Jeremías 27

₁Na' ipalasauec saua cuatro ñaxari quiyim nashi so Josías llaalec, leenaxat Sedequías, quiyi 'laua Judá, ca' ñi qara'gaxala' ỹalamaxachichigui so Jeremías, ₂ca' 'naac:

—'Viichi' ca rañiqui' chaqai ca lqosojsec na ñii'lola quena' qaro'ueenataxañigui, ca' cá'ogue lli'ro'ot na rqosochi'. ₃Ma'le, ca' vito' ca ra'qaachiqui', lachi' quiñaua nashil quiyaua 'lauari Edom, Moab, Amón, Tiro chaqai yi Sidón, quesaua nodo' da na'qaatec quiyi Jerusalén na'piichita ñi nashi Sedequías. ₄'Ñirapego' quiyim 'naapega na lashillipi quiyim ỹim, ỹim na'gaxala' sqaica lqalanec, ỹim qota'olec queso Israel, shinac: ₅Chalego lecaic nqaishin da iquesaxanaxa na' ipeguenec nqaishin na 'laua, chaqai na qomyipi chaqai na iseripi hueetalec na'maxare, chaqai seshit saanem cá'maq yqo'ta. ₆Ma' ỹim saanema naua'que nauajo 'lauari da lquesaxanaxa ñi ilaatec Nabucodonosor, ñí'maq nashi quiyi Babilonia, chaqai vire'ta na iseripi neuec saanem quiyim ỹoiquentac. ₇Ná'ogue na ỹoreta'oguit qomyipi ỹoiquentac ma'le ñi'maxare, na llaalqaipi chaqai na lauaripi, chi ỹovireto'o' ma' na na'laua qalam qoỹoiquentac quena ỹoreta'oguit qomyipi chaqai na nashillipi quesaxanaxaiquipi. ₈Chaqai no'm 'ue quena ỹoreta'oguit qomyipi loqo'm quena lashillipi mesqai neneequesenot ñi nashi Nabucodonosor, ca' ỹim souaxan sahote'e ca lauataq, ca nqopaaxa chaqai ca ne'ne', chi ỹovireto'o' quiyim ná'ogue hueeta'ñot da lquesaxanaxa ñi'maxare. Ỹim na'gaxala', se'taxajñi dajo ỹa'qaatec.

₉Vichiguiño' qamiri totaxan na'xaỹaxañiỹo' na netaxaỹaxaquiripi, chaqai na ra'ỹaauec na qom lanatec, chaqai na ỹa'xatac na leloxoỹaxac na ne'guemataxac, chaqai na pi'xonaq quená'maq ỹahotaque ỹa'xateta'guit ca ñaqai naataho, chaqai ỹilenta'pe qamiri quiyim sqai 'guiñiỹot ñi nashi quiyi Babilonia. ₁₀Ma' la'maachic dá'maq ỹa'xatetac caqamiri. Qaidaata dá'maq chigoxochiỹaugui qamiri ma'le quiyim qai'xate' qamiri ma'le quena na'lauahi chaqai quiyim seuagaxata'pe qamiri, ca' rillivii. ₁₁Qam cá'maq qomyipi quiyim i'guenot da lquesaxanaxa ñi nashi quiyi Babilonia, ca' ỹim se sedaxan queca na'laua quiyim neetalec chaqai ro'ueenataxanlec. Ỹim na'gaxala', se'taxajñi da ỹa'qaatec.

₁₂Ỹim Jeremías liỹa sa'xat dá'ogue da la'qaatec ñi qota'olec quiñi Sedequías, ñí'maq nashi quena Judá, chaqai qai'neeta shinac quiñi'maxare:

—'Guiñiỹot da lquesaxanaxa ñi nashi quiyi Babilonia chaqai quena lauo', qaiyi rca'lliiuec. ₁₃¿Negue' quet cá'maq 'neeta quiyim rillivi' qami' chaqai na qauochi' sauaxat ca lauataq, ca nqopaaxa chaqai ca ne'ne'? Ma' ñi qara'gaxala' 'naac quiyim dá'ogue dajo ỹovirau'a ca qomyipi quiyim se i'guenot ñi nashi quiyi Babilonia. ₁₄Totaxan na'xaỹaxañiỹa najo netaxaỹaxaquiripi ná'maq ỹilenta'pe qamiri quiyim sqai 'guiñiỹot ñi nashi quiyi Babilonia, ma' ná'maq ỹa'xatetac na'maachic. ₁₅Ñi qara'gaxala' i'taxajñi 'naac quiyim ñi'maxare se ila' na'maxare; na'maxare chi ỹa'xatejlec 'naac quiyim qaila' quiñi qara'gaxala'. Ca' chaqaida dá'maq 'em quiyim ñi qara'gaxala' iuagaxata'pe qamiri ma'le, ca' qamiri chaqai na netaxaỹaxaquiripi ná'maq ỹa'xatetac dajo caqamiri, ca' ileu.

₁₆Chaqai qai'neeta shinapega so netaxaỹaxaquiripi chaqai sá'ogue so qomyipi, shinapega:

—Dajo 'naac ñi qara'gaxala': Totaxan na'xaỹaxañiỹa na netaxaỹaxaquiripi ná'maq 'naac quiyim qaỹaloq qaỹopilaxate' queda Babilonia naua louenqa ñi no'ueenaxanaxaqui. Ma' na'maachic dajo qaỹa'xatetac. ₁₇¡Totaxan na'xaỹaxañiỹa! 'Guiñiỹot ñi nashi quiyi Babilonia, qaiyi rca'lliiuec. ¿Negue' quet cá'maq 'neeta quiyim najo na'a' lodegaxat ñigui ca ladogoñi 'imqaipi qanopoxoỹaxajñi? ₁₈Ma' quetqai ỹaatqajam llic netaxaỹaxaquiripi chaqai ỹaatqajam llic setaqaugui, ca' yashiila ỹim na'gaxala' sqaica lqalanec quiyim se sasen qai'xat queda Babilonia ná'maq nouenqaipi ñaqai hueetaugui ñi no'ueenaxanaxaqui chaqai ñi lauo' lodegaxat ñi nashi quena Judá, chaqai quena Jerusalén.