Jeremías 43

₁Ca co'na' so Jeremías ỹomat quiyim ỹa'xatetapeguem sá'ogue so qomyipi da la'qaatec ñi qara'gaxala' ñí'maq qota'olec quesaua'maxare, ₂ca' so Azarías, só'maq llaalec so Osaías, so Johanán só'maq llaalec so Carea chaqai saua liỹa' ỹale' nemaqajnaxaqa 'nerac queso Jeremías:

—¡Qami' quedá'maq 'ñirac na'majñisac! Ñi qara'gaxala' ñí'maq qota'olec coqomi' mesqai 'naapega qami' quiyim sqai saxague da Egipto. ₃So llaalec so Nerías, leenaxat Baruc, chaqaiso só'maq 'naapega qami' quiyim 'ñirapogoxoua', ma' ỹahotaque qomi' loxonqa na caldeoipi, ca' qaralauajñi loqo'm qare'xat queda Babilonia.

₄Ca' chaqaida 'neeta vire'ta so Johanán chaqai so lashillipi so nouaataxanyipi chaqai vire'ta so qomyipi se no'ueenañi quiyi 'laua Judá, se na'xaỹaxana da la'qaatec ñi qara'gaxala'. ₅Ta'ta'a quiyim so Johanán chaqai sá'ogue so nouaataxanaq lashillipi lapoonta' sauá'maq mashic sqo vito'olqai' qomi' quiyi Judá, só'maq no'ueenañi na' ime qaiuagaxatetac quena ỹoqa'a 'lauaripi, chita'gue rapila yi Judá quiyim na'ñi yi'maxare: ₆ỹalliripi, 'aallipi, na ñaaqaipioqui', so llaallipi so nashi chaqai sá'ogue só'maq qomyipi quiyim so Nabuzaradán, só'maq lashi na neloxoỹaripi, so'maxare ỹamaxalec so Gedalías quiyim reloqota'a, vire'ta so Jeremías chaqai so Baruc. ₇Qaica ca na'xaỹaxana da la'qaatec ñi qara'gaxala', ca' sá'ogue so'maxare taigue da Egipto, ca ỹoviro'o' na'le yi na'a' lodegaxat Tafnes.

₈Ca' quiyi Tafnes, ca' ñi qara'gaxala' 'naaco' queso Jeremías:

₉—Coñitalo caua qari leta'al, ca' shiñiriñi quiyi nasoxoc naloote'oga ñi lasom ñigo quiñi lauo' so nashi quena Egipto, iuanchigui nqai'ñi' na Judá laseripi quenajo na'a' lodegaxat. ₁₀Ca 'ñirapega: Ñi qara'gaxala', ñí'maq sqaica lqalanec, ñí'maq qota'olec queso Israel, 'naac: Ỹim naiquena nqaishin ma'le ñi ilaatec Nabucodonosor, nashi quiyi Babilonia, chaqai sana'ñi najo aca nqa'xanaxaqui chaqai ca lauo' na'daañi ñi nashi, sanejlgoto naua qari sishiñiñi quenajo. ₁₁Ma' novi', ca nopoxoỹaxajñi na Egipto. Ca ná'maq taỹa'a quiyim ileu, ca' ileu; chaqai ná'maq taỹa'a quiyim qai'xategue ca liỹa 'laua, ca' qai'xat; chaqai ná'maq taỹa'a quiyim ileuaugui ca lauataq, ca' ileu ma'le queca lauataq. ₁₂Ca' copata'a ma'le na lauootoripi na lashiilqaipi na Egipto chaqai na lqolaqaipi copata'a loqo'm i'xat 'ec la'ac. Co'taxat ma'le na na'laua na Egipto, 'nejem ca qagreta lo'o quena naqat na lapaxat na looỹac. Ca' ime, ca' eec qaica ca quepaxat. ₁₃I'guenaxajñi ada netana ladocai quiyi nqouagaxainqa' cañi ra'aasa na na'ñi yi Egipto, chaqai copata'alo naua lauooto' na lashiilqaipi yi'maxare.