. ₅₅Ma' ỹaatqajam na'ic na ỹoshicmaxa chaqai ỹaatqajam 'taqate' naua iuo'. ₅₆Cá'maq ỹa'ic na ỹoshicmaxa chaqai ni'chiguilo naua iuo', ca'maxare na'deetau'a aỹim chaqai aỹim qai'neeta queca'maxare. ₅₇Ñí'maq ita'a ñí'maq yila', ñi'maxare 'ue da lca'laxa, ca' dajo ica'laxa chicqo'ot ñi'maxare. Ca 'nejem cá'maq ỹa'ic aỹim, ca' ca'maxare ỹachigoxoto'ot aỹim da lca'laxa. ₅₈Ỹim sa'xatetac so pan chicqo'ot na piguim. Najo pan mesqai 'nejem so maná só'maq ỹa'gue' saua 'auaxaqa reta'allii, qam qaiyiita ileue'. Qam cá'maq ỹa'ic najo pan, ca' tot ileu.

₅₉Dajo rapaxaguinataxanegue so Jesús na' hueetaugui añi lapoxoqui na judioipi quiyi Capernaum.

₆₀Ca co'na' qara'xaỹa dajo napaxaguinataxanaxac, ca 'xoico' só'maq coỹareta'pegue' so Jesús 'naaco':

—Dá'maq dajo ỹa'xat chalego lqalaic quiyim qaicoñiguit; ¿negue' queto' ca ishit na'xaỹaxana?

₆₁Ca' so Jesús retan quiyim qanqalantapigui da la'qaatec so'maxare, ca so'maxare inat so qomyipi, 'naaco':

—¿Peeta'a qamiri quiỹapeguem, se rqo'chiỹa dajo? ₆₂¿Negue' quet ca 'ñiita queta' huañishi'megue najo ỹale llaalec pilshiguim quedá'maq shi'gue neeta'gue? ₆₃So ne'Espíritu ñi qota'a chaqaiso só'maq ỹo'uet da nca'laxa; da chi lquesaxanaxa ca qom qaica ca 'negue. Ca dauá'maq sa'xate' ỹaatqajam lliquete' chaqai chicqoro'ot so Espíritu chaqai ỹa'ue da nca'laxa. ₆₄Qam qaiyiita ñaqa 'ue na saqa' huelec caqamiri.

Ca' so Jesús 'naaco' dajo, ma' shi'gue na' llaqai taachiguiñi chaqa'ma' ỹa'den ná'maq sqai huelec, chaqai negue' cá'maq ỹaano ma'le so'maxare. ₆₅Ca 'naaco':

—Vichiguiño' shi'gue shinac caqamiri, quiyim qaica ca ishit nacpegue' aỹim, no'm se qanauegueu'a aỹim quiñi ita'a.

₆₆Co'na'le, ca 'xoico' ná'maq queeta'pegue' so Jesús, ca totqai quegue so'maxare. ₆₇Ca' so Jesús inato'o' saua doce lapaxaguinatqa:

—¿Qamiri qai'neeta viitaque quiyim oquii?

₆₈Qam so Simón Pedro 'naaco':

—Qami' qara'gaxala', ¿negue' queto' cá'maq saxague? Ma' naua ra'qaataxahi' ỹaatqajam na'qaatqa chicqoraugui da nca'laxa sqaica lqodoc. ₆₉Chaqai qomi' shi'gue seuaqlec, chaqai sa'deenaq quiyim chaqaqami' ná'maq nashi nca'laxaqui, llaalec ñi qota'a, ñí'maq chaqai'en nca'leetauec.

₇₀Ca' so Jesús 'naaco':

—¿Ỹim se ica'acse'o' qamiri doce? Qam 'óna ñi na'ỹaapec caqamiri.

₇₁Ca co'na' 'naac dajo so Jesús, ca 'neetapega so Judas Iscariote, llaalec so Simón. Ma' so Judas ỹaano ma'le so'maxare, chaqai so'maxare ỹalequetaho quesaua doce lapaxaguinatqa.