So Jeremías qaỹadentalec qaỹalauat
1Na' nqa'xanñi quiyim nashi quiyi Judá so llaalec so Josías, leenaxat Joacim, ca' ñi qara'gaxala' ỹalamaxachichigui so Jeremías, 2ca 'naapega: Quirepegue' ñi no'ueenaxanaxaqui quena Jerusalén, ca' nachaachiriñi quiyi lavinñi yi nasoxoc. Ca' 'xachi' dá'ogue dá'maq selachirelec quiyim 'xachitem na qomyipi noviro quiyim nqouagaxain, chicqa'ogalo naua na'aate' leta'al quena 'laua Judá. Qaica cá'maq sqa 'xachi' quená'maq selachiraxalec. 3Sqoue na'xaỹaxana qami', ca' ỹaxañiñi naua se no'viiñi, ca' ỹim se sepacqajñigui ca nouaxanaxaset dá'maq sahotaque so'uet, sauaxate' naua se no'viiñi lo'ueenataxanaxaco. 4'Ñirapega quiyim ỹim, ỹim na'gaxala', shinac: No'm se na'xaỹaxañiua' chaqai se ipacqajñiguilo naua ỹapaxaguinataxanaxaco saanema, 5chaqai se na'xaỹaxanalo naua laqataxaco na ilaatqaipi itaxaỹaxaquiripi selaretapego, ná'maq qamiri se na'xaỹaxañiỹa, 6ma'le, ca' shine'tegue najo no'ueenaxanaxaqui dá'maq shine'tegue na'le só'maq na'ñi yi Silo. Ca' quenajo na'a' lodegaxat ñigui nqaishin quiyim naloqojnaxanaxaqui quiyim 'ue ca qaishiuen quená'ogue na qomyipi quena 'laua.
7Na netaxaỹaxanqajanqaipi chaqai na netaxaỹaxaquiripi chaqai sá'ogue so qomyipi 'xaỹa na'le da na'qaatec ỹa'xat so Jeremías quiñi no'ueenaxanaxaqui. 8Ca co'na' so'maxare ỹomat dá'maq ỹa'xat dá'maq qohinapega quiñi qara'gaxala', ca' sá'ogue so qomyipi iconlec so'maxare, ca 'naapega:
—¡Nagui, ca' rillivi'! 9¿Chi negue' cá'maq 'neetapiguio' qavilli' quiyim queda leenaxat ñi qara'gaxala', ca' najo no'ueenaxanaxaqui 'nejem ma'le so na'ñi yi Silo, chaqai najo na'a' lodegaxat qanopoxoỹaxajñi chaqai qaica ca qom na'ñi?
Ca' sá'ogue so qomyipi npataxata' lapoỹau'a so Jeremías.
10Ca' so nashillipi quiyi Judá, co'na' 'ue da la'xaỹaxac quiyi la'a' so lashi na nashillipi, ca' quepegue' ñi no'ueenaxanaxaqui. Ca na' ỹovita ñi qaỹamata'gue dalaxaic lasom, ca' nqa'xanñi lapoota'ta'. 11Ca co'na'le, ca' so netaxaỹaxanqajanqaipi chaqai so netaxaỹaxaquiripi 'naaco' queso nashillipi chaqai quesá'ogue so qomyipi:
—Ñijo ỹale 'maxaraic quiyim qaỹalauat, ma' 'ue da ỹa'xat se no'uen npa'guene'e' na Jerusalén. Ca' qamiri ỹaatqajam 'xahichigui na'le so la'qaatec ñi'maxare.
12Ca' so Jeremías 'naaco' queso nashillipi chaqai queso qomyipi:
—Ñi qara'gaxala', ñí'maq yila' setaqa quiyim npa'guene'e' najo no'ueenaxanaxaqui chaqai na na'a' lodegaxat dá'ogue dá'maq 'xahichigui qamiri. 13No'ueenaxachii da ra'deenataxanaxaguii chaqai da ro'ueenataxanaxaguii, na'xaỹaxañiỹa ñi qara'gaxala' qota'olec, ca' ñi'maxare se ilatalo qamiri ma'le ca re'xoriguii ỹa'xateta'guit. 14Qam caỹim, ma' mashic yaqachiñi, ca viỹaque cá'maq sham 'ñiitahic. 15Qam 'yiiñitari' ma'le dajo, no'm yalauachii, qamiri ñiỹa'ñi najo na'a' lodegaxat, ca' 'ue ca rasauaxashichii, ma' yalauachii qaica ca sasauaxat; ma' ỹaatqajam lliqueta quiyim ñi qara'gaxala' chaqaiñi ñí'maq yila' quiyim sa'xatema qamiri dá'maq 'xahitapega nagui.
16Co'na'le, ca' so nashillipi chaqai so qomyipi 'naapega so netaxaỹaxanqajanqaipi chaqai so netaxaỹaxaquiripi:
—Qaica quet cá'maq 'neeta quiyim qaỹalauat ñijo ỹale, ma' dá'maq ỹa'xat chicqo'ot ñi qara'gaxala' ñí'maq qota'olec coqomi'.
17Ca' 'vii saua qo'xoiqa ne'laxachishiguim, ca 'nerapega so qomyipi hueete'eyi lapoota'ta':
18—Quesaua na'xata' na' nashi so Ezequías quiyi Judá, ca' so Miqueas, na'ñi yi Moreset, retaqa ỹa'xat da la'qaatec ñi qara'gaxala' quená'ogue na qomyipi neetalec na 'laua Judá, 'naac na'le:
Ñi qara'gaxala' sqaica lqalanec 'naacsa':
Na Sión ñigui ma'le ca no'ueenaxa nasauguec,
na Jerusalén 'ec ca qalapoonñi 'imec ropoqogui
chaqai naua quemaralgoto quiñi no'ueenaxanaxaqui no'xalec ma'le cana peue.
19Ca' so nashi Ezequías chaqai sá'ogue so qomyipi quena Judá, ¿'uo' ca 'ne'tegue na'le so Miqueas? 'E', ta'ta'a quiyim so nashi 'ue da lqolonaxa quiñi qara'gaxala', ca' rashiilaxan quiyim qanqouaguegue so qomyipi. Ca' ñi qara'gaxala' se nela' só'maq ỹahotaque taalec nqai'en. Ca' ¿qomi' sahoqotaco' quiyim ñiỹoxosqalta' queda chalego lecaic nasauaxaset?
20Qai'neeta so netaxaỹaxaqui, llaalec so Semaías, leenaxat Urías, na'ñi yi na'a' lodegaxat Quiriat-jearim, ỹa'xat da la'qaatec ñi qara'gaxala' taỹalec najo na'a' lodegaxat chaqai najo 'laua, 'nejem dá'maq 'naac so Jeremías. 21So nashi Joacim chaqai so lotauaripi chaqai so liỹa nashillipi, na' 'xaỹa dá'maq 'naac so Urías, ca' so nashi ỹahotaque quiyim qaỹalauat. Qam na' ỹa'den so'maxare, ca' no'chi, ca' 'eet, taigue da Egipto. 22Ca' so nashi ilategue da Egipto so llaalec so Acbor, leenaxat Elnatán, chaqai saua liỹa' ỹale'. 23Ca saua'maxare ne'xate' so Urías queda Egipto, ca' qoỹaanem so nashi Joacim, ca so'maxare relaataxanlec quiyim qaỹalauat, ca' so loshicmaxa qaillaañigui aso napal lahi', qaỹalecqajnougui na 'xoraiquipi.
24Ca' so llaalec so Safán, leenaxat Ahicam, retaqa qoshiilec so Jeremías, ca' quedajo, ca' ỹo'uet quiyim se qoỹaanougui so qomyipi quiyim qaỹalauat.
