Juan 15

₁Ca' ỹim ná'maq 'nejem acá'maq ỹaatqajam nanecse uva, chaqai ñi ita'a ñí'maq cochiitapega aca nanecse. ₂Ñi'maxare ichaxauec acanchaqaca quená'maq ỹasotellipi no'm sqaca aca la, chaqai no'ueenaxategue chaqai co'taxat acá'maq lasote 'ue aca la, qaiyi paguec aca la. ₃Chicqochigui da ỹapaxaguinataxanaxac quiyim qamiri mashic co'chiita. ₄Quiitalec quiyim na'yiitau'a ỹim, ca 'nejem aỹim shiquetalec quiyim ña'deeta'guita qamiri. Aca lasote se ishit 'ue aca la no'm chi nanoiquentac, no'm se na'deetau'a acá'maq loỹo; ca chaqai 'nejme' qamiri, qaica ca ishit 'ue aca la, no'm se na'deetau'a aỹim.

₅Ca' ỹim ná'maq ỹim nanecse, ca' qamiri ná'maq qamiri lasote. Cá'maq ñaq na'deetau'a ỹim, chaqai aỹim ña'deeta'guit ca'maxare, ca 'xoic aca la, ma' qamiri qaica ca shichii 'viichii, no'm qaica ỹim. ₆Ma' cá'maq se na'deetau'a ỹim, ca' qainaxauec, ca' ỹaso, 'nejem aná'maq lasote quena' qalapoon, ca' qaỹavigaxat queca norec.

₇No'm qamiri quiitalec quiyim na'yiitau'a ỹim, chaqai mesqai couahi'e naua ỹapaxaguinataxanaxaco, ca cá'maq shiilaxañiỹaque, ca' qoỹaañiỹaxarom. ₈Ñi ita'a qaimaqachin quena' 'xoic da laỹaxague' qamiri, ca' viriỹau'a quiyim ỹaatqajam qamiri ỹalamaxarete' ỹapaxaguinatqa. ₉Ỹim se'xorene' qamiri 'nejem dá'maq le'xorenataxanaxa ñí'maq ita'a caỹim. Ca' quiitalec dá'maq i'xorenataxanaxa caqamiri. ₁₀No'm na'xaỹaxañiỹa na ilaataxanaxaquipi, ca' quiitalec dá'maq i'xorenataxanaxa caqamiri, ca 'nejem aỹim ña'xaỹaxanalo naua lelaataxanaxaco ñi ita'a, ca' shiquetalec da le'xorenataxanaxa caỹim.

₁₁Ỹim shine'tegue dajo da shinac, qaiyi qamiri ñitoonaxaua', chaqai qaiyi 'xoic ca netoonaxaguii. ₁₂Dá'maq ilaataxanaxac 'neetasa': quiyim ne'xoriñiỹata', 'ne'tegue dá'maq i'xorenataxanaxa caqamiri. ₁₃Dá'maq paguec lecaic ne'xorenataxanaxa quiyim hueeto'ot ca qom 'neetasa': quiyim ca qom ishit ỹaanec da nachaalataxac queca nauochaxaua. ₁₄No'm 'viichii da ilaataxanaxac, ca' qamiri ñauochaxaua'. ₁₅Ca tot samata'que qamiri nelaatqa, ma' cá'maq nelaatec se ỹa'den cá'maq ỹo'uet ca na'co'. Ca shinac quiyim qamiri ñauochaxaua', ma' sa'deenaxanaxañiigue ná'ogue ná'maq 'naapiguiỹa' ñi ita'a. ₁₆Qamiri se rca'acshiguii aỹim, ỹim ica'acse' qamiri. Ca vichiguiño' shinapegalo qamiri quiyim 'xoic ca laỹaxac nqai'ñii da nachaalataxaguii, qam dajo laỹaxague' qamiri ỹaatqajam ra'ñiñi nqai'ñii, qaiyi ñi ita'a ỹaanema qamiri cá'ogue cá'maq shiilaxañiỹaque quiyim quiichigui nqai'ñii da ỹeenaxat. ₁₇Ca' dajo dá'maq ilaataxanaxac caqamiri: quiyim quiñi 'óna ỹaatqajam i'xoren ca liỹa.

₁₈Ca no'm na qomyipi hueetalec na 'laua noquii'alo qamiri, qam 'yiiñita quiyim 'au noquihaỹa'. ₁₉Quetqai qamiri 'laua lase', ca ná'maq qomyipi hueetalec na 'laua nqo'talo qamiri, 'ne'tegue da lqo'iichi quená'maq lalamqateripi. Qam ỹim ñca'au'alo qamiri quená'maq qomyipi hueetalec na 'laua. Vichiguiño' na'maxare noquii'alo qamiri, ma' totqai qamiri lase' na 'laua. ₂₀Se couahi'e dá'maq shinac na'le caqamiri: “Quiyim ca nelaatec se ỹapacauec queca na'co'.” Ca no'm ỹim qayocantac, ca' qamiri qai'neeta qarocañiỹac ma'le; chaqai no'm qana'xaỹaxana da ỹapaxaguinataxanaxac, qai'neeta qana'xaỹaxana ma'le ca rapaxaguinataxanaxaguii. ₂₁Dá'ogue dajo qohine'teguelo ma'le qamiri, sauaxat aỹim, ma' se qaiuanapega ñí'maq yila'.

₂₂Queta' se ñanac quiyim setaqaugui na'maxare, ca sqaica quet ca lasauaxaset. Qam nagui qaica quet cá'maq i'guenegue quiyim noqollictegue da lasauaxaset. ₂₃Ma' cá'maq noquii'a ỹim, ca' qai'neeta noquii'a ñí'maq ita'a. ₂₄Qaica quet ca lasauaxaset na'maxare, queta' qaica cá'maq so'uet huaugui na'maxare quená'maq se ishit ỹo'uet ca liỹa qom; qam mashic shi'gue iuana dajo, qam qaiyiita noquihaỹa', chaqai noquii'a qai'neeta ñi ita'a. ₂₅Qam dajo 'ue, ma' qaỹahotaque quiyim ipaquichigui nqohin da na'qaatec naneretañi queso naqataxaquipi qoỹaanema saua'maxare, ma' 'nerac: “Qaica quet cá'maq 'neeta, qam qanoquihaỹa'.”

₂₆Qam ma' novi' cá'maq ỹotauane' chaqai ỹa'ñaxate' qamiri, ca Espíritu cá'maq ichoxot dá'maq ỹaatqajam lliqueta, ñila' ma'le chicqo'ot ñi qota'a, ca'maxare ỹa'xat ma'le aỹim. ₂₇Qamiri qai'neeta ya'xachii ma'le, ma' qamiri iỹareta'pe na' ñaqai 'avichiguiñi sapaxaguinataxan.